ނޯޓިސް ނުދީ ވަކި ކުރި މައްސަލައިގައި މިފްކޯގެ ކުރީގެ ސީއީއޯ ވިޓަލީ ލިއުބިމޯވް އަށް ބަދަލު ދޭން ނުޖެހޭނެ ކަމަށް ވަޒީފާއާ ބެހޭ ޓްރައިބިއުނަލުން ނިންމައިފި އެވެ.
ވިޓަލީ ވަޒީފާއިން ވަކި ކުރީ އޭނާ އައްޔަން ކުރިތާ އެންމެ ތިން މަސްދުވަސް ފަހުން މާޗް، 2025، ގަ އެވެ. ވަޒީފާއިން ވަކި ކުރި މައްސަލައިގައި އޭނާ އެދުނީ ތިން މަހުގެ މުސާރައަށްވާ 42،000 ޑޮލަރު ހޯދުމަށެވެ.
ވަޒީފާއާ ބެހޭ ޓްރައިބިއުނަލުން ނިންމީ، ވަޒީފާއިން ވަކި ކުރާއިރު ނޯޓިހެއް ދޭންޖެހޭނެ ކަމަށް ވިޓަލީގެ ވަޒީފާގެ އެއްބަސްވުމުގައި އޮތް ނަމަވެސް އެ އެއްބަސްވުމަކީ ތަންފީޒު ކުރެވޭނެ އެއްބަސްވުމެއް ނޫން ކަމަށެވެ.
ވިޓަލީގެ ވަޒީފާގެ އެއްބަސްފުން ހެދީ އޭނާއަށް ޕްރައިވެޓައިޒޭޝަން އެންޑް ކޯޕަރަޓައިޒޭޝަން ބޯޑުން ވަޒީފާ ދިންތާ ދެ މަސްދުވަސް ފަހުންނެވެ. އޭގައި ކުންފުނީގެ ފަރާތުން ސޮއިކޮށްފައި ވަނީ މެނޭޖިން ޑިރެކްޓަރެވެ.
މިފްކޯގެ ފުރަތަމަ ބިދޭސީ ސީއީއޯ: ގޮންޖެހުންތަކާއެކު ވެސް ބެއްލެވީ ނަޒާހަތްތެރިކަން ހިފެހެއްޓޭތޯ
މިފްކޯގައި މަސައްކަތް ކުރެއްވި މަދު ދުވަސްކޮޅުގެ ތެރޭގައި ވިޓަލީ ވަނީ މުހިންމު މަސައްކަތްތަކެއް ކުރައްވައިފަ. އޭގެ ތެރެއިން އެންމެ ފާހަގަކޮށްލެވެނީ، ސިޔާސީ ނުފޫޒަށް ބޯލެނބުމެއް ނެތި ބައެއް މަގާމުތަކަށް މީހުން އައްޔަން ކުރުން.
ޓްރައިބިއުނަލުގައި މިފްކޯއިން ބުނީ އެފަދަ އެއްބަސްވުމެއްގައި ސޮއި ކުރެވޭނީ ކުންފުނީގެ ޗެއާޕާސަންއަށް ކަމަށެވެ. އަދި މި މައްސަލައިގައި އަމަލު ކުރަންޖެހޭނީ ޕީސީގެ ގާނޫނާއި އުސޫލުތަކަށް ކަމަށް ވެސް މިފްކޯއިން ބުންޏެވެ.
ވަޒީފާއާ ބެހޭ ޓްރައިބިއުނަލުން ނިންމީ ވިޓަލީގެ ވަޒީފާގެ އެއްބަސްވުމުގައި ކުންފުނީގެ ފަރާތުން ސޮއިކޮށްފައި ވަނީ އެކަމުގެ ހުއްދަ ނެތް މީހެއް ކަމަށެވެ. އަދި އެ އެއްބަސްވުމަކީ ތަންފީޒު ކުރެވޭނެ އެއްބަސްވުމަކަށް ނުވާތީ ބަދަލު ނަގައިނުދޭން ޓްރައިބިއުނަލުން ނިންމި އެވެ.
ވިޓަލީ ވަކި ކުރުމުގެ ކުރިން އޭނާ ވަނީ ކުންފުންޏަށް ސިޔާސީ ނުފޫޒު ފޯރުވަން އުޅޭ މައްސަލައިގައި ކަންބޮޑުވުން ފާޅުކޮށް ބަޔާނެއް ނެރެފަ އެވެ. އޭނާ މަގާމުން ވަކި ކުރީ އޭގަ މަދު ދުވަސްކޮޅެއް ފަހުންނެވެ.
ވަޒީފާއިން ވަކި ކުރި ފަހުން އަދަދު އަށް ދެއްވި އިންޓަވިއުއެއްގައި ވިޓަލީ ވިދާޅުވީ، ދައުލަތުގެ ހުރިހާ ކުންފުނިތަކަށް ފޯރަމުން އައި ސިޔާސީ ނުފޫޒު މިފްކޯއަށް ވެސް ފޯރަމުން އައި ކަމަށެވެ.
"ދައުލަތުގެ އެހެން ކުންފުނިތަކޭ އެއްގޮތަށް، މިފްކޯގެ ހަރަކާތްތަކުގެ ސަބަބުން ވަރަށް ގިނަ ނުފޫޒު ފޯރަމުންދިޔަ. މެނޭޖްމަންޓުން ނިންމާ ނިންމުންތަކާއި އަޅުގަނޑު ހިފެހެއްޓި ޕޮލިސީތަކަށް ނުފޫޒު ފޯރުވަން މަސައްކަތް ކުރި،" ވިޓަލީ ވިދާޅުވެފައިވެ އެވެ.
