ވަރަށް ގިނަ މަޝްރޫއުތައް ކުރިއަށްނުދާ ކަމަށް ކޮންސްޓްރަކްޝަން މިނިސްޓަރު އަބްދުﷲ މުއްތަލިބު އެއްބަސްވެވަޑައިގެން އޭގެ ސަބަބެއްގެ ގޮތުގައި ކުރީ ސަރުކާރުން ހެދި ކަމަށް ބުނާ ގޯސްތަކުގެ ވާހަކަ ދައްކަވައިފި އެވެ.
ރައީސުލްޖުމްހޫރިއްޔާގެ އޮފީހުގައި ބޭއްވި ނޫސްވެރިންގެ ބައްދަލުވުމެއްގައި މުއްތަލިބު ވިދާޅުވީ، ވަރަށް ގިނަ ޕްރޮޖެކްޓުތައް ނުހިނގާ މަންޒަރު ފެންނާނެ ކަމަށާއި އޭގެ ސަބަބަކީ ކުރީ އެ ޕްރޮޖެކްޓުތައް ހިންގަން ބޭނުންވާ ފައިސާ ކުރީ ސަރުކާރުން ބަޖެޓު ނުކުރުން ކަމަށެވެ.
"ސުވާލަކީ ކީއްވެތޯ ޕްރޮޖެކްޓުތައް ނުހިނގަނީ؟ އާދެ، ވަރަށް ބައިވަރު ޕްރޮޖެކްޓުތައް އެބަ ހިނގާ. އެހެން ނަމަވެސް ވަރަށް ބައިވަރު ޕްރޮޖެކްޓުތައް ނުހިނގާ ތަން ވެސް ފެންނާނެ. އޭގެ ސާފު ޖަވާބަކީ، ސޮއިކޮށްފައި ހުރި މަޝްރޫއުތައް ކުރިއަށް ގެންދިޔުމަށް ބޭނުންވާ މި ދެންނެވި ގޮތަށް ބައިކުޅަބަޔަށް ބަޖެޓުގައި ހިމެނިފައި އޮތުން،" މުއްތަލިބު ވިދާޅުވި އެވެ.
ކޮންސްޓްރަކްޝަން މިނިސްޓަރު ވިދާޅުވީ ވީހާ ވެސް ޕްރޮޖެކްޓުތަކެއް ކުރިއަށް ގެންދިއުމަށް އެ މިނިސްޓްރީން މަސައްކަތް ކުރި ކަމަށެވެ. ނަމަވެސް އެ މިނިސްޓްރީގައި ޕެންޑިން ބިލުތަކެއް ހުރުމުން އެކަމަށް ދަތިތަކެއް ކުރިމަތިވި ކަމަށް މުއްތަލިބު ވިދާޅުވި އެވެ.
"އަޅުގަނޑުމެންނަށް ހަރަދު ކުރެވެން އޮތީ ގާނޫނުގައިވާ ގޮތުން ބަޖެޓު ކަނޑައަޅާފައިވާ އަދި އެ ފައިސާ ލިބޭ މިންވަރަކަށް ބާލަފަ. އެހެން ނަމަވެސް ރައީސުލްޖުމްހޫރިއްޔާގެ އިރުޝާދުގެ ދަށުން އަޅުގަނޑު މަސައްކަތް ކުރީ ވީހާ ވެސް ގިނަ މަޝްރޫއުއެއް ހުއްޓާނުލައި ކުރިއަށް ގެންދިޔުމަށް. މިކަމުގައި ދެން ކުރިމަތިވި އެންމެ ބޮޑު ދައްޗަކީ ދައުރު ފެށުނު އިރު ކޮންސްޓްރަކްޝަން މިނިސްޓްރީގައި ޕެންޑިން ބިލުގެ ގޮތުގައި 1.72 ބިލިއަން ރުފިޔާ ބިލުތައް ހުރުން،" އޭނާ ވިދާޅުވި އެވެ.
ޕްރޮޖެކްޓުތައް ނުހިނގާ ކަމަށް މިނިސްޓަރު އެއްބަސްވިއިރު، ތަރައްގީގެ އެއްވެސް މަޝްރޫއުއެއް ހުއްޓާނުލައި ކުރިއަށް ގެންދިޔުމަކީ ރައީސް ޑރ. މުހައްމަދު މުއިއްޒުގެ ރިޔާސީ ވައުދެކެވެ.
"އަޅުގަނޑުމެންނަކީ ތަރައްގީގެ މަޝްރޫއުތައް ހުއްޓާލާ ބައެއް ނޫން. ރަށުގެ ރައްޔިތުންނަށް ފައިދާވާ ގޮތަށް ހިނގާ އެއްވެސް ކަމެއް، ރައްޔިތުން ބޭނުންވާ ގޮތަށް ހިނގާ އެއްވެސް ކަމެއް ހުއްޓައެއްނުލާނަން،" އޯގަސްޓު 24، 2023، ގައި ނ. ވެލިދޫގައި ވާހަކަ ދައްކަވަމުން ރައީސް މުއިއްޒު ވިދާޅުވި އެވެ.
ކުރީ ސަރުކާރުން ފަށާފައި އޮތް ޕްރޮޖެކްޓުތައް މި ސަރުކާރުން ހުއްޓައިލި އިރު، ސަރުކާރުން ކުރިއަށް ގެންދާ މަޝްރޫއުތަކުގެ އަޕްޑޭޓު އާންމުންނަށް ބެލޭނެ ގޮތަށް ކުރިން ހަމަޖައްސާފައި އޮތް އައިލްސް ވެބްސައިޓު ވަނީ ޑައުންކޮށްލައިފަ އެވެ.
