އިސްތަންބޫލް، ތުރުކީ (އޮކްޓޫބަރު 10) - ޖެހިޖެހިގެން ހަތަރު މެޗުން ބަލިވުމާ އެކު ތުުރުކީ ގައުމީ ފުޓްބޯޅަ ޓީމުގެ ކޯޗުކަމުން އިޓަލީގެ ވިންޗެންޒޯ މޮންޓެލާ ވަކިކޮށްފި އެވެ.
މި ފަހަަރުގެ އިންޓަނޭޝަނަލް ބްރޭކުގައި ޔުއެފާ ނޭޝަންސް ލީގުގައި ތުރުކީން ކުޅުނު ހަަތަރު މެޗުން ވެސް ވަނީ ބަލިވެފަ އެވެ. އެ ގޮތުން، އިޓަލީ އަތުން ދެ ފަހަރު ބަލިވިއިރު، ފްރާންސާއި ބެލްޖިއަމް އަތުން ވެސް ވީ ބައްޔެވެ. އިޓަލީ އަަތުން ބަލިވީ، އަމިއްލަ ދަނޑުގައި 4-1 އިން އަދި ރަށުންބޭރުގައި 3-1 އިންނެވެ. ބެލްޖިއަމް އަތުން 3-0 އިން ބަލިވިއިރު، ފްރާންސް އަތުން ބަލިވީ 1-0 އިންނެވެ.
މި ނަތީޖާތަކާ އެކު، ތުރުކީ ފުޓްބޯޅަ ފެޑެރޭޝަނުން މޮންޓެލާ މަގާމުން ވަކިކުރިިއިރު، އޭނާއާ އެކު ހަދާފައި އޮތް އެއްބަސްވުން އޮތީ 2028 ވަނަ އަހަރުގެ ޔޫރޯ ފުޓްބޯޅަ މުބާރާތުގެ ނިޔަލަށެވެ.
ތުރުކީ އަށް 24 އަހަރަށް ފަހު، ފީފާ ވޯލްޑް ކަޕް ފުޓްބޯޅަ މުބާރާތަކުން ޖާގަ ހޯދައިިދިނީ މޮންޓެލާ އެވެ. އެ ގޮތުން، 2002 ވަނަ އަހަރުގެ ވޯލްޑް ކަޕްގެ ސެމީ ފައިނަލުގައި ވާދަކުރި ފަހުން ދެން ބޭއްވި ފަސް ވޯލްޑް ކަޕުން ވެސް ތުރުކީ ނުފެނެ އެވެ. އަދި، މި ފަހަރު، އެމެރިކާ، މެކްސިކޯ އަދި ކެނަޑާގައި ބޭއްވި ވޯލްޑް ކަޕްގައި ތުރުކީ ކެޓީ ގްރޫޕް ސްޓޭޖުން ކަމަށް ވިޔަސް ފަހު މެޗުން އެމެރިކާ އަތުން މޮޅުވި އެވެ.
މީގެ ތިން އަހަރު ކުރިން، 2023 ވަނަ އަހަރުގެ އޮކްޓޫބަރު މަހު ތުރުކީއާ ހަވާލުވި މޮންޓެލާ ވަނީ އެ ޓީމަށް 40 މެޗުގައި އިރުޝާދުދީފަ އެވެ. އޭގެ ތެރެއިން 21 މެޗުން މޮޅުވިއިރު، 14 މެޗުން ބަލިވެ، 5 މެޗު ނިމުނީ އެއްވަރުވެގެންނެވެ.
ކޯޗިން ކެރިއަރުގައި މޮންޓެލާ ވަނީ މީގެ ކުރިން، ފިއޮރެންޓީނާ، އޭސީ މިލާން، ސަމްޑޯރިއާ، ރޯމާ، ކަޓާނިއާގެ އިތުރުން ސްޕެއިނުގެ ސެވިއްޔާ އާއި ތުރުކީގެ އަޑާނާ ޑެމިރްސްޕޯރަށް އިރުޝާދުދީފަ އެވެ.
