މާލެއަށް ޒަމާނުއްސުރެ ދިމާވެފައިވާ ފެންބޮޑުވުމުގެ މައްސަލަ ހައްލުކުރުމަށް ޗައިނާގެ ސަރުކާރުން ހިންގާ މަޝްރޫއުގެ ދަށުން މާލޭގެ މަގުތައް ހަދާނީ މުޅި ރަށް ސާވޭކޮށް، ޑިޒައިންކޮށްގެން ކަމަށް ކޮންސްޓްރަކްޝަން މިނިސްޓަރު އަބްދުﷲ މުއްތަލިބު ވިދާޅުވެއްޖެ އެވެ.
މިހާރު މާލެއަށް ކުރަމުންދާ ވިއްސާރައާއެކު މާލޭގައި ވެސް އަނެއްކާވެސް ފެންބޮޑުވެފައިވަނިކޮށް، މިއަދު ސޯޝަލް މީޑިއާގައި ކުރެއްވި ޕޯސްޓެއްގައި ވިދާޅުވީ، މާލެއަށް ދިމާވެފައިވާ ފެން ބޮޑުވުމުގެ މައްސަލަ ހައްލުކުރުމަށް ދިމާވެފައިވާ އެންމެ ބޮޑު ގޮންޖެހުމަކީ މާލޭގެ މަގުތައް ހެދުމުގައި ބިމަށް ފެން ހިނދޭ ގޮތަށް ކޮށްފައިވާ ޑިޒައިނާ އެއްގޮށް މަސައްކަތް ނުކުރުން ކަމަށެވެ.
މި ސަރުކާރުން މިހާރު އިއުލާނުކޮށްފައިވާ މާލެ އަދި ވިލިމާލޭގެ މަގު ހެދުމުގެ މަޝްރޫއުގެ ދަށުން އެންމެ ބޮޑު އިސްކަމެއް ދޭނީ ފެން ބޮޑުވުމުގެ މައްސަލައަށް ދާއިމީ ހައްލެއް ހޯދުމަށް އެކަށޭނަ ސްޓޯމްވޯޓާ މެނޭޖްމަންޓް ސިސްޓަމެއް ގާއިމުކުރުމަށް ކަމަށްވެސް ޕީޕީއެމްގެ ފުރަތަމަ ވެރިކަމުގައި ހައުސިން މިނިސްޓްރީގެ އިސް މަގާމެއްގައި ހުންނެވި، ކޮންސްޓްރަކްޝަން މިނިސްޓަރު ވިދާޅުވި އެވެ.
"މި ޕްރޮޖެކްޓަކީ މުޅި މާލެ ސާވޭ ކުރެވި ޑިޒައިން ކުރެވިގެން ކުރިއަށް ގެންދެވޭނެ މަޝްރޫއަކަށްވާތީ، މަޝްރޫއު ނިމޭއިރު މާލެއަށް ދިމާވެފައިވާ ފެން ބޮޑުވުމުގެ މައްސަލަ އެއްކޮށް ހައްލުވެގެންދާނެ،" މުއްތަލިބު ވިދާޅުވި އެވެ.
ވެރިރަށް މާލޭގެ މަގުތައް ހެދުމުގެ މަޝްރޫއަކީ ޗައިނާގެ ހިލޭ އެހީގެ ދަށުން ހިންގާ މަޝްރޫއެކެވެ. މި މަޝްރޫއުގެ މަޝްރޫއުގެ ފީސިބިލިޓީ ސްޓަޑީއަށް ބޭނުންވާ ފައިސާ ހޯދަން ޗައިނާ އެއިޑާއެކު ލެޓާސް އޮފް އެކްސްޗޭންޖް (އެލްއޯއީ) ގައި ސޮއިކޮށްފަ އެވެ. މި އަހަރު ޖެނުއަރީ މަހު މުއްތަލިބު ވަނީ މަޝްރޫއުގެ އަގު 100 އެތައް މިލިއަން ޑޮލަރަކަށް އަރާނެ ކަމަށްވެސް ވިދާޅުވެފަ އެވެ.
މިހާރު ކުރަމުންދާ ވިއްސާރައާ ގުޅިގެން ރައީސް ޑރ. މުހައްމަދު މުއިއްޒު ކުރެއްވި ޕޯސްޓުގައިވެސް ވިދާޅުވީ، ފެންބޮޑުވުމުގެ މައްސަލަ ހައްލުވާނީ މަގުތައް ތަރައްގީ ކުރުމަށް ހިންގަން ރާވާފައިވާ މަޝްރޫއު ނިމުމުން ކަމަށެވެ.
