ގައުމީ ފުޓްސަލް ޓީމަށް މުސާރަ ނުލިބެނީ, މިހާރު ހެދިފައިި އޮތް "އުސޫލު"ގެ ސަބަބުން ކަމަށް ކުޅިވަރާ ބެހޭ ވަޒީރު އަބްދުالله ރާފިއު (ރާއްޕެ) ވިދާޅުވެއްޖެ އެވެ.
މިއަދު ރޭޑިއޯ ބިލްޑިންގް ސެނެކޯ މާލަމުގައި ކުރިއަށްދިޔަ ނޫސްވެރިންގެ ބައްދަލުވުމުގައި "އަދަދު" އިން ކުރި ސުވާލަށް ޖަވާބު ދެއްވަމުން ކުޅިވަރާ ބެހޭ ވަޒީރު ރާފިއު ވިދާޅުވީ, ގައުމީ ޓީމުތަކަށް މުސާރަދޭ އުސޫލެއް ނެޝަނަލް ސްޕޯޓްސް ކައުންސިލުން ވަނީ އެކުލަވާލާފައި ކަމަށާއި, އެހެންވެ, މިނިސްޓްރީން މިހާރު އަމަލު ކުރަން ޖެހޭނީ އެ އުސޫލުގެ މައްޗަށް ކަމަށެވެ.
ރާފިއު ވިދާޅުވީ, ގައުމީ ޓީމުތަކަށް މުސާރަ ދިނުމުގައި ވަކި ކްރައިޓީރިއާތަކެއް ހެދިފައިވާ ކަމަށާއި, އެހެންވެ, އެ ކްރައިޓީރިއާތަކުގެ ބޭރުން މުސާރަ ދެވެން ނޯންނަ ކަމަށެވެ.
އެނގިފައިވާ ގޮތުގައި ފުޓްސަލް ގައުމީ ޓީމަށް މުސާރަ ނުދެވޭ ސަަބަބަކީ، ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް)ގެ ތެރެއިން އެކަށީގެންވާ ގޮތެއްގައި ގައުމީ ލެވަލްގައި ފުޓްސަލްގެ ކަންކަން ނުހިނގާތީ އެވެ.
މިނިސްޓަރު ވިދާޅުވީ، ފުޓްސަލްގެ މި ކަމުގައި ހައްލެއް ހޯދަން މަސައްކަތް ކުރާނެ ކަމަށެވެ.
މި ކަމުގެ (ފުޓްސަލް ގައުމީ ޓީމު ކުޅުންތެރިންގެ މުސާރައިގެ މައްސަލަ) މުހިންމު ކަމުން އަޅުގަނޑުމެން މި ޖެހެނީ, ޑިސްކަސް ކުރަން ކްރައިޓީރިއާ ބަދަލުކުރާނީތޯ ބެލުމަށް" --- މިނިސްޓަރު ރާފިއު
ސްޕޯޓްސް މިނިސްޓްރީގެ ނޫސްވެރިންގެ ބައްދަލުވުމެއްގެ ތެރެއިން މިނިސްޓަރު ރާފިއު ވާހަކަ ދައްކަވަނީ،--- ފޮޓޯ: އަދަދު
މިކަމާ ގުޅިގެން ސްޓޭޓް މިނިސްޓަރު ރިޔާޒް ވިދާޅުވީ, މި ކަމަކީ މިނިސްޓްރީން ކަންބޮޑުވާ ކަމެއް ކަމަށާއި, އެކަމަކު, މިކަން ރެގުއުލޭޓް ކުރެވިގެން އަންނާނީ ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) އަށް ކަމަށެވެ.
އެހެން ނަމަވެސް, އެފްއޭއެމް އާއި ގުޅިގެން އަދި މިކަމާ ގުޅުން ހުރި ފަރާތްތަކާ ގުޅިގެން މިކަން ހައްލު ކުރުމަށް މަސައްކަތް ކުރަމުން މިނިސްޓްރީން އަންނަ ކަމަށް ރިޔާޒް ވިދާޅުވި އެވެ.
ގައުމީ ފުޓްސަލް ޓީމުން މިދިޔަ ދުވަސްތަކުގައި ރާއްޖެއިން ބޭރުގެ ގިނަ މުބާރާތްތަކުގައި ވާދަކޮށްފައިވާއިރު, ފީފާ އިން އަލަށް ނެރުނު, ފުޓްސަލް ރޭންކިންގް އަށް ބަލާއިރު, ރާއްޖޭގެ ފުޓްސަލް ޓީމު އޮތީ ދުނިޔޭގެ ރޭންކިންގެ 110 ވަނައިގަ އެވެ.
އެ ރޭންކިންގެ ތަފްސީލަށް ބަލާއިރު، ދެކުނު އޭޝިއާގެ ގައުމުތަކުގެ ތެރެއިން ރާއްޖެ އޮތީ ސަރަހައްދުގެ އެއް ވަނައިގަ އެވެ. އަދި އޭޝިއާގެ ރޭންކިންގައި ރާއްޖެ އޮތީ 27 ވަނައިގަ އެވެ.
ގައުމީ ފުޓްސަލް ޓީމުން ވަނީ އެންމެ ފަހުން ދެ ފަަހަރު ވެސް އޭޝިއަން ފުޓްސަލް ކަޕް ކޮލިފައިންގައި ކުޅެފަ އެވެ. ދެ ފަަހަރު ވެސް ކުޅެފައިވަނީ މުބާރާތަށް ހާއްސަކޮށް ސްކޮޑެއް ނަގައިގެން، ޕްރެކްޓިސް ކުރުމަށް ފަހު އެވެ. ޕްރެކްޓިސް ކުރުމުގައި ދިމާވާ އެންމެ ބޮޑު ދަތިކަމަކީ ފަރިތަކޮށްލާނެ އިންޑޯ އެއް ނެތުމެވެ. މި ސަރުކާރުން ވަނީ ފުޓްސަލް އިންޑޯއެއްގެ ބިންގާ އަޅައިފަ އެވެ.
މިދިޔަ ސަރުކާރުން، ދައުރު ނިމުމުގެ ކުރިން ފުޓްސަލް އިންޑޯއެއްގެ މަސައްކަތް ފަށާނެ ކަމަށް ހާމަކުރި ނަމަވެސް އޭގެ އަމަލީ ސިފައެއް ނުޖެހެ އެވެ.
