ފުލުހުންނާއި ސިފައިން އަދި ރައްޔިތުންގެ މަޖިލީހުގެ އިތުރުން ދައުލަތުގެ އެހެނިހެން މުއައްސަސާތަކުގެ އަގު ހިފެހެއްޓުމަށްޓަކައި ގާނޫނެއް ހަދަން ހޯމް މިނިސްޓަރު އަލީ އިހުސާން ގޮވައިލެއްވުމުން އޭނާއަށް ފާޑުކިޔުން އަމާޒުވެއްޖެ އެވެ.
ގާނޫނެއް ހަދައިގެން މުއައްސަސާތަކުގެ އަގު ހިފަހައްޓަން އިހުސާން ގޮވައިލެއްވީ އަންގާރަ ދުވަހު މަޖިލީހުގައި ވާހަކަ ދައްކަވަމުންނެވެ. އޭނާ ވިދާޅުވީ، ހާއްސަކޮށް ފުލުހުންނާއި ސިފައިންގެ އަގު ވައްޓާލަން ސިޔާސީ ގޮތުން މަސައްކަތް ކުރާ ކަމަށާއި އެކަން ގާނޫނަކުން ހުއްޓުވަންޖެހޭ ކަމަށެވެ.
"ދިވެހި ފުލުހުންގެ މުއައްސަސާގެ އަގު ވެސް، ދިވެހި ސިފައިންގެ އަގު ވެސް އަދި މި އިއްޒަތްތެރި މަޖިލީހުގެ އަގު ވެސް ހިފެހެއްޓުމަށްޓަކައި ހަދަންޖެހޭ ގާނޫނާއި ގަވާއިދުތަކާ އެއްޗެހި ހައްދަވައިދެއްވުމަކީ ހަމަ އަޅުގަނޑު ވަރަށް ބޮޑަށް އެދޭ ކަމެއް،" އިހުސާން ވިދާޅުވި އެވެ.
އިހުސާން އެހެން ވިދާޅުވުމުން، ސޯޝަލް މީޑިއާގައި ހިޔާލުފާޅު ކުރަމުން ބައެއް މީހުން ބުނީ، ގަދަރާއި އިހުތިރާމަކީ ގާނޫނެއް ހަދައިގެން ގަދަބާރުން ހޯދޭނެ އެއްޗެއް ނޫން ކަމަށެވެ.
"އިއްޒަތާއި އަބުރާއި އިހްތިރާމަކީ ގާނޫނު ހަދައިގެން، ބިރު ދައްކައިގެން ގަދަ ބާރުން ހޯދޭނެ އެއްޗެއް ނޫން! އެއީ ބަހާއި އަމަލާއި އުޅުމާއި ގުޅުމުން ހޯދާ އެެއްޗެއް! އެހެން މީހުން ހިތުން ރުހުމުން ދޭ އެއްޗެއް! ގާދަ ބާރުން ފޭރޭ އެއްޗެއް ނޫން! ގާނޫނެއް ނެތަސް، ބިރު ނުދެއްކިޔަސް، އިހްތިރާމް ހައްގު އުޅުމާއި ގުޅުމަށް އާންމުން އިހްތިރާމް ކުރާނެ!،" ސޯޝަލް އެކްޓިވިސްޓް މިދުއަމް ސައީދު އެކްސްގައި ލިޔެފައިވެ އެވެ.
އިހުސާނަށް ފާޑުވިދާޅުވެ، ރައްޔިތުންގެ މަޖިލީހުގެ ގަލޮޅު އުތުރު ދާއިރާގެ މެންބަރު މުހައްމަދު އިބްރާހިމް (ކުޑޫ) ވެސް ފާޑުވިދާޅުވި އެވެ.
"މީހެއްގެ އަގު މުޖުތަމައުގައި ކުޑަވަނީ އޭނާގެ ނުބައި އަހްލާގާއި، ދޮގުހެދުމާއި، ހިޔާނާތްތެރިވުން ފަދަ ނޭދެވޭ އަމަލުތަކުގެ ސަބަބުން. އިތުބާރު ގެއްލި ގަދަރު ކުޑަވަނީ ޒިންމާތަކަށް ފަރުވާކުޑަކޮށް، މީހުންނަށް އިހްތިރާމް ނުކުރާނަމަ. މީހެއްގެ އަގު ހިފެހެއްޓެނީ ތެދުވެރިކަމާއި ރިވެތި އުޅުމުން ކަމަށްވާއިރު، މިއީ ގާނޫނަކުން އިސްލާހުކުރެވޭނެ ކަމެއް ނޫން،" އޭނާ ވިދާޅުވެފައިވެ އެވެ.
ފުލުހުންނާއި ސިފައިން ހިމެނޭ ގޮތަށް މުއައްސަސާތަކުގެ އަގު ހިފަހައްޓަން އިހުސާން ގޮވައިލެއްވީ، ބައެއް ހާދިސާތަކުގައި މުއައްސަސާތަކުގެ އަގު ވައްޓާލަން ސިޔާސީ ފަރާތްތަކުން މަސައްކަތް ކުރަމުންދާ ކަމަށް ވިދާޅުވެ އެވެ. އޭނާ ފާހަގަ ކުރެއްވި އެއް ހާދިސާއަކީ އެމްއެންޔޫ ދަނާލުގައި އެތަނުގައި ކިޔަވާ ކުއްޖަކު ނިޔާވި ހާދިސާ އެވެ.
"އަޅުގަނޑު ހަމަ ތަކުރާރުކޮށް ކުރިން ވެސް ދަންނަވާފައިވާނެ، ދިވެހިރާއްޖޭގައި ނޫސްވެރިން އެ ހާލަތުގައި މި ދެންނެވުނު ހާދިސާގައި އަމަލުކޮށްފައި ވަނީ ވަރަށް ރަނގަޅަށްކަން އަޅުގަނޑު ފާހަގަ ކުރަން. އެހެން ނަމަވެސް ސިޔާސީ ބައެއް ފަރާތްތަކުން ވަރަށް ޒިންމާދާރުކަން ކުޑަކޮށް ދިވެހި ފުލުހުންގެ ހިދުމަތުގެ އަގު ވެއްޓޭ ގޮތަށް އަދި މި ނާޒުކު ހާލަތުގެ އެޑްވާންޓޭޖް ނަގައިގެން ރައްޔިތުންނަށް އޮޅުވާލާފައިވާކަން އަޅުގަނޑު ފާހަގަ ކުރަން،" އިހުސާން އިއްޔެ ވިދާޅުވި އެވެ.
