ސަރުކާރުން އުޅެނީ ސ. މަރަދޫފޭދޫގައި 2،900 އަކަފޫޓުގެ އިސްލާމިކް ޔުނިވާސިޓީގެ ދަނާލް އިމާރާތް އަޅަން 11،000 އަކަފޫޓުގެ ބިމެއް ހޯދަން ކަމަށް އައްޑޫ ސިޓީގެ މޭޔަރު އަލީ ނިޒާރު މިއަދު ވިދާޅުވެއްޖެ އެވެ.
ނިޒާރު އަދަދު އަށް ވިދާޅުވީ މަރަދޫފޭދޫގައި 2،900 އަކަފޫޓުގެ އިމާރާތެއް އަޅަން މިހާރުވެސް ދީފައިވަނީ 9،000 އަކަފޫޓަށްވުރެ ބޮޑު ބިމެއް ކަމަށެވެ. ނަމަވެސް އެއަށްވުރެ ބޮޑު ބިމެއް ހޯދަން އުޅޭ ސަބަބެއް ނުވިސްނޭ ކަމަށް މޭޔަރު ވިދާޅުވި އެވެ.
"އަޅަން އުޅޭ އިމާރާތުގެ ބޮޑުމިނަކީ 2،900 އަކަފޫޓު. ފްލޯ އޭރިއާއަކީ 2،900 އަކަފޫޓު. މިހާރުވެސް މިދެނީ 9،000 އަކަފޫޓަށްވުރެ ބޮޑު ބިމެއް 2،900 އަކަފޫޓުގެ އިމާރާތެއް އަޅަން،" ނިޒާރު ވިދާޅުވި އެވެ.
ނިޒާރު ވިދާޅުވީ ކައުންސިލުން އެ ބިމުން ނެގީ ބޮޑުމަގާ ދިމާލުން ޕާކިންއެއް އެޅުމަށް ކަމަށާއި އައްޑޫ ސިޓީގެ ތަރައްގީއަށް ބަލާއިރު މިހާރު އިމާރާތްތައް އަޅާއިރު ޕާކިންއަށް އިސްކަންދޭން ޖެހޭ ކަމަށެވެ.
"ޕާކިންއަށް އަޅުގަނޑުމެން ބިން ނެގީ ބޮޑުމަގާވާ ދިމާލުން. ބިން ނުދީގެން ހަމަ އެ ޝަކުވާ ކުރަނީ. ކައުންސިލުގެ ނިންމުމަކުން ނިންމާފައި އޮތް ނިންމުމެއް ދެން ބަދަލެއް ނުކުރެވޭނެ. 2،900 އަކަފޫޓުގެ އިމާރާތެއް އަޅަން 11،000 އަކަފޫޓުގެ ބިމެއް ހޯދަން އުޅޭ ސަބަބެއް ނުވިސްނޭ. ކަންކަން ނުކުރަންވެގެން ކޮންމެވެސް ހުއްޖަތެއް ދައްކަނީ،" މޭޔަރު ވިދާޅުވި އެވެ.
އައްޑޫ ސިޓީ ކައުންސިލުން މިދިޔަ މަހު ބޭއްވި ރަސްމީ ޖަލްސާގައި އެ ކައުންސިލުން ވަނީ އިސްލާމިކް ޔުނިވާސިޓީއަށް ދީފައި އޮތް ބިމުގެ ބޮޑުމަގާއި ވީ ފަޅިން 85 ފޫޓް ހަތަރު އިންޗި، ޗާނދަނީ މަގާއި ވީ ފަޅިން ފުޅާމިނުގައި 44 ފޫޓް ޕާކިން އެޅުމަށް އުނިކޮށްފަ އެވެ.
މިގޮތަށް ކައުންސިލުން ނިންމީ ޖަލްސާގައި ބައިވެރިވެވަޑައިގެންނެވި އަށް މެންބަރުންގެ އިއްތިފާގުންކަން ފާހަގަކުރެވެ އެވެ.
މަރަދޫފޭދޫގައި އިސްލާމިކް ޔުނިވާސިޓީގެ ދަނާލު ގާއިމްކުރުމަށްޓަކައި، މަރަދޫފޭދޫ ސްކޫލް ކުރިމަތީގައިވާ 11،000 އަކަފޫޓުގެ ހުސްބިން ހަމަޖައްސައިދިނުމަށް އައްޑޫ ސިޓީ ކައުންސިލުން ނިންމީ މިދިޔަ އަހަރުގެ ޑިސެމްބަރު މަހުގަ އެވެ.
މިކަމާ ގުޅިގެން ފޭދޫ އުތުރު ދާއިރާގެ މެންބަރު އިސްމާއިލް ނިޒާރު ވަނީ ކައުންސިލްގެ ނިންމުން ބަދަލުކުރުމަށް އެދި މޭޔަރު ނިޒާރަށް ސިޓީއެއް ފޮނުއްވާފަ އެވެ. އިސްމާލް ނިޒާރުގެ ސިޓީގައި އެދިފައިވަނީ ކުރިންވެސް ހަމަޖައްސާފައި އޮތް ގޮތަށް އިސްލާމިކް ޔުނިވާސިޓީގެ ދަނާލު އެޅުމަށް 11،000 އަކަފޫޓުގެ ބިން ދޫކުރުމަަށެވެ.
