ތިލަމާލެ ބުރިޖުގެ ބައެއް މަސައްކަތްތައް ކުރިއަށް ދަނީ ސަރުކާރުން ބޭނުންވާ ބާރުމިނުގައި ނޫން ކަމަށާއި މަސައްކަތް ލަސްވަނީ ކަނޑު ގަދަވުން ފަދަ ކަންކަން ދިމާވާތީ ކަމަށް ބުނެ އެ މަޝްރޫއު ކުރިއަށް ގެންދާ އެފްކޮންސްއިން ސަބަބު ދައްކަން މަސައްކަތް ކުރާ ކަމަށް އިންފްރާސްޓްތަކްޗާ މިނިސްޓަރު އަބްދުﷲ މުއްތަލިބު ވިދާޅުވެއްޖެ އެވެ.
ރައީސް އޮފީހުގައި މިއަދު އޮތް ނޫސްވެރިންގެ ބައްދަލުވުމެއްގައި ވާހަކަ ދައްކަވަމުން މުއްތަލިބު ވިދާޅުވީ ބުރިޖު މަޝްރޫއުގެ 42.82 ޕަސެންޓު މަސައްކަތް ނިމިފައިވާ ކަމަށެވެ. ނަމަވެސް ދިވެހި ސަރުކާރުން ބޭނުންވާ ބާރުމިނުގައި ބުރިޖުގެ މަސައްކަތް ނުދާ ކަމަށް އޭނާ ވިދާޅުވި އެވެ. މިސާލެއްގެ ގޮތުގައި އޭނާ ފާހަގަ ކުރެއްވީ ޑީޕް ސީ ޕައިލިންގެ މަސައްކަތެވެ.
"އަޅުގަނޑު ފާހަގަ ކޮށްލަން ބޭނުންވޭ، މޫސުމީ ގޮތުން މި އަންނަ ކަންތައްތަކާ ގުޅިގެން ކަނޑު ގަދަވުމާއި މިފަދަ ކަންތައްތަކާ ގުޅުވާލައިގެން ކޮންޓްރެކްޓަރުގެ ފަރާތުން ބައެއް ފަހަރު ސަބަބު ދައްކައިގެން ބައެއް މަސައްކަތްތައް ލަސްވާކަން، މާބޮޑު ތަނެއް ލަސްކަމަށް ނުފެނުން ނަމަވެސް ބައެއް ކްރިޓިކަލް މަސައްކަތްތައް އަޅުގަނޑުމެން ބޭނުންވާ ސްޕީޑުގައި ކުރިއަށް ނުދާކަން އަޅުގަނޑު ފާހަގަކޮށްލަން،" މުއްތަލިބު ވިދާޅުވި އެވެ.
މާލެ އާއި ތިލަފުށްޓާ ދެމެދު ބުރިޖެއް އެޅުމުގެ މަސައްކަތް، ދެ މަރުހަލާ އަކަށް ބަހާލައިގެން ކޮށް ނިންމާ ގޮތަށް އިންޑިއާގެ އެފްކޮންސްއާ ހަވާލު ކުރީ ސެޕްޓެމްބަރު 16، 2021 ގަ އެވެ. އޭރު އެއްބަސްވެފައި އޮތީ މާލެއިން ގުޅީފަޅާ ހަމައަށް 27 މަސްދުވަސް ތެރޭގައި އަދި ގުޅީފަޅުން ތިލަފުށްޓާ ހަމައަށް 32 މަސްދުވަސް ތެރޭގައި ނިންމާ ގޮތަށެވެ. މުޅި ބުރިޖުގެ މަސައްކަތް ނިންމަން ޖެހޭނެ ކަމަށް ކަނޑައަޅާފައި އޮތީ މެއި 17، 2024 އެވެ.
ނަމަވެސް ކުރީގެ ސަރުކާރާ އެފްކޮންސްއާ ދެމެދު ފަހުން އެކުލަވާލައިލި ސަޕްލިމެންޓަރީ އެއްބަސްވުމުގައި ވާގޮތުން މިހާރު ފުރަތަމަ ފިޔަވަހީގެ މަސައްކަތް ނިންމުމުގެ މުއްދަތު ވަނީ 51.5 މަހަށް އިތުރު ކޮށްދީފަ އެވެ. އަދި ދެވަނަ ފިޔަވަހީގެ މަސައްކަތް ނިންމުމުގެ މުއްދަތު 45 މަސްދުވަހަށް ވަނީ އިތުރު ކޮށްދީފަ އެވެ.
އެހެންކަމުން މުޅި ބުރިޖުގެ މަސައްކަތް ނިމޭނެ ކަމަށް މިހާރު ކަނޑައަޅާފައި ވަނީ ސެޕްޓެމްބަރު 20، 2026 އެވެ.
މުއްތަލިބު ވިދާޅުވީ އެ މުއްދަތަކީ އެފްކޮންސް އިން ހުށަހެޅި ގޮތަށް އެއްބަސްވެފައި އޮތް މުއްދަތެއް ކަމަށާއި ލަސްވާ ސަބަބުގެ ގޮތުގައި ދައްކާ އުޒުރުތައް ސަރުކާރުން ބަލައި ނުގަންނަ ކަމަށެވެ. އަދި ބުރިޖު ނިންމަން މިހާރު އޮތް މުއްދަތު އެ ސަބަބުތަކަށް ރިއާއަތްކޮށް އިތުރު ކޮށް ނުދެވޭނެ ކަމަށް މުއްތަލިބު ވިދާޅުވި އެވެ.
"ކޮންޓްރެކްޓަރާ އަޅުގަނޑުމެން މިހާރު ފާހަގަކޮށްފައި ވާނެ އަޅުގަނޑުމެން ގަބޫލު ނުކުރާކަން ކަނޑުގަދަވެގެން މިއަންނަ ކަމަކީ އެ ބޭފުޅުންނަށް ސަބަބެއްގެ ގޮތުގައި ދައްކައިގެން އިތުރު މުއްދަތެއް ހޯދުމަށް އޮތް ފުރުސަތެއް ކަމަކަށް،" މުއްތަލިބު ވިދާޅުވި އެވެ.
އިންޑިއާ ސަރުކާރާއި އެފްކޮންސް އާއެކު ވެސް މަސައްކަތް ކުރަމުން ދަނީ މަސައްކަތްތައް އަވަސްކޮށް، ޝެޑިއުލާ އެއްގޮތަށް ބުރިޖުގެ މަސައްކަތްތައް ނިންމުމަށް ކަމަށް އޭނާ ވިދާޅުވި އެވެ.
