ސަރުކާރުގެ މަސް ކުންފުނި، މިފްކޯއިން މަސްވެރިންނަށް ދޭންޖެހޭ ފައިސާ ނުދޭތީ އައްޑޫ ސިޓީ ހުޅުމީދޫ މިފްކޯ ބަނދަރުގައި މަސްވެރިން މިއަދު ވެސް މުޒާހަރާކުރަން ފަށައިފި އެވެ.
އިއްޔެ ހަވީރުން ފެށިގެން މަސްވެރިން ކުރަމުންދާ މުޒާހަރާއާ ގުޅިގެން މީޑިއާތަކަށް ފޮނުވި މެސެޖެއްގައި ފުލުހުން ބުނެފައިވަނީ، އެ ސަރަހައްދުގައި ގާތްގަނޑަކަށް 80 މަސްވެރިން މުޒާހަރާކުރަމުން ގެންދާކަމަށެވެ.
އެގޮތުން މިއަދު 12:00 ވަންދެން އެ މުޒާހަރާ ކުރިއަށް ގެންދިއުމަށް މަސްވެރިން ނިންމާފައިވާކަމަށް ފުލުހުން ބުނެ އެވެ.
މުޒާހަރާގެ ބައިވެރިން ގޮވާލަމުން ދަނީ މަސްވެރިންނަށް ދޭންޖެހޭ ފައިސާ ވަގުތުން ވަގުތަށް ދިނުމަށާއި ކުރިއަށް އޮތް ތަނުގައި ކިރުވާ މަހަށް ކޮންމެ 15 ދުވަހަކުން ފައިސާ ދިނުމަށް ސަރުކާރުން އެއްބަސްވުމަށެވެ.
އެ ކަންކަމާ ގުޅޭ ގޮތުން އެމީހުންނާ ވާހަކަ ދައްކަން ކަމާގުޅޭ އިސް ފަންތީގެ ބޭފުޅަކު މުޒާހަރާގެ ބައިވެރިންގެ ގާތަށް ވަޑައިގަތުމަށް ވެސް މުޒާހަރާގެ ބައިވެރިން ދަނީ ގޮވައިލަމުންނެވެ.
"މި މުޒާހަރާގައި އެކަށީގެންވާ ޖަވާބެއް ނުދެވޭނަމަ ހުރިހާ ސްޓާފުން ވެސް ފެކްޓްރީން ބޭރުކޮށްލާނެ ކަމަށާއި, ބަދިގޭގައި ކައްކަން ހުރަސް އަޅާނެ ކަމަށް މަސްވެރިންގެ ތެރެއިން ބަޔަކު ބުނެފައިވާ ކަމަށް," ފުލުހުން މީޑިއާތަކަށް ފޮނުވި މެސެޖުގައި ލިޔެފައިވެ އެވެ.
"އަހަރުމެން މިއައީ އަހަރުމެންގެ ހައްގު ހޯދަން. އަހަރުމެން މިއައީ އެއްގޮތަކަށް ވެސް ފުލުހުންނާއި ސަރުކާރާ ކުރިމަތިލާކަށް ނޫން. ތިން މަސް މިވަނީ އަހަރުމެންނަށް ލާރިއެއް ނުލިބި. އަހަރުމެން އާއިލާތަށް އެ ތިބީ ބިކަވެފައި. ކަރަންޓު ބިލު ނުދެއްކި ދަރަނިވެރިފައި މިތިބީ," މަތީގައި އިން ވީޑިއޯގައި އެ ތަނުގައި ހުރި މަސްވެރިޔަކު އެ މީހުންގެ ހާލަތު ބަޔާންކޮށްދެ އެވެ.
މިއަހަރުގެ ތެރޭ ކޫއްޑޫގައި ކުރި މުޒާހަރާގައި ވެސް އެތަނުގެ އޮޕަރޭޝަންތައް މަސްވެރިން ހުއްޓުވި އެވެ.
މަސްވެރިންނަށް ދޭންޖެހޭ ފައިސާ ނުލިބިގެން އައްޑޫ ސިޓީގައި މަސްވެރިން މުޒާހަރާ ކުރަން ފަށާފައިވާއިރު، މިމަހުގެ ކުރީކޮޅު މާލޭގައާއި ގދ. މަޑަވެލީގައި ވެސް މަސްވެރިން ވަނީ މުޒާހަރާ ކޮށްފަ އެވެ. އެގޮތުން މަޑަވެލީގައި ކުރިއަށް ގެންދިޔަ މުޒާހަރާގައި ގޮވައިލީ މަސްވެރިންނަށް ނުދީ ހުރި ފައިސާ ދިނުމަށެވެ.
އެ ދެ މުޒާހަރާއަށް ފަހު ސަރުކާރުން ވަނީ މަސްވެރިންނަށް ދޭންޖެހޭ 80 މިލިއަން ރުފިޔާގެ ތެރެއިން 46 މިލިއަން ރުފިޔާ އީދުގެ ކުރިން މަސްވެރިންނަށް ދޫކޮށްފަ އެވެ.
މަސްވެރިން ކިރާ މަހަށް 48 ގަޑިއިރު ތެރޭގައި ފައިސާ ދައްކާ ނިޒާމެއް ގާއިމު ކުރުމަކީ ރައީސް ޑރ. މުހައްމަދު މުއިއްޒުގެ ވައުދެކެވެ.
ފިޝަރީޒް މިނިސްޓްރީން އެންމެފަހުން ބޭއްވި ނޫސްވެރިންގެ ބައްދަލުވުމުގައި މިނިސްޓަރު އަހުމަދު ޝިޔާމް ވިދާޅުވީ މަސްވެރިންނަށް ދޭންޖެހޭ ފައިސާ ހޯދުމަށް މިފްކޯއާއި ސަރުކާރުން މަސައްކަތް ކުރަމުން އަންނަ ކަމަށާއި "މާލީ ގޮތުން ނޭވާ ލާނެ ގޮތްތައް" ހޯދަން ފިނޭންސް މިނިސްޓަރު ވެސް މަސައްކަތް ކުރައްވަމުން ގެންދަވާ ކަމަށެވެ.
