އޮސްޓްރިއާ އަކީ މި ފަަހަރުގެ ޔޫރޯ ފުޓްބޯޅަ މުބާރާތަށް އަށް ވަނަ އަށް ކޮލިފައިވި ޓީމެވެ. އެ ޓީމު ޔޫރޯ އަށް ކޮލިފައިވީ، ގްރޫޕް އެފްގެ ދެ ވަނަ ޓީމުގެ ގޮތުގަ އެވެ. ގްރޫޕް އެފްގެ އެއް ވަނަ ހޯދީ ބެލްޖިއަމް އެވެ. ކޮލިފައިންގައި ކުޅުނު އަށް މެޗުން އޮސްޓްރިއާ ބަލިވި ހަމައެކަނި މެޗަކީ، އަމިއްލަ ދަނޑުގައި ބެލްޖިއަމް އަތުންނެވެ.
މިއީ، އޮސްޓްރިއާ އިން ޔޫރޯގައި ކުޅޭނެ ހަތަރު ވަނަ ފަހަރެވެ. މީގެ ކުރިން އެ ޓީމުން ވަނީ 2008 އާއި 2016 އަދި 2020 ވަނަ އަހަރު ވާދަކޮށްފަ އެވެ. ޖެހިޖެހިގެން ދެ ވަނަ ޔޫރޯގައި ފުރަތަމަ ފަހަރަށް ވާދަކުރަން އޮސްޓްރިއާ ތައްޔާރުވެފައިވާއިރު، އެންމެ ފަހުން މުބާރާތުގައި އެ ޓީމުން ގަދަ 16 ބުރުގައި ކުޅުނެވެ. ފުރަތަމަ ދެ މުބާރާތުން ކެޓީ ގްރޫޕް ސްޓޭޖުންނެވެ.
ތަޖުރިބާކާރު ކޯޗު، ރަލްފް ރަންގްނިކް އަށް އޮސްޓްރިއާ ކޯޗުކަން ހަވާލުކުރީ، 2022 ވަނަ އަހަރު އޭޕްރީލް މަހުގަ އެވެ. ދިން ޓާގެޓަކީ، މި ފަަހަރުގެ ޔޫރޯ ފުޓްބޯޅަ މުބާރާތަށް އެ ޓީމު ކޮލިފައިކޮށްދިނުމެވެ. ރަންގްނިކް ސޮއިކުރި ކޮންޓްރެކްޓްގައި، ޔޫރޯ އަށް އެ ޓީމު ކޮލިފައިކޮށްދީފިނަމަ އިތުރު ދެ އަހަރު އާ ކުރެވޭ ގޮތަށް ވަނީ ހިމަނައިފަ އެވެ. އެ މާއްދާ އަށް އަމަލުކުރަން ފެށުމުން، ރަންގްނިކް ވަނީ ބަޔާން މިއުނިކްގެ ކޯޗަކަށް ވާން ލިބުނު ފުރުސަތު ދޫކޮށްލައިފަ އެވެ.
އޮސްޓްރިއާ، މި ފަހަރުގެ ޔޫރޯގައި ލައްވާލާފައި މި ވަނީ ނިސްބަތުން ބަލާއިރު، އެ ޓީމަށް ޗެލެންޖިން ގްރޫޕެއްގަ އެވެ. ނެދަލެންޑްސް އާއި ފްރާންސް އަކީ އޮސްޓްރިއާއާ އަޅާކިޔާއިރު، ޔޫރަޕްގެ ގަދަ ދެ ބާރު ކަމަށްވާއިރު، ދެން މި ގްރޫޕްގައި އޮތް ޕޮލެންޑަކީ ވެސް އޮސްޓްރިއާއާ ދާދި އެއްވަރެއްގެ ޓީމެކެވެ.
ކުޅުންތެރިންނަށް ބަލާއިރު، އޮސްޓްރިއާ ޓީމުން އެންމެ ފާހަގަކޮށްލެވޭ ކުޅުންތެރިއަކީ، ޑޭވިޑް އަލަބާ އެވެ. އެކަމަކު، އަނިޔާގެ ސަބަބުން އޭނާ އަށް ޔޫރޯ ނުކުޅެވޭއިރު، އޮސްޓްރިއާ އިން ދެން ތަފާތު ދައްކާނެ ކަމަށް ބެލެވެނީ، އާރްބީ ލައިޕްޒިގުގެ ކްރިސްޓޮފް ބޯމްގާޓްނާ އެވެ.
