އެމްއެންޑީއެފްގެ ޑްރޯންތައް އޮޕަރޭޓް ކުރުމަށް އެއާޕޯޓެއް ހާއްސަ ކުރަން ސިފައިން ބޭނުންވާކަން އެއާޕޯޓުތައް ތަރައްގީ ކުރުމުގެ މަޝްރޫއުތައް ވިލަރެސްކުރާ ކޮންސްޓްރަކްޝަން މިނިސްޓްރީގެ މިނިސްޓަރު އަބްދުالله މުއްތަލިބު ހާމަ ކުރައްވައިފި އެވެ.
މިއަދު ބޭއްވި ނޫސްވެރިންގެ ބައްދަލުވުމުގައި ފ. މަގޫދޫ އަދި ނިލަންދޫ އެއާޕޯޓުގެ ވާހަކަ ދައްކަވަމުން މުއްތަލިބު ވިދާޅުވީ އެހާ ކައިރި ކައިރީގައި ދެ އެއާޕޯޓު އެޅުމަކީ ފުށުއަރާ ނުވަތަ ކުރެވޭ ބޭކާރު އިންވެސްޓްމަންޓެއް ކަމަށް ގަބޫލު ނުކުރައްވާ ކަމަށެވެ.
"މަގޫދޫ އެއާޕޯޓު ބޭނުންކުރެވޭނެ ކިތަންމެ ގޮތްތަކެއް ވެސް އެބަހުރި. ޓްރެއިނިން އެއާޕޯޓުތަކެއް, ނޫނީ މިހާރު އެމްއެންޑީއެފުން ޑްރޯން ގެންގުޅެން އެ ބޭފުޅުން ވެސް އެބަ ބޭނުންވޭ ވަކި ހާއްސަ އެއާޕޯޓެއް ޑްރޯން އޮޕަރޭޓް ކުރަން ވެސް," މި ހުރިހާ ކަމަކަށް ބަލާއިރު މަގޫދޫ އެއާޕޯޓު ބޭނުން ކުރެވޭނެ ގިނަ ގޮތްތައް ހުރިކަން ފާހަގަކުރައްވާ މުއްތަލިބު ވިދާޅުވި އެވެ.
މިނިސްޓަރު މުއްތަލިބު ވިދާޅުވީ ފާފު އަތޮޅަށް 2500 މީޓަރުގެ ރަންވޭއަކާއެކު އިންޓަނޭޝަނަލް އެއާޕޯޓެއް ބޭނުންވާކަން އެ ސަރަހައްދަށް އިންވެސްޓްކޮށްފައި ތިބި ފަރާތްތަކާއި ޑިވެލޮޕަރުން ބުނަމުންދާ ކަމަށެވެ. އެ ސަރަހައްދަށް އެވަރުގެ ރަންވޭއެއް ބޭނުންވާއިރު, މިހާރު މަސައްކަތް ކުރިއަށްދާ މަގޫދޫ އެއާޕޯޓު އެންމެ ބޮޑު ކުރެވޭނީ 1800 މީޓަރަށްކަން ވެސް މިނިސްޓަރު ފާހަގަ ކުރެއްވި އެވެ.
އެހެން ނަމަވެސް 75 ޕަސަންޓު މަސައްކަތް ނިމިފައިވާ މަގޫދޫ އެއާޕޯޓު ހުއްޓާލުމަކީ ކުރާނެ ކަމެއް ނޫންކަން ފާހަގަކޮށް މުއްތަލިބު ވިދާޅުވީ މަގޫދޫގައި އެއާޕޯޓު އެޅުމާއެކު, ނިލަންދޫ ފަޅުގައި އެއާޕޯޓު އެޅުމުގެ ވިސްނުން ސަރުކާރުން ގެންގުޅޭ ކަމަށެވެ.
އަދި އެހާ ކައިރީގައި ދެ އެއާޕޯޓު އަޅަން އިންވެސްޓު ކުރުމަކީ ބޭކާރު ކަމެއްގެ ގޮތުގައި ދެކެވަޑައިނުގަންނަވާކަން ފާހަގަކުރައްވާ މުއްތަލިބު ވިދާޅުވީ ނިލަންދޫ އެއާޕޯޓު އިންޓަނޭޝަނަލް ކުރުމަށްފަހު މަގޫދޫ އެއާޕޯޓުން ކުރެވޭނެ އެހެން ބޭނުންތައް ވެސް އެބަހުރި ކަމަށެވެ.
