ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވެސް އެ ވެރިކަމެއްގައި ހިމެނިވަޑައިގެންނެވި، ކުރީގެ ރައީސް އަބްދުﷲ ޔާމީން އަބްދުލްގައްޔޫމްގެ ވެރިކަން ސިފަ ކުރައްވަމުން އައި ގޮތް ބަދަލު ކުރައްވައި އެ ވެރިކަމަށް ފުރަތަމަ ފަހަރަށް ރައީސް މުއިއްޒު ފާޑުވިދާޅުވެއްޖެ އެވެ.
ޖުމްހޫރީ ދުވަހުގެ މުނާސަބަތުގައި ރޭ ބޭއްވި ޖަލްސާގައި ވާހަކަދައްކަވަމުން ނުސީދާކޮށް ރައީސް ވިދާޅުވީ ޔާމީންގެ ވެރިކަމުގައި ސިޔާސީ ގޮތުން ބަދަލު ހިފުމަށް އަނިޔާވެރިކަމާއެކު މަސައްކަތް ކުރައްވާފައިވާ ކަމަށެވެ.
"މީގެ ކުރީގައި އެކަން އޮތީ ކޮންމެވެސް ވަރަކަށް ފެނިފައި. އެކި ގޮތްގޮތުން، ފްރޭމްކޮށްގެން ކަމުގައި ވިޔަސް ނޫނީވިއްޔާ އެހެން ގޮތަކުން ވިޔަސް އަނިޔާވެރިކަމާ އެކީގައި ސިޔާސީ ވާދަވެރިން ގެންގޮސް ޖަލަށްލައި އަނިޔާކޮށްފައި. އެއީ ތިމަންނައާ ތިމާގެ މީހަކަށް ވިޔަސް ތިމަންނަގެ ރައްޓެއްސެއް ވިޔަސް ކޮންމެ މީހެއް ވިޔަސް، ސިޔާސީ މީހެއް ވިއްޔާ ދުރައްލައި އެއްކައިރި ކުރި ޒަމާން މި ގައުމުގައި އިރާދަ ކުރެއްވިއްޔާ ތާ އަބަދަށް މި ވެރިކަން ފެށުނު ދުވަހުން ފެށިގެން ވާނީ ނެތިގެން ގޮސްފައި،" ރައީސް ވިދާޅުވި އެވެ.
ކުރީގެ ރައީސް ޔާމީނުގެ ވެރިކަމާ ގުޅޭގޮތުން ނުސީދާކޮށް މި މޭރުމުން ރައީސް ވާހަކަދެއްކެވި ނަމަވެސް މީގެ ކުރިން އެ ވެރިކަން ރައީސް މުއިއްޒު ސިފަ ކުރެއްވީ މުޅީން ތަފާތުކޮށެވެ. އެ ވެރިކަމާ ގުޅޭގޮތުން ކުރިން އަމާޒުވި ސުވާލުތަކަށް ފަރިތަކަމާއެކު ރައީސް ޖަވާބު ދެއްވީ ޔާމީނު ދިފާއު ކުރައްވައި އެ ވެރިކަމަށް ވެސް ތައުރީފު ކުރައްވަމުންނެވެ.
އޭރު ރައީސް މުއިއްޒު ވިދާޅުވަމުން ގެންދެވީ ޔާމީނުގެ ވެރިކަމުގައި ގާނޫނާ ހިލާފު އެއްވެސް ނުކުރައްވާ ކަމަށާއި ކުށެއް ނުކުރާ މީހަކު އެ ވެރިކަމުގައި ހައްޔަރު ނުކުރާ ކަމަށެވެ.
"ކުށްކޮށްގެން އޮންނަ ޕްރޮސީޖާގެ ތެރެއިން ކަމާބެހޭ ފަރާތްތަކުން، [އޮންނަ] އުސޫލުގެ ތެރެއިން ނޫނީ ނެތް އެއްވެސް ފަރާތަކަށް ފިޔަވަޅެއް އަޅާފައެއް. އެ ފިޔަވަޅު އެޅިގެން ދިޔަ ފަރާތްތަކާއި އެފަރާތްތަކާ ގުޅިފައި ހުރި ފަރާތްތަކުން އެ ވާހަކަ ދައްކާ. ދެއްކިޔަސް ހަމަ ބެއްލެވީމާ ފެނިވަޑައިގަންނަވާނީ ހަމަ އިޖުރާއަތްތަކުގެ ތެރެއިން ގާނޫނީ ހަމަތަކުގެ މަތިން ގާނޫނީ ވެރިކަމެއް ކުރެއްވީ،" ރައީސް ޔާމީން ދިފާއު ކުރައްވައި މުއިއްޒު އޭރު ވިދާޅުވި އެވެ.
"އަޅުގަނޑަކަށް ނުފެނޭ ގާނޫނަކާ ހިލާފުނުވެ ނޫނިއްޔާމު ކުށެއް ނުކޮށް މީހަކު ހައްޔަރު ކުރި ކަމަކަށް. ނެތް ފެންނާކަށް،"
ޔާމީނުގެ ވެރިކަމާ ގުޅޭގޮތުން ވާހަކަދައްކަވަމުން ގެންދެވި ވާހަކައިގެ ރާގު ރައީސް ބަދަލު ކުރައްވާފައި މިވަނީ އެމަނިކުފާނު އަރިހުގައި ތިބި ބޭފުޅުން ވެސް ޔާމީނާ ގުޅޭގޮތުން ދައްކަމުންދިޔަ ވާހަކަތައް ބަދަލުވެ، ޔާމީނުގެ މައްޗަށް ތުހުމަތުތައް ކުރަން ފެށި ފަހުންނެވެ.
އެ ގޮތުން މަޖިލީހުގެ ރައީސް، އަބްދުއްރަހީމް އަބްދުﷲ އާއި ޕީއެންސީގެ ޕީޖީ ލީޑަރު، އިބްރާހިމް ފަލާހު ވަނީ ޔާމީނުގެ ވެރިކަމުގައި އެމަނިކުފާނުގެ އެކައުންޓަށް ޖަމާވި ފައިސާ އާ ގުޅޭގޮތުން ސުވާލު އުފައްދަވައި ކޮރަޕްޝަނުގެ ތުހުމަތުގެ އަމާޒުވާ މޭރުމަކުން ތަކުރާރުކޮށް ވާހަކަދައްކަވައިފަ އެވެ.
