ރަސްމާލޭ ވޯޓާފްރަންޓް އެންޑް މެރީނާ މަޝްރޫއު ހިންގާ ޔޫއޭއީގެ އީގަލް ހިލްސް ކުންފުނިން ހުޅުމާލޭގައި ތަރައްގީކޮށްދޭ 5000 ހައުސިން ޔުނިޓަށް ދައުލަތުގެ ބަޖެޓުން ފައިސާ ދައްކަން ނުޖެހުނަސް، އެއީ ދައުލަތަށް ލިބެން އޮތް އާމްދަނިއަކުން އަގު ދައްކާ ގޮތަށް އަޅާ ފްލެޓުތަކެއް ކަން އެނގިއްޖެ އެވެ.
ރަސްމާލޭގައި ހިންގާ ޕްރޮޖެކްޓު އިއުލާންކުރި ދުވަހުން ފެށިގެން ސަރުކާރުން އަންނަނީ، އީގަލް ހިލްސްއިން އަޅައިދޭ ފްލެޓުތަކުގެ ވާހަކަ ދައްކަމުންނެވެ.
ސަރުކާރުން ބުނީ އެ ޕްރޮޖެކްޓު ހިންގަނީ ކޮންޓްރެކްޓާ ފައިނޭންސް އުސޫލުން، އެ ކުންފުނީގެ އަމިއްލަ ހަރަދުގައި ކަމަށެވެ. އަދި، ރަސްމާލޭގެ އެއްވެސް މަސައްކަތެއް ފެށުމުގެ މި މަސައްކަތް ފަށަން އެއްބަސްވެފައިވާ ކަމަށް ވެސް ސަރުކާރުން ބުންޏެވެ.
މިކަމާ ގުޅިގެން އަދަދު ނޫހުން ފިނޭންސް މިނިސްޓްރީގައި ސުވާލުކުރުމުން އެ މިނިސްޓްރީން ވެސް ބުނީ، މިއީ ދައުލަތުގެ ބަޖެޓުން އެއްވެސް އިރެއްގައި އެއްވެސް ފައިސާއެއް ނުދައްކާ ގޮތަށް ހިންގާ މަޝްރޫއެއް ކަމަށެވެ. އަދި މި މަޝްރޫއާ ގުޅިގެން ސަރުކާރުގެ ދަރަނި އިތުރު ނުވާނެ ކަަމަށާއި، ގެރެންޓީއެއް ހިސާބު ވެސް ދޭން ނުޖެހޭނެ ކަމަށް ބުންޏެވެ.
މިހެން ނަމަވެސް، މިއީ ހިލޭ އަޅައިދޭ ފްލެޓުތަކެއް ނޫން ކަން ވަނީ އެނގިފަ އެވެ. އެކަން އެނގުނީ ރަސްމާލޭ ޕްްރޮޖެކްޓާ ގުޅޭ އިތުރު ތަފުސީލުތައް ހިއްސާކުރައްވަމުން ހައުސިން މިނިސްޓަރު އަބްދުالله މުއްތަލިބު ލިންކްޑްއިންގައި ޝާއިއުކުރެއްވި ލިޔުމުންނެވެ.
މުއްތަލިބުގެ ގަލަމުން ރަސްމާލެ ވޯޓާފްރަންޓް މަޝްރޫއުގެ އަލިފުން ޔާއަށް
ރަސްމާލެ ވޯޓާފްރަންޓް މަޝްރޫއަކީ ޔޫއޭއީގެ އީގަލް ހިލްސް ކުންފުނިން 12 ބިލިއަން ޑޮލަރު އިންވެސްޓުކޮށްގެން. މިނިސްޓަރު މުއްތަލިބު ހާމަކުރެއްވި ގޮތުގައި، މި މަޝްރޫއު އެކުލަވާލާފައިވަނީ ބިމު ކުލީގެ ބަދަލުގައި ޓެކުހާއި އެހެނިހެން ގޮތްގޮތުން ދިގު މުއްދަތަކަށް އާމްދަނީ ވަންނަ ގޮތަށް.
އެ ލިޔުމުގައި މި 5000 ހައުސިން ޔުނިޓުގެ ބައެއް މައުލޫމާތު ހިއްސާކުރައްވަމުން މުއްތަލިބު ވިދާޅުވީ މިއީ 400-500 މިލިއަން ޑޮލަރު ހަރަދުކޮށްގެން އެ ކުންފުނިން ތަރައްގީކުރާ ތިން ކޮޓަރީގެ އެޕާޓުމަންޓުތަކެއް ކަމަށެވެ. އަދި، މިއީ ސަރުކާރުގެ ހިސާބު ފޮތަށް އެއްވެސް ދަރަންޏެއް އިތުރުނުވާ ގޮތަށް، ސޮވެރިން ގެރެންޓީއެއް ވެސް ނުދީ ހިންގާ ޕްރޮޖެކްޓެއް ކަމަށް އޭނާ ވިދާޅުވި އެވެ.
