ބާސެލޯނާ (މެއި 31) - ސްޕެއިނާއި ބާސެލޯނާގެ ކުރީގެ ޑިފެންޑަރު، ޖެރާޑް ޕީކޭގެ ކުންފުނި، ކޮސްމޯސްއާ ގުޅޭ ކޮރަޕްޝަންގެ މައްސަލައެއް ސްޕެއިނުގެ ކޯޓަކުން އަންގައިގެން ބަލަން ފަށައިފި އެވެ.
ސައުދީ އަރަބިއްޔާގައި ސްޕެނިޝް ސުޕަ ކަޕް ހޯސްޓްކުރަން ކަނޑައެޅި ޑީލުގެ ތަހުގީގު މީގެ ދެ އަހަރު ކުރިން، 2022 ވަނަ އަހަރު ފެށި އެވެ. އެއީ، އޭރު ސްޕެއިން ފުޓްބޯޅަ ފެޑެރޭޝަންގެ ރައީސް، ލުއިސް ރުބިއާލެސް އާއި ޕީކޭއާ ދެމެދު ދެކެެވުނު ވާހަކަތަކެއް އޯޑިއޯ ލީކުވުމާ ގުޅިގެންނެވެ.
އެ މައްސަލައިގެ ތަހުގީގު ހިނގަމުންދާއިރު، ދާދި ފަހުން، ސްޕެއިނުގެ ކޯޓަކުން އަންގައިގެން، ޕީކޭގެ ކުންފުނި ކޮސްމޯސްގެ މައްސަލަ ވެސް ވަނީ ބަލަން ފަށައިފަ އެވެ. ރިޕޯޓްތައް ބުނާގޮތުން، ސްޕެނިޝް ސުޕަ ކަޕް ސައުދީ އަށް ގެންދިއުމަށް، ނިންމި ޑީލުގެ ތެރެއިން ޕީކޭގެ ކުންފުންޏަށް ވަނީ، 40 މިލިއަން ޑޮލަރު ލިބިފަ އެވެ. އެ ޑީލުގެ ތެރެއިން، ސްޕެއިނުގެ ފުޓްބޯޅަ ފެޑެރޭޝަނަށް 400 މިލިއަން ޑޮލަރު ލިބުނެވެ.
ފުޓްބޯޅައިން 2022 ވަނަ އަހަރު ރިޓަޔާކުރުުމުގެ ކުރިން، ޕީކޭ ވަނީ ސައުދީގައި ސްޕެނިޝް ސުޕަ ކަޕް ދެ ފަހަރެއްގެ މަތިން ކުޅެފަ އެވެ. ޕީކޭ އަންނަނީ މި ކަމުގައި އޭނާގެ ކުންފުނިން ގޯހެއް ހަދާފައި ނުވާނެ ކަމަށް ބުނަމުންނެވެ.
މިދިޔަ މާޗް މަހު ސްޕެއިން ފުޓްބޯޅަ ފެޑެރޭޝަން ވަނީ ރެއިޑްކޮށްފަ އެވެ. އަދި ސްޕެއިން ފުޓްބޯޅަ ފެޑެރޭޝަންގެ ކުރީގެ ރުބިއާލެސްގެ ގެ ވެސް ބަލައި ފާސްކުރި އެވެ. ރުބިއާލެސް، ސްޕެއިން ފުޓްބޯޅަ ރައީސް ކަމުން މިދިޔަ ސެޕްޓެމްބަރު މަހު ވަކިކުރި އެވެ. އެއީ، ފީފާ ވިމެންސް ވޯލްޑް ކަޕްގެ ނިންމުމުގެ ރަސްމިއްޔާތުގެ ތެރެއިން، ސްޕެއިންގެ ކުޅުންތެރިޔާ، ޖެނީ ހާމޯސޯ އަށް ބޮސްދިނުމުންނެވެ. މި މައްސަލައިގެ ތަހުގީގު ވެސް ކޯޓުގައި އެބަހިނގަ އެވެ.
