ނަން: އެންޓޮއިން ގްރީޒްމަން
އުފަން ތާރީހް: 21 މާޗު 1991 (33 އަހަރު)
ޤައުމު: ފްރާންސް
މަޤާމް: ފޯވަޑް / އެޓޭކިން މިޑްފީލްޑަރު
ކްލަބް: އެތުލެޓިކޯ މެޑްރިޑް
ޤައުމީ ޓީމަށް ކުޅެން ފެށީ: 2014 ވަނަ އަހަރު
އެންޓޮއިން ގްރީޒްމަން އަކީ މި ފަހަކަށް އައިސް ފްރާންސްގެ ގައުމީ ޓީމުގައި އެންމެ ފާހަގަކޮށްލެވޭ އެއް ކުޅުންތެރިޔާ އެވެ. ސްޕެއިންގެ ރެއާލް ސޮސިއެޑާޑް އިން 2009 ވަނަ އަހަރު ސީނިއާ ކެރިއަރު ފެށި، ގްރީޒްމަންގެ ކްލަބު ކެރިއަރު މިހާތަނަށް އޭނާ ހޭދަކޮށްފައިވަނީ ސްޕެއިންގަ އެވެ.
މިހާރު ކުޅެމުންދަނީ އޭނާގެ ކެރިއަރުގެ ބޮޑު ބައި ހޭދަކޮށްފައިވާ އެތުލެޓިކޯ މެޑްރިޑަށެވެ. ސްޕެއިންގެ ބާސެލޯނާ އަށް ވެސް އޭނާ ކުޅުނެވެ.
ގްރީޒްމަން ވަނީ ފްރާންސްގެ 19 އަހަރުން ދަށުގެ 2010 ވަނަ އަހަރު އޮތް 19 އަހަރުން ދަށުގެ ޔޫރޯ ކާމިޔާބުކޮށްފަ އެވެ. ފްރާންްސްގެ ސީނިއާ ޓީމަށް އޭނާ ކުޅެން ފެށީ 2014 ވަނަ އަހަރެވެ. ފްރާންސްގެ ޓީމުގައި މިހާރު ގްރީޒްމަން އަކީ މުހިންމު ރޯލެއް އަދާކުރާ ކުޅުންތެރިއެކެވެ.
އަމިއްލަ ގައުމުގައި 2016 ވަނަ އަހަރު އޮތް ޔޫރޯގެ ރަނަރަޕް ފްރާންސް ހޯދިއިރު، އެ މުބާރާތުގެ އެންމެ ގިނަ ގޯލު ޖެހި ކުޅުންތެރިޔާގެ މަގާމާއި އެންމެ މޮޅު ކުޅުންތެރިޔާގެ މަގާމު ލިބުނީ ގްރީޒްމަން އަށެވެ.
ފްރާންސް އިން ރަޝިއާގައި 2018 ވަނަ އަހަރު އޮތް ވޯލްޑް ކަޕް ކާމިޔާބުކުރިއިރު، އެ މުބާރާތުގައި ވެސް ގްޒީޒްމަންގެ ވިދުން ގަދަ އެވެ. އެ މުބާރާތުގެ ދެ ވަނަ އަށް އެންމެ ގިނަ ލަނޑު ޖެހި ކުޅުންތެރިޔާގެ މަގާމާއި ތިން ވަނަ އަށް އެންމެ މޮޅު ކުޅުންތެރިޔާގެ މަގާމު ގްރީޒްމަނަށް ލިބުނެވެ. އަދި ފައިނަލް މެޗުގެ އެންމެ މޮޅު ކުޅުންތެރިޔާގެ މަގާމުވެސް ލިބުނީ ގްރީޒްމަން އަށެވެ.
ގަތަރުގައި 2022 ވަނަ އަހަރު އޮތް ވޯލްޑް ކަޕްގައި ގްރީޒްމަން ކުޅުނީ ސެންޓްރަލް މިޑްފީލްޑްގަ އެވެ. އެ މުބާރާތުގެ ފައިނަލަށް ފްރާންސް ދަތުރުކުރިއިރު، ގްރީޒްމަން ވަނީ މޮޅު ކުޅުމެއް ދައްކައިފަ އެވެ.