މި ފްލެޓުތައް ތަރައްގީކުރަން ސަރުކާރުން އެއްވެސް ފައިސާއެއް ދައްކަން ނުޖެހުނަސް، ރަސްމާލޭގައި ތަރައްގީކުރާ ތަންތަނުން ސަރުކާރަށް މުސްތަގުބަލުގައި ލިބޭ ގޮތަށް އޮތް 10 ޕަސެންޓުން މި ފްލެޓުތަކުގެ އަގު ކެނޑޭނެ ކަމަށް މުއްތަލިބު ވިދާޅުވި އެވެ.
"އެކުއިޒިޝަން ކޮސްޓެއް ނެގުމުގެ ބަދަލުގައި އާމްދަނީގެ 10 ޕަސެންޓު ނަގަން އެއްބަސްވެފައި ވާތީ، މި ގެތަކުގެ ހަރަދު ކެނޑިގެންދާނީ ސަރުކާރަށް ލިބޭ އާމްދަނީގެ ހިއްސާއިން ލިބެމުންދާ ވަރަކަށް - އެއީ ދައުލަތުގެ ބަޖެޓުންނާއި ލޯނު ނަގައިގެން ކުރާކަމެއް ނޫން،" މުއްތަލިބު ވިދާޅުވި އެވެ.
މުއްތަލިބު މިހެން ވިދާޅުވެ މި ޕްރޮޖެކްޓު ފަރުމާކޮށްފައިވާ ގޮތް ދިފާއުކުރެއްވި ނަމަވެސް، ފާޑުކިޔާ މީހުން ބުނަނީ ފަހުން އަގު ދައްކާ ކޮންމެ އެއްޗަކީ ދަރަނި ކަމަށެވެ. އަދި، މި ހައުސިން ޔުނިޓުތަކުގެ ކަންކަމުގައި ދިވެހި ސަރުކާރުން އެއްބަސްވެފައިވާ ކަންކަން ތަފުސީލުކޮށް ހާމަކުރަން އެއް ބަޔަކު ވަނީ ގޮވާލާފަ އެވެ.
އޭގެ އިތުރުން، ބިން ހޯދަން އެއްވެސް އަގެއް، ބިން ބޭނުންކުރާ މުއްދަތުގެ ތެރޭގައި ކުއްޔެއް ނުނަގާ އެ ކުންފުންޏަށް ބޮޑު ސަރަހައްދެއް ހިލޭ ދޫކޮށްލަނީ އެ 10 ޕަސެންޓު ލިބޭތީ ކަމަށް ބުނެފައި، އޭގެން ބައެއް ދޫކޮށްލުން ދެކޮޅު ނުޖެހޭ ކަމަށް ވެސް ގިނަ ބަޔަކު އަންނަނީ ބުނަމުންނެވެ.
ސަރުކާރުން އަންދާޒާ ކުރަނީ މި ތަނުން ތަރައްގީކުރާ ތަންތަން ވިއްކައިގެން، ނޫނީ މި ތަން ތަރައްގީކުރުމުގެ މުއްދަތުގެ ތެރޭގައި ސަރުކާރަށް 11 ބިލިއަން ޑޮލަރަށް ވުރެ ބޮޑު އާމްދަނީއެއް ލިބޭނެ ކަަމަށެވެ. މިއީ 10 އަހަރު ދުވަހުގެ ތެރޭގައި ސަރުކާރަށް ލިބޭނެ ކަމަށް ބުނާ އަދަދެކެވެ.
އީގަލް ހިލްސްއިން ހުޅުމާލޭގައި ފްލެޓު އަޅަނީ ކޮންތަނެއްގައި ކަމެއް އަދި އިމާރާތްކުރަނީ ކޮން ގިންތިއެއްގެ ފްލެޓުތަކެއް ކަމެއް ނޭނގެ އެވެ. މި ޕްރޮޖެކްޓުގެ ކޮންމެ ޔުނިޓަކަށް ޖެހޭ އަގުން ބެލެވެނީ މިއީ ސޯޝަލް ހައުސިން ފަންތިއަށް ވުރެ މަތީގެ، މިޑްރޭންޖު ފްލެޓުތަކެއް ކަމަށެވެ.
