ސިނަމާލެ ބްރިޖުން ކަނޑަށް ފުންމާލި ބިދޭސީއަކު ކޯސްޓުގާޑުން ސަލާމަތްކޮށްފި އެވެ.
މޯލްޑިވްސް ޑިފެންސް ފޯސް (އެމްއެންޑީއެފް) އިން ބުނީ އެ ހާދިސާގެ މައުލޫމާތު ލިބުނީ ރޭގެ ދަންވަރު 12:44 ގައި ކަމަށެވެ. އެ މައުލޫމާތު ލިބުމާއެކު އެ ސަރަހައްދަށް ގޮސް އެމްއެންޑީއެފްގެ ޑައިވަރުން އެ މީހާ ހޯދުމުގެ މަސައްކަތް ފެށި ކަމަށް އެމްއެންޑީއެފުން ބުންޏެވެ.
އެ މީހާ ހޯދުމުގެ މަސައްކަތް ކުރަމުން ދަނިކޮށް އޭނާ ފެނިފައި ވަނީ ބްރިޖުގެ ތަނބެއްގައި ހިފަހައްޓައިގެން އޮއްވައި ކަމަށް އެމްއެންޑީއެފުން ބުންޏެވެ،
އޭނާ ސަލާމަތް ކުރުމަށްފަހު މޯލްޑިވްސް ޕޮލިސް ސާވިސްއާ މިހާރު ހަވާލުކޮށްފައިވާ ކަމަށް ވެސް އެމްއެންޑީއެފުން ބުންޏެވެ.
އެމްއެންޑީއެފުން އާންމުކޮށްފައިވާ ފޮޓޯތަކުން ފެންނަގޮތުގައި ކަނޑަށް ފުންމާލާފައި ވަނީ ބިދޭސީ ފިރިހެނެކެވެ. އޭނާގެ ހާލު ދެރަކަމަކަށް އެ ފޮޓޯތަކުން ނުފެނެ އެވެ. ނަމަވެސް، އެ މީހާއާ ބެހޭ އިތުރު މައުލޫމާތެއް ރަސްމީ އެއްވެސް އިދާރާއަކުން އަދި، މިހައިތަނަށް ހާމައެއް ނުކުރެ އެވެ.
