ނިޝާން އިއްޒުއްދީނުގެ އިއްޒަތުގެ ވެރިޔާ ޑރ. މުހައްމަދު ޒާހިރު ހުސައިން އަށް ދިވެހިރާއްޖޭގެ ތައުލީމަށް ހިދުމަތް ކުރުމުގެ އެންމެ މަތިވެރި ޝަރަފު މިރޭ ރަސްމީކޮށް އަރުވައިފި އެވެ.
ޒާހިރުއަށް މި ޝަރަފު އެރުވީ މި އަހަރުގެ ޖުމްހުރީ ދުވަހުގެ ރަސްމީ ޖަލްސާގައި ރައީސް ޑރ. މުހައްމަދު މުއިއްޒު އެވެ.
ޒާހިރު އަކީ އެތަކެއް ދަހަރެއް ވަންދެން ރާއްޖޭގެ ތައުލީމު ކުރިއެރުވުމަށް، އެ ދާއިރާއިން އެތަކެއް ހިދުމަތެއް ކުރައްވާފައިވާ ބޭފުޅެކެވެ. އޭނާ މިހާރު ހުންނެވީ ރާއްޖޭގެ އިސްލާމީ ޔުނިވަރސިޓީގެ ޗާންސެލަރުގެ މަގާމުގަ އެވެ.
ފުވައްމުލަކަށް އުފަން ޒާހިރު ތައުލީމު ހާސިލްކުރެއްވީ މާލޭގައި ހުރި ދާރުލްއިގާމާ، މަދަރްސަތުލް މަޖީދިއްޔާ، އަދި މިސްރުގެ އަލް އަޒްހަރު ޔުނިވަސިޓީންނެވެ. އަޒްހަރުން ޒާހިރު ވަނީ ފުރަތަމަ ޑިގްރީ އަދި މާސްޓާސް ޑިގްރީ ހާސިލް ކުރައްވައިފަ އެވެ.
ތައުލީމު ހާސިލްކުރެއްވުމަށްފަހު ޒާހިރު އެނބުރި ގައުމަށް ވަޑައިގެން، އެންމެ ފުރަތަމަ ގައުމަށް ހިދުމަތް ކޮށްދެއްވަން ފެއްޓެވީ އަމީނިއްޔާ ސްކޫލުގެ އިސްލާމް ޓީޗަރެއްގެ ގޮތުގަ އެވެ. އެއީ 1970 ގަ އެވެ. އެ ހަމަ އެއިރު ޒާހިރު ވަނީ އެޑިއުކޭޝަން މިނިސްޓްރީގެ ވަކީލުގެ މަގާމު ވެސް އަދާކުރައްވާފަ އެވެ.
އޭގެ ފަހުން 1976 ގައި ސަރުކާރުން ވަނީ ތައުލީމީ ވުޒާރައިގެ ނައިބުގެ މަގާމަށް ޒާހިރު އައްޔަންކޮށްފަ އެވެ. ކުރީގެ ރައީސް އިބްރާހިމް ނާސިރުގެ ވެރިކަމުގައި ޔުނެސްކޯ އާއި ޔުނިސެފް އަދި ޔޫއެންޑީޕީ ގުޅިގެން ރާއްޖޭގައި ފެށި ކޮމިއުނިޓީ ތައުލީމުގެ މަޝްރޫއުގައި އެންމެ އިސްކޮށް ހުންނެވީ ވެސް ޒާހިރު އެވެ.
މި ހިދުމަތުގެ ތެރެއިން އެޑިއުކޭޝަން މިނިސްޓަރުގެ މަގާމަށް ޒާހިރު އައްޔަންކުރެއްވީ ޖުލައި 23، 1979، ގައި ކުރީގެ ރައީސް މައުމޫން އަބްދުލްގައްޔޫމް އެވެ. އެ މަގާމުގައި ޒާހިރު 10 އަހަރާއި ނުވަ މަސްދުވަހު ހިދުމަތް ކުރެއްވި އެވެ.
ތައުލީމުގެ އިތުރުން ރާއްޖޭގެ ނޫސްވެރިކަމަށް ވެސް ޒާހިރު ވަނީ ބޮޑެތި ހިދުމަތްތަކެއް ކުރައްވާފަ އެވެ. އެގޮތުން "އަމާޒު" ގެ ނަމުގައި މަޖައްލާއެއް ނެރުއްވައި ފަހުން "ހަވީރު" ނޫސް އުފެއްދެވީ ވެސް ޒާހިރެވެ. މި މަސައްކަތްތަކުގެ އަގުވަޒަންކޮށް ސަރުކާރުން ވަނީ ޒާހިރު އަށް ނޫސްވެރިކަމުގެ "އަލިމަސް ގަލަން" ވެސް އަރުވައިފަ އެވެ.
ގައުމީ ހިދުމަތުގެ ތެރެއިން ޒާހިރު ޕީއެޗްޑީ ހާސިލުކުރެއްވީ، މެލޭޝިޔާގެ ޔުނިވާސިޓީ ކެބަންސާން މެލޭޝިޔާގައި، ތިއޯލޮޖީ އެންޑް ފިލޯސޮފީގެ ރޮނގުން 2001 ގަ އެވެ.
ގައުމީ މަސައްކަތުގެ އަގުވަޒަންކޮށް ސަރުކާރުން ޒާހިރުއަށް ނިޝާން އިއްޒުއްދީންގެ އިއްޒަތުގެ ލަގަބު އެރުވީ 2008 ގަ އެވެ.
