ވަގަށް ނަގާފައިވާ ގިނަ އަދަދެއްގެ މުދާ އަގުހެޔޮކޮށް ގަނެފައިވާ ކަމަށް ތުހުމަތު ކުރެވޭ މައްސަލައެއްގައި މީހަކު ހައްޔަރުކޮށްފިއެވެ.
މި މައްސަލައާ ގުޅިގެން ފުލުހުން ހައްޔަރުކޮށްފައިވަނީ ސ. މަރަދޫ، ފާގަތި، އުމުރުން 58 އަހަރުގެ އަބްދުﷲ އުމަރެވެ.
އޭނާ ހައްޔަރުކުރީ ވަގަށް ނަގާފައިވާ ތަކެތި އަގުހެޔޮކޮށް ގަންނަ މީހުން ހޯދުމަށް ފުލުހުން ކުރިއަށްގެންދިޔަ ހާއްސަ އޮޕަރޭޝަނެއްގައި މި މަހުގެ 5 ވަނަ ދުވަހު ކަމަށް ފުލުހުން ބުންޏެވެ.
އަބްދުﷲ އުމަރު ދިރިއުޅޭ ގެ ބަލައި ފާސްކުރިއިރު، ވަގަށް ނަގާފައިވާ ތަކެތި ކަމަށް ބެލެވޭ ޖުމްލަ 65 އައިޓަމެއް ފުލުހުން ވަނީ އެ ގޭގެ ތެރެއިން ހޯދައި، ފުލުހުންގެ ބެލުމުގެ ދަށަށް ގެންގޮސްފަ އެވެ.
ފުލުހުން ބުނި ގޮތުގައި އޭނާގެ ގެއިން ފެނުނު ތަކެތީގެ ތެރޭގައި ކަރަންޓު ސާމާނާއި، ކާޗާ މެޝިނާއި، ސްޕީކަރާއި، ބޮކީގެ އިތުރުން ގޭތެރޭގައި ބޭނުންކުރާ އެކި ބާވަތުގެ ސާމާނު ހިމެނެ އެވެ.
މިތަކެތީގެ ތެރެއިން ބައެއް ތަކެތި މިހާރު ވަނީ އޭގެ ވެރިފަރާތްތަކާ ހަވާލުކޮށްފަ އެވެ. އަދި ބާކީ ހުރި ތަކެތީގެ ވެރިފަރާތްތައް ދެނެގަތުމުގެ މަސައްކަތް ފުލުހުން ދަނީ ކުރަމުންނެވެ.
މި މައްސަލައާ ގުޅިގެން އަބްދުﷲ އުމަރުގެ ޝަރީއަތް ނިމެންދެން ބަންދުގައި ބެހެއްޓުމަށް ކޯޓުން ވަނީ އަމުރުކޮށްފަ އެވެ.
މި މައްސަލައާ ގުޅިގެން ފުލުހުން ވަނީ އާންމު ރައްޔިތުންނަށް މުހިންމު އިލްތިމާސެއް ކޮށްފައެވެ. އެގޮތުން ވަގަށް ނަގާފައިވާ ތަކެތި ނުގަތުމަށާއި، ބާޒާރުގެ އަގަށްވުރެ އާދަޔާ ހިލާފަށް ހެޔޮ އަގުގައި ތަކެތި ވިއްކާނަމަ އެކަމަށް ސަމާލުވުމަށް ފުލުހުން ވަނީ އެދިފަ އެވެ. އަދި މިފަދަ ޝައްކުކުރެވޭ އެއްވެސް ކަމެއް ފާހަގަކުރެވިއްޖެނަމަ، ލަސްނުކޮށް ފުލުހުންނަށް ރިޕޯޓްކުރުމަށް ވެސް ވަނީ އިލްތިމާސްކޮށްފަ އެވެ.
