މި ސަރުކާރުން ހިންގަމުންދާ އެންމެ ބިޔަ ބިން ހިއްކުމުގެ މަޝްރޫއު ކަމަށްވާ ރަސްމާލޭގެ ހާހަކަށްވުރެ ގިނަ ހެކްޓަރާއި މާލެ ސަރަހައްދުގެ އެހެން ބިންތައް ހިއްކަން ގެނެސްފައިވާ ބޮޑެތި ޑްރެޖަރުތަކާއެކު މާލެ އަތޮޅުގެ އެތެރެވަރި ކިލަނބުވެ ކިސަޑުން ފަރުތަކަށް ބޮޑެތި ގެއްލުންތަކެއް ވާން ފަށައިފި އެވެ.
މާލެ ސަރަހައްދުގެ ކިލަނބުކަން ޑްރޯން ފޮޓޯތަކާއި މަތިންދާ ބޯޓުތަކުގެ އިތުރުން ސެޓްލައިޓު ފޮޓޯތަކަށް ވެސް އަރަ އެވެ. ގިނަ އަދަދެއްގެ ކިސަޑު ފަރުތަކާއި ދިމާލަށް އޮޔާއެކު ދެމޭ މަންޒަރު ކުލަކޮށް ފެނެ އެވެ.
މިކަމުގެ ކަންބޮޑުވުން އިތުރުވީ ރަސްމާލެ ހިއްކުމަށް މިވަގުތު ދުނިޔޭގައި އޮތް އެންމެ ބޮޑު ޑްރެޖަރު ހޮލެންޑުގެ ހަން ޑެ ނަލް އިން އޮޕަރޭޓުކުރާ ކްރިސްޓޮބަލް ކޯލޮން އިން މާލެ އަތޮޅު ދެކުނު ބުރިއަށް އައިސް ވެލި ނަގަން ފެށުމުންނެވެ.
ދަތުރެއްގެ މައްޗަށް 78،000 ޓަނުގެ ވެލި އުފުލޭ މި ޑްރެޖަރުން ރަސްމާލެ ހިއްކުމަށް ވެލި ނަގަމުންދަނީ ކ. ގުޅި އަދި ކ. މާފުށި ކައިރިންނެވެ. މިކަމާއި ގުޅިގެން އެ ދެ ރަށާއި ކައިރި ހުރި ރިސޯޓުތަކުގެ ފަރަށް ބޮޑެތި ގެއްލުންތަކެއް ވަމުންދާކަމުގެ ކަންބޮޑުވުން ފާޅުކުރާތާ މިހާރު މަހެއްހާ ދުވަސް ވަނީ އެވެ.
މި މަހުގެ ތެރޭ މި ނޫހުން އެއްކޮށްފައިވާ އެކި ސެޓްލައިޓު ފޮޓޯތަކުން ފެންނަ ގޮތުގައި ރަސްމާލެ ހިއްކުމަށް ވެލި ނެގުމުގެ ސަބަބުން މާލެ އަތޮޅު ދެކުނު ބުރީގެ އިރުމަތީ ބިތުގެ ބޮޑު ބަޔަކަށް ވަނީ ކިސަޑާއި ވެލި ފެތުރިފަ އެވެ.
ކިސަޑާއި ވެލި ގުޅި އަދި މާފުށީގެ އިތުރުން އެ ހިސާބުގައިވާ ފަޅުތަކާއި އެ ފަޅުތަކުގައި ހުރި ރިސޯޓުތަކުގެ ފަރަށް ވަނީ ފެތުރިފަ އެވެ. މީގ އިތުރުން ރަސްމާލެ ހިއްކާއިރު ބަންޑް ވޯލް ނުޖެހުމާއި ރައްކާތެރިކަމުގެ އެހެން ފިޔަވަޅުތައް ނޭޅުމުގެ ސަބަބުން ފުށިދިއްގަރުފަޅަށް އަޅަމުންދާ ވެލީގެ ބައެއް ގިރައިގެން ދާ މަންޒަރު ވެސް ސެޓްލައިޓު ފޮޓޯތަކުން ފެނެ އެވެ.
ރަސްމާލެ ހިއްކާ ޑްރެޖަރު ވެލިނަގާ މަންޒަރު ފެންނަ ސެޓްލައިޓު ފޮޓޯއެއް ހިއްސާކޮށް އީކޯކެއާގެ އެޑްވޮކަސީ ޑިރެކްޓަރު، މައީދު ޒާހިރު މިކަމާއި ގުޅޭގޮތުން ކުރި ޕޯސްޓެއްގައި މިއީ ގާނޫނުއަސާސީ އާއި ހިލާފު ކަމެއް ކަމަށް ވަނީ ބުނެފަ އެވެ.
އެގޮތުން ގާނޫނުއަސާސީގެ 23 ވަނަ މާއްދާގައި ކޮންމެ ރައްޔިތަކަށް ވެސް ސިއްހަތު ރަނގަޅު ރައްކާތެރި ތިމާވެއްޓެއްގައި ދިރިއުޅުމުގެ ކަށަވަރުކޮށްދީފައިވާކަން އޭނާ ވަނީ ފާހަގަކޮށްފަ އެވެ. މައީދުގެ އިތުރުން ވެސް ގިނަ ބަޔަކު ދަނީ މިކަމާއި ގުޅޭގޮތުން ކަންބޮޑުވުން ފާޅުކުރަމުންނެވެ.
