ފ. އަތޮޅުގައި މި މަހުގެ 06-12 އަށް ކުރިއަށް ގެންދިޔަ ޕްލެއިންގް ވިތް ކޮރަލް ޕްރޮގްރާމްގެ ފުރަތަމަ ބުރު ވަރަށް ކާމިޔާބު ކަމަށް ކުޅިވަރާ ބެހޭ ވަޒީރު އަބްދުالله ރާފިއު (ރާއްޕެ) ވިދާޅުވެއްޖެ އެވެ.
އިޓަލީ ފުޓްބޯޅައިގެ ގަދަބާރު، އިންޓަ މިލާން ފުޓްބޯޅަ ކުލަބާއި, އިޓަލީގެ ޔުނިވާސިޓީ އޮފް މިލާނޯ ބިކޯކާ އާއި ޔުއެފާ ފައުންޑޭޝަން ފޯ ޗިލްޑްރަން ގުޅިގެން ފ. އަތޮޅުގައި ކުރިއަށް ގެންދިޔަ ޕްރޮގްރާމް އެކެވެ.
މި ޕްރޮގްރާމްގެ ފުރަތަމަ ބުރުގައި 200 އެއްހާ ކުދިން ބައިވެރިވި އެވެ.
މިނިސްޓާ ރާފިއު ވިދާޅުވީ, މި ޕްރޮގްރާމާ އެކު, ކުދިންނަށް ކުޅިވަރުގެ ތެރެއިން ތިމާވެއްޓާއި, ފަރުތަކުގެ ވެށި ރައްކާތެރިކޮށްދޭން ދަސްކޮށްދޭނެ ކަމަށެވެ. އަދި މި ޕްރޮގްރާމް ކުރިއަށް އޮތް ދެ އަހަރުގެ ދުވަހާ ހަމައަށް ކުރިއަށް ގެންދިޔުމަށް ނިންމާފައިވާ ކަމަށާއި, މި ޕްރޮގްރާމްގެ ދަށުން 8,000 މުރަކަ, ޕްރޮގްރާމްގައި ބައިވެރިވާ ދަރިވަރުން އިންދުމަށް ނިންމާފައިވާ ކަމަށެވެ.
މިއަދުގެ އިވެންޓްގެ ތެރެއިން ރާފިއު ވާހަކަ ދައްކަވަނީ.--- ފޮޓޯ: ސްޕޯޓްސް މިނިސްޓްރީ
ރާފިއު ވިދާޅުވީ, ރާއްޖޭގެ ފަރުތައް އަލުން އިއާދަކުރުމަކީ ފަރުދުންގެ ޒިންމާ އެއް ކަމަށާއި, މިކަން އެކަނި ކުރުމަކީ ކުދިންގެ ޝައުގުވެރިކަން ޖައްސުވަން އުނދަގޫ ކަމެއް ކަމަށެވެ. އެހެންވެ, މި ޕްރޮގްރާމްގެ ދަށުން ފުޓުބޯޅައިގެ ތެރެއިން ކުދިންނަށް ފަރުތަކުގެ މުހިންމުކާއި, އެކަމުގެ އިލްމު އުނގަންނައިދޭން ދަސްކޮށްދޭނެ ކަމަށެވެ.
މި ޕްރޮގްރާމް އިތުރު އަތޮޅުތަކުގައި ކުރިއަށް ގެންދިޔުމަށް ވެސް މަޝްވަރާ ކުރައްވަމުން އަންނަ ކަމަށް ރާފިއު ވަނީ ވިދާޅުވެފަ އެވެ.
އިންޓަ މިލާނުން މިހާރުވެސް އަންނަނީ ދުނިޔޭގެ 30 ގައުމެއްގައި ޔޫތު ލެވަލްގެ ކުޅުންތެރިން ތަމްރީނު ކުރަމުންނެވެ. ރާއްޖޭގައި މި ފެށި ޕްރޮގްރާމްއާ އެކު, އެ ކުލަބުން ތަމްރީނުކުރާ ގައުމުތަކުގެ އަދަދު 31 އަށް އަރާނެ އެވެ.
"ޕްލޭއިން ވިތު ކޮރަލްސް" ދެ ބަޔަކަށް ބެހޭނެ އެވެ. އެ ގޮތުން ފުރަތަމަ ބަޔަކީ، ކަނޑުފަޅާއި އެ ތަންތަނުގެ ދިރުންތަށް ހިމާޔަތްކުރުމާއި ރައްކާތެރިކޮށް ދިރުވާއާލާކުރުމާއި ގުޅޭގޮތުން ކުދިންގެ މެދުގައި، ހޭލުންތެރިކަން އިތުރުކޮށްދޭން ކުރެވޭ ކަމެކެވެ.
ދެ ވަނަ ބައި ބިނާވެފައި އޮތީ، އިންޓަގެ މައިގަނޑު އެއް ފޯކަސް ކަމަށްވާ ފުޓްބޯޅައާ އެވެ. އެ ގޮތުން، ފުޓްބޯޅަކުޅުމުގެ ހުނަރުތަށް ކުދިންނަށް ދަސްކޮށްދިނުމާއި ކުޅިވަރުގެ ތެރެއިން ފަރުދީ އަދި އިޖުތިމާޢި ކަންކަން އަށަގެންނެވުމަށް މަސައްކަތް ކުރުމެވެ.
މީގެ އިތުރުން "ޕްލޭއިން ވިތު ކޮރަލްސް"ގެ ތެރެއިން، ފ. އަތޮޅުގެ ކޮންމެ ރަށަކުން ހަތަރު ޓްރެއިނަރުން ތަމްރީން ކުރާގޮތަށް ވަނީ ހަމަޖެހިފަ އެވެ. އެ ގޮތުން، ބިކޯކާ ޔުނިވާސިޓީ އާއި އިންޓަގެ ރޭވުމާ އެއް ގޮތަށް، ޕްރޮރާމްތަކެއް ބައްޓަންކޮށް، އެކި ރަށްރަށުން ނަގާފައިވާ ކުދިންނަށް ޓްރެއިނަރުން މެދުވެރިކޮށް ތަމްރީނުތައް ދިނުމެވެ.
އިންޓަގެ ކެމްޕަސްގެ ހާއްސަ ކަރިކިއުލަމްގެ ތެރެއިން ތައްޔާރުކޮށްފައިވާ މި ޓްރެއިނިން ޕްރޮގްރާމްގެ ތެރެއިން ކޮންމެ އަހަރަކު ކޮންމެ ރަށަކުން 20 ކުދިން ބައިވެރިކުރާނެ އެވެ. އެއީ ދެ ޖިންސުން ވެސް ކުދިންނަށް ފުރުސަތު ފަހިވާ ގޮތަށެވެ.
