15 ވަނަ ވޯލްޑް ބޮޑީބީލްޑިން އެންޑް ފިޒީކް ސްޕޯޓްސް ޗެމްޕިއަންޝިޕް އަންނަ އަހަރު ރާއްޖޭގައި ބާއްވަން ނިންމައިފި އެވެ.
ބޮޑީބިލްޑިންގެ ދުނިޔޭގެ ފެންވަރުގެ އެންމެ ބޮޑު މުބާރާތް އަންނަ އަހަރު ރާއްޖޭގައި ބާއްވަން ނިންމާފައިވާކަން ވޯލްޑް ބޮޑީބިލްޑިން ފެޑެރޭޝަންގެ ރައީސް ދާތުކް ޕޯލް ޗުއާވެސް ވަނީ ޔަގީންކޮށްދެއްވާފަ އެވެ.
މިކަމާ ގުޅޭގޮތުން މަޝްވަރާކުރައްވަން ރާއްޖޭގެ ބޮޑީބިލްޑިން އެސޯސިއޭޝަންގެ އެކްސްކޯގެ ބޭފުޅުން ވަނީ އިންތިހާބީ ޑރ. މުހައްމަދު މުއިއްޒާ ބައްދަލު ކުރައްވައިފަ އެވެ. އަދި މި ބައްދަލުކުރެއްވުމުގައި އަންނަ އަހަރު ބާއްވަން ނިންމާފައިވާ މުބާރާތަށް ސަރުކާރުގެ ފުރިހަމަ އެއްބާރުލުން ލިބޭނެކަން ވަނީ ހާމަކުރައްވާފަ އެވެ.
ރާއްޖޭގައި މީގެ ކުރިން ވަނީ އޭޝިއަން ބޮޑީބިލްޑިން ޗެމްޕިއަންޝިޕާއި ސައުތު އޭޝިއަން ބޮޑީބިލްޑިން ޗެމްޕިއަންޝިޕްވެސް ބާއްވާފަ އެވެ. ދެ މުބާރާތުގައިވެސް ގައުމީ އެތުލީޓުން ރަނގަޅު ކާމިޔާބީތަކެއް ހޯދި އެވެ.
ގައުމީ ބޮޑީބިލްޑިން ޓީމް މިހާރު ތައްޔާރުވަމުން އަންނަނީ އަންނަ މަހު ދެކުނު ކޮރެއާގައި އޮންނަ 14 ވަނަ ބޮޑީބިލްޑިން ވޯލްޑް ޗެމްޕިއަންޝިޕަށެވެ. މި މުބާރާތަށް ނުކުންނައިރު މިދިޔަ އަހަރުގެ ދުނިޔޭގެ ބޮޑީބިލްޑިން ޗެމްޕިއަންޝިޕުގައި ރާއްޖޭގެ އަޒުނީން ރަޝާދު ވަނީ ރަން މެޑަލް ހޯދައިފަ އެވެ. މިއީ ވޯލްޑް ޗެމްޕިއަންޝިޕަކުން ރާއްޖޭގެ ކުޅިވަރަކުން ހޯދި ފުރަތަމަ ރަން މެޑައްޔެވެ.
އަޒްނީންގެ އިތުރުން ގައުމީ ޓީމްގެ މުހައްމަދު މޫސާ (މޯޑް) ވަނީ ވޯލްޑް ޗެމްޕިއަންޝިޕްގެ ބޮޑީ ބިލްޑިން 55 ކިލޯގެ ކެޓަގަރީގައި ވާދަކޮށް ރިހި މެޑަލް ހޯދައިފަ އެވެ. މީގެ އިތުރުން ހުސައިން ހިމްޔާން ވަނީ އެތުލެޓިކް ފީޒީކް އަޕްޓު 75 ސެންޓްމީޓާރުގެ ކެޓަގަރީގައި ވާދަކޮށް ލޯ މެޑަލް ހޯދައިފަ އެވެ.
ރާއްޖޭގެ ތަޖުރިބާކާރު ބޮޑީބިލްޑަރު ފަތުހުﷲ މުހައްމަދު ވެސް މިދިޔަ އަހަރުގެ ވޯލްޑް ޗެމްޕިއަންޝިޕުން ލޯ މެޑަލް ހޯދި އެވެ. އޭނާ ލޯ މެޑަލް ހޯދީ އެތުލެޓިކް ފިޒީކް 160 ސެންޓްމީޓަރުން ކެޓަގަރީން ނެވެ.
އެ މުބާރާތުގައި ވާދަކުރި އެންމެ އުއްމީދީ އެއް އެތުލީޓުކަމަށްވާ އަބްދުﷲ އަހުސަން ވެސް ވަނީ ލޯ މެޑަލް ހޯދައިފަ އެވެ. އަހުސަން ލޯ މެޑަލް ހޯދީ އެތުލެޓިކް ފިޒީކް 167 ސެންޓްމީޓަރު ކެޓަގަރީންނެވެ.
މީ އެތުލީޓުންގެ އިތުރުން މުބާރާތުގެ އެންމެ ވާދަވެރި އަދި ފޯރިގަދަ ކެޓަގަރީކަމަށްވާ ބޮޑީ ބިލްޑިން ސުޕަ 90 ކިލޯގެ ކެޓަގަރީގައި ވާދަކޮށް ރާއްޖޭގެ މިސްޓަ މޯލްޑިވްސް މުހައްމަދު ޔާމީން (ޔާންބެ)ވެސް ލޯ މެޑަލް ހޯދި އެވެ.
