ގައުމުގައި ހުރި ބޮޑެތި މައްސަލަތައް ހައްލު ކުރަން ރައްޔިތުން އެއްބާރުލުން ދިނުމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިރޭ އެދިވަޑައިގެންފި އެވެ.
ޖުމްހޫރީ ދުވަހުގެ މުނާސަބަތުގައި ބާއްވާ ޖަލްސާގައި ވާހަކަ ދައްކަވަމުން ރައީސް މުއިއްޒު ވިދާޅުވީ ރައްޔިތުން އެއްބާރުލުން ދޭ ނަމަ ގައުމުގެ ހުރިހާ މައްސަލަތައް ވެސް ހައްލު ކުރައްވާނެކަމުގެ ޔަގީންކަން އަރުވާ ކަމަށެވެ.
"ރައްޔިތުންގެ ފަޅީގައި ތިބެގެން މި ބުރަ، އުނދަގޫ ބޮޑު މައްސަލަތައް ރައްޔިތުންނަށްޓަކައި ހައްލުކޮށްދިނުމަށްޓަކައި މި ތެދުވީ. އަޅުގަނޑު ޔަގީން ކުރަނީ ރައްޔިތުން އަޅުގަނޑުމެންނާއެކުގައި މިކަމުގައި ތިއްބަވާނެ ކަމަށް ސާބިތުކަމާއެކީ،" ރައީސް ވިދާޅުވި އެވެ.
އެގޮތުން ރައީސް ވަނީ ގައުމުގެ ބައެއް މައްސަލަތަކުގެ ގޮތުގައި ޑޮލަރުގެ ކަޅު ބާޒާރުގެ މައްސަލަ ފާހަގަ ކުރައްވައިފަ އެވެ. އެ މައްސަލަ ހައްލު ކުރަން ސަރުކާރުން މަސައްކަތް ފަށާފައިވާ ކަމަށް ވެސް ރައީސް ވިދާޅުވި އެވެ.
"މިތަނުގައި ވަކި ބައެއްގެ ބާރުގެ ދަށުގައި ޑޮލަރުގެ ކަޅު ބާޒާރު އޮތް އޮތުން ނިމުމަކަށް ގެނެސް ރައްޔިތުންނަށް ޑޮލަރުގެ މުއްސަނދިކަން ގެނެސްދިނުމަށް ނިންމީ،" ރައީސް މުއިއްޒު ވިދާޅުވި އެވެ.
ރާއްޖޭގައި މަސައްކަތް ކުރާ އަންޑޮކިއުމެންޓެޑް ވޯކާސްގެ ވާހަކަ ވެސް ރައީސް މިރޭގެ ޖަލްސާގައި ފާހަގަ ކުރެއްވި އެވެ. އެކަންތައް ހައްލު ކުރަން ތެދުވެވަޑައިގަތީ ރައްޔިތުންނަށްޓަކައި ކަމަށް ރައީސް މުއިއްޒު ވިދާޅުވި އެވެ.
"މިތަނުގައި ބޭރުގެ މީހުން ނުގަވައިދުން ގެނެސް އެތައް ޒަމާނެއްގެ އިލީގަލް ވޯކާސް އެތައް ލައްކައެއް އެބަތިބި. މި މައްސަލަ ހައްލު ކުރަން ވެސް ތެދުވީ އަޅުގަނޑުމެން އެހެންވެގެން،" އެމަނިކުފާނު ވިދާޅުވި އެވެ.
މިރޭގެ ޖަލްސާގައި ރައީސް ވަނީ، އެމަނިކުފާނުގެ ބައްޕާފުޅު ލިޔުއްވި "ދައުލަތާއި ވެރިންނާއި މަސްއޫލިއްޔަތު އަދި ކިޔަމަންވުމުގެ މަފްހޫމް" ފޮތުން ބައެއް ބައިތައް ވިދާޅުވެފަ އެވެ. އަދި ވިދާޅުވީ "އަޅުގަނޑުގެ ގައިޑްބުކަކީ މި ފޮތް" ކަމަށެވެ.
އެ ފޮތުގެ ބައެއް ވާހަކަތަކަށް އަޅި އަޅުއްވާލައްވައި ރައީސް ވިދާޅުވީ ވެރިކަމަކީ ވެރިކަން ލިބޭ މީހާއަށް ލިބޭ މޮޅެއް ނުވަތަ މުދާގަނޑެއް ނޫން ކަމަށެވެ. އޭގެ ބަދަލުގައި ވެރިކަމަކީ އަމާނާތެއް އަދި ވަރަށް ބޮޑު ޒިންމާއެއް ކަމަށް ރައީސް ވިދާޅުވި އެވެ.
"ވެރިކަމަކީ އެއްވެސް ހާލެއްގައި ލިބޭ މާބޮޑު މޮޅެއް ނޫން. އެއީކީ ވެރިކަން ކުރާ މީހާއަށް ލިބޭ މުދާގަނޑެއް ވެސް ނޫން. އެއާ ހިލާފަށް ވެރިކަމަކީ ވަރުގަދަ ޒިންމާއެއް، ވަރުގަދަ މަސްއޫލިއްޔަތެއް، ވަރަށް ބޮޑު އަމާނާތެއް،" ރައީސް ވިދާޅުވި އެވެ.