ހުޅުމާލެ ފޭސް ތިނެއް އަދި ގަލުފަޅު ހިއްކުމާއި ގުޅިގެން ފެތުރެމުންދާ ވެއްޔާއި ކިސަޑު ---- ފޮޓޯ: ސެންޓިނެލް 2
މި ނޫހުގެ ޓީމުން އިތުރަށް ބެލި ބެލުމުން ރަސްމާލޭގެ އިތުރުން ހުޅުމާލެ ފޭސް ތިނެއް އަދި މާލެ ކުރިމަތީހެން އޮންނަ "އަތަމަނަ" ނުވަތަ ކުރީގެ ގަލުފަޅު ހިއްކުމަށް ކުރަމުންދާ މަސައްކަތުގެ ސަބަބުން އުތުރު މާލެ އަތޮޅުގެ ބައެއް ސަރަހައްދުތަކަށް ވެއްޔާއި ކިސަޑު ފެތުރޭ މަންޒަރު ވަނީ ފާހަގަވެފަ އެވެ.
ފޭސް ތިނެއް ހިއްކުމަށް އަޅަމުންދާ ވެލީގެ ސަބަބުން އުފެދޭ ކިސަޑާއި އޮޅަ ހުޅުމާލެ ފަޅުން ބޭރުވެ ހުޅުލޭގެ ފަޅާއި އެ ދިމާ ބޭރަށް ފެތުރޭ މަންޒަރު ފޮޓޯތަކަށް ސާފުކޮށް އަރާފައިވެ އެވެ.
ޒަމާނީ ކޮންވެންޝަން ސެންޓަރެއް ހިމެނޭ ގޮތަށް، އިވެންޓު ސެންޓަރެއް ތަރައްގީކުރަން ބިން ހިއްކުމުގެ މަސައްކަތް ފަށާފައިވާ ގަލުފަޅު ހިއްކަމުން ދިޔުމާއި ގުޅިގެން އެ ފަޅުގެ ހުޅަނގުން ވެސް ކޮންމެ ވެސް ވަރަކަށް ވެއްޔާއި ކިސަޑު އޮޔާއި ދެމޭ މަންޒަރު ފޮޓޯތަކުން ފެނެ އެވެ.
ރަސްމާލެ މަޝްރޫއުގެ ސަބަބުން އެ ސަރަހައްދުގެ ފަރުތަކަށް ބޮޑެތި ގެއްލުންތަކެއް ވަމުން އަންނާތީ އެކަމާ ކަންބޮޑުވުން ފާޅުކޮށް، ފަރުތަކުގެ ސަލާމަތް ކަށަވަރުކުރުމަށް ގޮވާލައި އެ ފަރު ހިއްކާ ޑްރެޖަރު ކައިރި ޑިސެމްބަރު 26، ގައި މުޒާހަރާ ވެސް ކުރި އެވެ.
ފުށިދިއްގަރާއި ހައެއް ކިލޯމީޓަރު ދުރުގައި އޮންނަ މާފުށީގައި ގެސްޓްހައުސް ވިޔަފާރިކުރާ ފަރާތްތަކާއި ޑައިވިން އަދި ވޯޓާ ސްޕޯޓްސްގެ ހަރަކާތްތައް ހިންގާ ފަރާތްތަކުން އިންތިޒާމުކޮށްގެން ކުރިއަށް ގެންދިޔަ މި މުޒާހަރާގައި 20 ވަރަކަށް ލޯންޗު އަދި ދެތިން ދޯނި ބައިވެރިވި އެވެ.
އެ ލޯންޗުތަކުގައި ދިވެހި ދިދަ ޖަހާފައި ހުރި އިރު ލޯންޗުތަކުގައި ތިބި މީހުން ތިބީ ފަރުތައް ހިމާޔަތްކުރުމަށް ގޮވާލައި އެކި ލިޔުންތައް ލިޔެފައިވާ ޕޯސްޓަރުތައް ހިފަހައްޓައިގެންނެވެ. ފަރުތައް ހިމާޔަތް ކުރުމަށާއި ތިމާވެށްޓަށް ގެއްލުންވާނެހެން ވެލި ނުނެގުމަށް އެ މީހުން ދިޔައީ ގޮވާލަމުންނެވެ.
"ރާއްޖޭގެ ފަރުތައް ހަލާކުކުރަނީ. ފަރުތައް ހަލާކު ކުރުން ހުއްޓާލާ. ފަރުތައް ސަލާމަތްކުރޭ،" މި ނޫހަށް އެ ދުވަހު ލިބުނު ވީޑިއޯއެއްގައި އެކަކު ގޮވާލަމުންދެ އެވެ.
ރަސްމާލޭގެ ދެކުނުން އޮންނަ ގުޅި، މާފުށި އަދި ގުރައިދޫއަކީ މާލެ އަތޮޅުގައި ލޯކަލް ޓޫރިޒަމް އެންމެ ފުޅާދާއިރާއެއްގައި ކުރަމުން އަންނަ ތިން ރަށެވެ. ދެކުނު މާލެ އަތޮޅުގައި ގިނަ ރިސޯޓުތަކެއް ވެސް ހިންގަމުން އަންނައިރު ގެސްޓުންގެ މެދުގައި މަގުބޫލު ޑައިވް ސްޕޮޓްތަކާއި ރާޅުތައް ހަލާކުވަމުން އަންނަ ކަމުގެ ޝަކުވާ ވަނީ އިތުރުވެފަ އެވެ.
