ބާސެލޯނާ (ޖެނުއަރީ 10) - ސްޕެއިނާއި ބާސެލޯނާގެ ކުރީގެ ޑިފެންޑަރު، ޖެރާޑް ޕީކޭ، ފުޓްބޯޅަ ކޯޗިން އަށް ނުކުންނަން ނިންމާފައިވާކަން އިއުލާނުކޮށްފި އެވެ.
އެކްސްގައި ކުރި ޕޯސްޓެއްގައި، ޕީކޭ، 36، ބުނެފައިވަނީ ވަރަށް ވިސްނުމަށް ފަހު، ފުޓްބޯޅަ އަށް އަލުން އަންނަން ނިންމައިފައިވާ ކަމަށެވެ.
"މިއީ އާ އަހަރެއް. ވަރަށް ވިސްނުންތެރިކަމާ އެކު ނިންމާފައިމިވަނީ ފުޓްބޯޅަ އަށް އެނބުރި އަންނަން. ފުޓްބޯޅައިގައި މަސައްކަތް ކުރުން އަބަދުވެސް ވަރަށް ހަނދާންވޭ،" މެންޗެސްޓާ ޔުނައިޓެޑަށް ވެސް ކުޅެފައިވާ ޕީކޭ ބުންޏެވެ.
"މި ފަހަރު ކުޅުންތެރިއެއްގެ ގޮތުގައެއް ނޫން ފެންނާނީ. ކޯޗެއްގެ ގޮތުގައި ފެންނާނީ. މި ހަފްތާގެ ނިޔަލަށް އިތުރު މައުލޫމާތުތައް ހިއްސާކުރާނަން،"
ޕީކޭ، ފުޓްބޯޅައިން ރިޓަޔާކުރީ 2022 ވަނަ އަހަރުގެ ނޮވެމްބަރު މަހު އެވެ. އެއީ ބާސެލޯނާގެ ކޯޗު ޒަވީ ހެނާންޑޭޒްއާ އުފެދުނު ހިޔާލުތަފާތުވުންތަކެއްގެ ތެރެއިން އައި ކަމެކެވެ. ޕީކޭ އަށް ގިނަ ކްލަބްތަކެއްގެ ހުށަހެޅުން ލިބުނު ނަމަވެސް އޭނާ ނިންމީ ރިޓަޔާކުރުމަށެވެ.
ފުޓްބޯޅަ އިން ރިޓަޔާކުރުމަށް ފަހު، ޕީކޭ ވަނީ ކުޅިވަރުގެ ތެރެއިން އޭނާގެ ވިޔަފާރި ފުޅާކުރަން ގިނަ ކަންތައްތަކެއް ކޮށްފަ އެވެ. އެ ގޮތުން، ސެވަން އަ ސައިޑް ފުޓްބޯޅަ ލީގެއް، ކިންގްސް ލީގުގެ ނަމުގައި ފަށައި، ގިނަ ބަޔެއްގެ ސަމާލުކަން ހޯދި އެވެ.
ޕީކޭ ވަނީ 2018 ވަނަ އަހަރު ޑިސެމްބަރު މަހު، ސްޕެއިންގެ ކްލަބް އެންޑޯރާ ގަނެފަ އެވެ. ސްޕެއިންގެ ދެ ވަނަ ޑިވިޝަނުގައި އޮތް އެންޑޯރާ އިން ޕީކޭގެ ކޯޗިން ކެރިއަރު ފެށުން އެކަށީގެންވާ ކަމަށް ރިޕޯޓްތައް ބުނެ އެވެ. އެކަމަކު، ޕީކޭ ކޯޗިން ލައިސަންސް ލިބެންދެން، ބާސެލޯނާގެ ލަ މާސިއާގެ އެކެޑަމީ ކޯޗެއްގެ ގޮތުގައި ގެނުމުގެ ފުރުސަތު ވެސް އެބައޮތެވެ.
