ނަން: ލޫކަ މޮޑްރިޗް
އުފަން ތާރީހް: 9 ސެޕްޓެމްބަރު 1985 (38 އަހަރު)
ޤައުމު: ކްރޮއޭޝިއާ
މަޤާމް: މިޑްފީލްޑަރު
ކްލަބް: ރެއާލް މެޑްރިޑް
ޤައުމީ ޓީމަށް ކުޅެން ފެށީ: 2006
މި އަހަރުގެ ޔޫރޯގައި ކުޅޭ އެންމެ ތަޖުރިބާކާރު ކުޅުންތެރިއަކީ ލޫކަ މޮޑްރިޗެވެ. ސްޕެއިންގެ ރެއާލަށް ކުޅެމުންދާ މޮޑްރިޗް ގައުމީ ޓީމަށް ކުޅެންފެށީ 2006 ވަނަ އަހަރެވެ. އޭގެ ކުރިން، މޮޑްރިޗް ވަނީ ކްރޮއޭޝިއާގެ ޔޫތު ޓީމުތަކަށް ވެސް ކުޅެފަ އެވެ.
މޮޑްރިޗް ،38، އޭނާގެ ކެރިއަރު ފެށީ ކްރޮއޭޝިއާގެ ޑީނަމޯ ޒަގްރެބް އިންނެވެ. އެއަށް ފަހު، 2008 ވަނަ އަހަރު ޓޮޓެންހަމް ހޮޓްސްޕާސް އަށް ބަދަލުވެ، ޔޫރަޕްގެ ބޮޑެތި ކްލަބުތަކަށް މޮޑްރިޗް ފާހަގަވިއެވެ. ސްޕެއިންގެ ރެއާލް މެޑްރިޑަށް މޮޑްރިޗް ބަދަލުވީ 2012 ވަނަ އަހަރެވެ.
ރެއާލްގައި މޮޑްރިޗް ވަނީ ކާމިޔާބު އަހަަރުތަކެއް ހޭދަކޮށްފަ އެވެ. އެ ކްލަބާ އެކު ހަ ފަހަރު ޗެމްޕިއަންސް ލީގު ކާމިޔާބުކުރި އެވެ. އަދި ސްޕެނިޝް ލީގު ވެސް ހަތަރު ފަހަރު ކާމިޔާބުކޮށްފި އެވެ.
ފާއިތުވި އަހަރުތަކުގައި، ޔޫރަޕްގައި ހުރި އެންމެ މޮޅު މިޑްފީލްޑަރުންގެ ތެރޭގައި މޮޑްރިޗް ގުނާލެވެ އެވެ. ދަނޑު މަތީގައި މޮޑްރިޗް އަކީ މޮޅު ކުޅުންތެރިއެއްގެ އިތުރުން، ލާމަސީލު ލީޑަރެކެވެ. އެކަން ޤައުމީ ޓީމާއި ރެއާލްގައި ވެސް ފެނިގެންދެ އެވެ. މޮޑްރިޗް އަކީ ކްރޮއޭޝިއާގެ ގައުމީ ޓީމުގެ ކެޕްޓަނެވެ.
މޮޑްރިޗް ވަނީ ގައުމީ ޓީމާ އެކު 2018 ވަނަ އަހަރުގެ ވޯލްޑް ކަޕްގެ ރަނަރަޕް، އަދި 2022 ވަނަ އަހަރުގެ ވޯލްޑް ކަޕްގެ ތިން ވަނަ ހޯދައިފަ އެވެ. އަދި ޔުއޭފާ ނޭޝަންސް ލީގުގެ ރަނަރަޕްގެ މަގާމު 2023 ވަނަ އަހަރު ހޯދި އެވެ.
މޮޑްރިޗްގެ ކެރިއަރުގައި އެންމެ ކާމިޔާބު އެއް އަހަރަކީ 2018 ވަނަ އަހަރެވެ. އެ އަހަރުގެ ވޯލްޑް ކަޕްގެ ރަނަރަޕްގެ މަގާމު ހޯދިއިރު، އެ އަހަރު ފްރާންސް ފުޓްބޯލް މެގަޒިން އިން ދިން ބެލޮންޑިއޯ އެވޯޑް ވެސް ލިބުނީ މޮޑްރިޗަށެވެ.
މި އަހަރުގެ ޔޫރޯ އަކީ ފަހަރެއްގައި މޮޑްރިޗް ގައުމީ ޓީމަށް ކުޅޭ ފަހު މުބާރާތަށް ވެދާނެ އެވެ. އެހެންކަމުން މި އަހަރުގެ ޔޫރޯގައި ކާމިޔާބެއް ހޯދައި، ކްރޮއޭޝިއާގެ ދިގު އިންތިޒާރު ނިންމާލުމަށް މޮޑްރިޗް ވަރަށް ބޭނުންވާނެ އެވެ.
