އަންނަ އަހަރަށް ލަފާކޮށް ރައްޔިތުންގެ މަޖިލީހަށް ހުށަހަޅާފައިވާ ބަޖެޓުގައި ހިމަނަން ޖެހޭ ތަފުސީލުތައް ނެތުމުން ރައްޔިތުންގެ މަޖިލީހުގެ ބަޖެޓު ދިރާސާ ކުރާ ކޮމިޓީގައި ތިބޭ އިދިކޮޅު އެމްޑީޕީއަށް ނިސްބަތްވާ މެންބަރުން މިއަދު ކަންބޮޑުވުން ފާޅުކޮށްފި އެވެ.
އެހެން އަހަރުތަކާ ހިލާފަށް މި ފަހަރު ރައްޔިތުންގެ މަޖިލީހަށް ހުށަހަޅާފައިވާ ބަޖެޓުގައި، ސަރުކާރުން ހިންގަން ރާވާފައިވާ މަޝްރޫއުތަކާއި ހަރަދުތައް ކުރާނެ ގޮތުގެ ތަފުސީލުތައް ހިމަނާފައި ނުވެ އެވެ. މި ކަންބޮޑުވުން އާންމުންނާއި މެންބަރުންނާއި ކައުންސިލުތަކުން ވެސް ހިއްސާކުރެ އެވެ.
ބަޖެޓުގެ މަސައްކަތް ކުރިއަށް ގެންދާނެ ގޮތަކާ ގުޅޭ ގޮތުން ބަޖެޓު ދިރާސާކުރާ ކޮމިޓީގައި ކުރެވުނު މަޝްވަރާތަކުގައި، ހަނިމާދޫ ދާއިރާގެ މެންބަރު އަބްދުލްގަފޫރު މޫސާ ވިދާޅުވީ، ބަޖެޓު ހުށަހެޅިތާ ފަސް ދުވަސް ވެގެން ދިޔަ އިރު ވެސް ބަޖެޓު ފޮތެއް ނުލިބޭ ކަމަށެވެ. އަދި މި ބަޖެޓު ފޮތް ނުލިބިގެން އުޅޭ ސަބަބަކީ ކޮބައިތޯ ވެސް އޭނާ އެއްސެވި އެވެ.
"ބަޖެޓު ފޮތުގައި ހުންނާނެ ވަރަށް ބައިވަރު މައުލޫމާތު، ބަޖެޓުގެ ސޮފްޓް ކޮޕީގައި ނުުހުންނަ އެތައް ބައިވަރު މައުލޫމާތު. އެހެންމަ އަޅުގަނޑުގެ ވަރަށް ބޮޑަށް ކަންބޮޑުވުން އެބައޮތް. އަޅުގަނޑުމެންނަށް ކޮން ދުވަހަކުންތޯ ބަޖެޓު ފޮތް ލިބޭނީ. އެ ލިބުނީމައި އިތުރަށް ކުރިއަށް ދާން އެނގޭނީ. ކީއްވެގެންތޯ އަޅުގަނޑުމެންނަށް މި ބަޖެޓު ފޮތް ނުލިބިގެން މި އުޅެނީ؟" އޭނާ ވިދާޅުވި އެވެ.
މެންބަރު ގަފޫރަށް ރައްދު ދެއްވަމުން ބާރަށު ދާއިރާގެ މެންބަރު އިބްރާހިމް ސުޖާއު ވިދާޅުވީ، މިއީ ދިވެހި ތާރީހުގައި ވެސް ގާނޫނާ އެއް ގޮތްވާ ގޮތުގެ މަތިން ހުށަހެޅި ފުރަތަމަ ބަޖެޓު ކަމަށެވެ. އަދި ދައުލަތުގެ ހަރަދަށް ޒިންމާވުމުގެ ގާނޫނުގައި އޮންނަ ގޮތުން ނަމަ، ބަޖެޓު ތަފުސީލުތައް ހުށަހަޅަން އޮންނަނީ ބަޖެޓު ހުށަހެޅުމާއި ބަޖެޓުގެ އިބްތިދާއީ ބަހުސް ފެށުމާ ދެމެދުގެ ތާރީހެއްގައި ކަމަށް އޭނާ ވިދާޅުވި އެވެ.
