މަސްވެރިކަމުގެ ސިނާއަތުގެ ހަރަކާތްތެރިކަން ވަރަށް ބޮޑަށް ހީނަރުވެ، މި އަހަރުގެ ފުރަތަމަ ބައިކައި ދޯނި ފަހަރުން މަސް ކިރުވި މިންވަރު 60 ޕަސެންޓު ދަށްވެފައިވާ ކަމަށް ކަސްޓަމްސް އާއި ފިޝަރީޒް މިނިސްޓްރީގެ ތަފާސްހިސާބުތަކުން ދައްކައިފި އެވެ.
މަސްވެރިކަމާ ގުޅޭ ތަފާސްހިސާބުތަކުން ދައްކާ ގޮތުގައި މި އަހަރުގެ ޖޫން މަހުގެ ނިޔަލަށް ކިރުވާފައި ވަނީ 21,438.5 މެޓްރިކް ޓަނުގެ މަހެވެ. މިދިޔަ އަހަރުގެ މި މުއްދަތުގެ ތެރޭގައި 53,426.3 މެޓްރިކް ޓަނުގެ މަސް ކިރުވާފައި ވެ އެވެ.
މީގެ ތަފުސީލުތަކަށް ބަލާއިރު، އެންމެ ބޮޑަށް ހީނަރުވެފައި ވަނީ ރާއްޖޭގެ މައި އެކްސްޕޯޓު ކަމުގައިވާ ކަނޑު މަހުގެ މަސްވެރިކަމެވެ. މި އަހަރުގެ ފުރަތަމަ ހަ މަސް ދުވަހުގެ ތެރޭގައި 16,230.4 މެޓްރިކް ޓަނުގެ ކަނޑު މަސް ކިރުވާފައިވާއިރު، މިދިޔަ އަހަރުގެ އެ މުއްދަތުގައި 46,610.6 މެޓްރިކް ޓަނުގެ މަސް ކިރުވާފައި ވެ އެވެ. މިއީ 65.2 ޕަސެންޓުގެ ވެއްޓުމެކެވެ.
ކަނޑު މަސްވެރިކަންހާ ގޯސް ނުވިޔަސް، ކަންނެލި މަސްވެރިކަން ވެސް ވަނީ މިދިޔަ އަހަރަށް ވުރެ ހީނަރުވެފަ އެވެ. މިދިޔަ އަހަރުގެ ޖޫންގެ ނިޔަލަށް 6,637.4 މެޓްރިކް ޓަނުގެ ކަންނެލި ކިރުވާފައިވާއިރު، މި އަހަރުގެ މި މުއްދަތުގައި ކިރުވާފައި ވަނީ 4,841.1 މެޓްރިކް ޓަނުގެ މަހެވެ. މިއީ 27.1 ޕަސެންޓުގެ ވެއްޓުމެކެވެ.
މި ދެ ބާވަތުގެ މަސްވެރިކަން ދަށަށް ދިޔަ ނަމަވެސް، އެހެނިހެން މަސް ކިރުވި އަދަދު ވަނީ ކުރީ އަހަރަށް ވުރެ ދެ ގުނައަށް ވުރެ ބޮޑަށް އިތުރުވެފަ އެވެ. މިދިޔަ އަހަރު އެހެނިހެން މަހުގެ ބާވަތްތަކުގެ ގޮތުގައި 178.4 މެޓްރިކް ޓަނުގެ މަސް ކިރުވާފައިވާއިރު މި އަހަރު އެ އަދަދު ވަނީ 367 މެޓްރިކް ޓަނަށް އިތުރުވެފަ އެވެ. މިއީ 105.7 ޕަސެންޓުގެ އިތުރުވުމެކެވެ.
މަސްވެރިކަމުގެ ސިނާއަތަށް އައިސްފައިވާ މަޑުޖެހުމާއެކީ މަސް ކިރުވާ އަދަދުތައް ދަށްވެ، މި އަހަރުގެ ތެރޭގައި ލިބުނު އާމްދަނީ ވެސް ވަނީ ވަރަށް ބޮޑަށް ދަށްވެފަ އެވެ. ކަސްޓަމްސްގެ ރެކޯޑުތަކުން ދައްކަނީ މި އަހަރުގެ ޖޫންގެ ނިޔަލަށް މަސް ބޭރުކޮށްގެން ލިބުނީ 37.5 މިލިއަން ޑޮލަރު (577.8 މިލިއަން ރުފިޔާ) އެވެ. މިދިޔަ އަހަރުގެ މި މުއްދަތުގެ ތެރޭގައި ވަނީ 74.5 މިލިއަން ޑޮލަރު (1.1 ބިލިއަން ރުފިޔާ) ލިބިފަ އެވެ.
މި އަހަރުގެ ފުރަތަމަ ބައިގައި މަސްވެރިކަމުގެ ހަަރަކާތްތެރިކަން ހުރި ވަރުގައި ހުރެ، އަހަރުގެ ދެ ވަނަ ބައި ނިމިއްޖެ ނަމަ މަސްވެރިކަމުން ލިބޭ އާމްދަނީ ކުރީ އަހަރަށް ވުރެ ވަރަށް ބޮޑަށް ދަށް ވާނެ ކަމަށެވެ. މިދިޔަ އަހަރު މަސް އެކްސްޕޯޓުތަކުން 135 މިލިއަން ޑޮލަރު (ދެ ބިލިއަން ރުފިޔާ) ލިބުނުއިރު، މި އަހަރުގެ މިހާތަނަށް ކޮންމެ މަހެއްގައި ހުރި އެވަރެޖުން ހިސާބުކުރާއިރު އަންދާޒާ ކުރެވެނީ މި އަހަރުގެ މަސް އެކްސްޕޯޓުތަކުން ލިބޭނީ 75 މިލިއަން ޑޮލަރު ކަމަށެވެ.