"އަޅުގަނޑުމެން އިބްތިދާއީ ބަހުސް ފަށަން އޮތް ތާރީހެއް އަދި ކަނޑަނޭޅޭ. އޭގެ ކުރިއަށް ބަޖެޓު ފޮތް ލިބިގެން ދާނެ ކަމަށް އަޅުގަނޑުމެން މި ގަބޫލުކުރަނީ މިހާރު. އެހެންވީމަ ގާނޫނާ ހިލާފަށް އަދި ކަމެއް ހިނގައިގެންނެއް އަދި ކަންބޮޑުވެގެން އުޅޭ ހާލަތެއް ދިމާވެގެން އުޅޭ ކަމަކަށް އަޅުގަނޑަކަށް ގަބޫލެއް ނުކުރަން" ސުޖާއު ވިދާޅުވި އެވެ.
ސުޖާއުއަށް ފަހު ވާހަކަ ދައްކަވަމުން، ހިތަދޫ ދެކުނު ދާއިރާގެ މެންބަރު އިބްރާހިމް ނާޒިލު ވެސް ވަނީ ގަފޫރުގެ ކަންބޮޑުވުން ހިއްސާކުރައްވާ ކަމަށް ވިދާޅުވެފަ އެވެ. އެ ގޮތުން ބަހުސްއަށް އެޖެންޑާ ކުރެވޭ ދުވަހު މެންބަރުންގެ މޭޒު މަތީގައި ބަޖެޓު ފޮތް އޮތަސް، އެއަށް ފުރިހަމައަށް ތައްޔާރުވާން ފުރުސަތު ނުލިބޭ ކަމަށް ވިދާޅުވެ އެ ތަފުސީލުތައް ހޯދައިދޭން އޭނާ ވަނީ ކޮމިޓީގެ މުގައްރިރަށް ގޮވާލައްވާފަ އެވެ.
"ފުރަތަމަ ބަޖެޓު ހުށަހެޅިގެން ދިޔަ ދުވަހު، އަޅުގަނޑާ ދިމާވި ފިނޭންސް މިނިސްޓްރީގެ ބޭފުޅުން. ޕްރިންޓަށް ދީފައޭވީ. ވަރަށް އަވަހަށް ލިބޭނެ ދެ ތިން ދުވަހުގެ ތެރޭގައި، ބައެއް ބޭފުޅުން ވިދާޅުވި. އެ ދެ ތިން ދުވަސް ވެސް ގޮސްފި." އޭނާ ފާހަގަކުރެއްވި އެވެ.
މެންބަރުންގެ ކަންބޮޑުވުންތަކާ ގުޅިގެން ކޮމިޓީގެ މުގައްރިރު، ފުވައްމުލަކު މެދު ދާއިރާގެ މެންބަރު އަލީ ފަޒާދު ވިދާޅުވީ ފަހަރެއްގައި މިއަދު ނޫނީ މާދަމާ ވެސް ބަޖެޓު ފޮތް ލިބިގެން ދާނެ ކަމަށެވެ. އަދި ބަޖެޓުގެ މަސައްކަތް ކުރިއަށް ދާނީ ރައްޔިތުންގެ މަޖިލީހުގެ ގަވާއިދުގައި އޮންނަ ގޮތުގެ މަތިން މެންބަރުންނާ ހުރިހާ މައުލޫމާތެއް ހިއްސާކުރެވިގެން ކަމުގެ ޔަގީންކަން އޭނާ ދެއްވި އެވެ.
އަންނަ އަހަރަށް ލަފާކޮށް ރައްޔިތުންގެ މަޖިލީހަށް ހުށަހަޅާފައި ވަނީ 55 ބިލިއަން ރުފިޔާގެ ބަޖެޓެކެވެ. ކޮމިޓީން މިއަދު ފާސްކުރީ، ބަޖެޓު ނިންމަން ލިބޭ އެންމެ ފަހު ތާރީހު ކަމުގައިވާ މި މަހުގެ 20، ގެ ކުރިން ބަޖެޓުގެ މަސައްކަތް ނިންމާލުމަށެވެ.
