މެޑްރިޑް (އޮކްޓޫބަރު 14) - ޔުއެފާ ޗެމްޕިއަންސް ލީގުގައި ރޭ އެތުލެޓިކޯ މެޑްރިޑުން 2-0 އިން މެންޗެސްޓާ ޔުނައިޓެޑް ބަލިކުރިއިރު، އާސެނަލާއި ބާސެލޯނާ އިން ކުޅުނު މެޗުތަކުން މޮޅުވެއްޖެ އެވެ.
ރަށުންބޭރުގައި ގަލަތަސަރާއި އަތުން ބާސެލޯނާ 4-1 އިން މޮޅުވީ ފަަހަތުން އަރަ އެވެ. އަދި، އަމިއްލަ ދަނޑުގައި އާސެނަލުން ވަނީ ފްރާންސްގެ ލިލް އަތުން 3-0 އިން މޮޅުވެފަ އެވެ.
އެތުލެޓިކޯގެ ވަންޑާ މެޓްރޮޕޮލިޓާނީ ސްޓޭޑިއަމްގައި ކުޅުނު މެޗުގެ 53 ވަަނަ މިނިޓްގައި އެތުލެޓިކޯ އިން ލީޑުނެގީ ޕަބްލޯ ބަރިއޯސް ޖެހި ލަނޑުންނެވެ. މިއީ، އަލެކްސް ބައޭނާ ދިން ބޯޅައަކުން ބަރިއޯސް ޖެހި ލަނޑެކެވެ. ޔުނައިޓެޑުން ނަތީޖާ ހަމަހަމަކުރެވޭތޯ މަސައްކަތްކުރަމުންދިޔައިރު، އެ ޓީމަށް މައްސަަލަ ދިމާވީ، މެޗުގެ 74 ވަނަ މިނިޓްގައި ލެނީ ޔޯރޯ އަށް ރަތެއް ދެއްކުމުންނެވެ. ޔޯރޯ އަށް ރަތެއް ދެއްކީ ވީޑިއޯ އެސިސްޓަންޓް ރެފްރީ (ވީއޭއާރް) އިން އަންގައިގެން ދަނޑުގައި ހުރި މޮނީޓަރުން ވެސް ބަަލައިގެންނެވެ.
ޔުނައިޓެޑްގެ ކުޅުންތެރިއަކު މަދުވިތާ ފަސް މިނިޓް ތެރޭ އެތުލެޓިކޯ އިން ދެ ވަނަ ލަނޑު ޖެހި އެވެ. މިއީ، އޭރިއާތެރެއިން ލިބުނު ފުރުސަތަކުން އަޑެމޯލާ ލުކްމަން، ރީބައުންސަކުން ޖެހި ގޯލެކެވެ. މިއީ، ޗެމްޕިއަންސް ލީގުގެ ލީގު ފޭސް އެއް ގޮތަށް ފުރަތަމަ ބުރު ކުޅެން ފެށި ފަހުން، އިނގިރޭސި ޓީމުތަކާ ދެކޮޅަށް ކުޅުނު 11 މެޗުގެ ތެރެއިން އެތުލެޓިކޯ އިން ހޯދި ފުރަތަމަ މޮޅެވެ.
ބާސެލޯނާ ކައިރިން ގަލަތަސަރާއި އިން ލީޑުނެގީ އަލެކްސޭ ބަޓްރަކޯވް ޖެހި ލަނޑުންނެވެ. ޖޮއާއޯ ކަންސޭލޯ ވަނީ ލަނޑު ޖަހައި ބާސެލޯނާ އަށް އެއްވަރުކޮށްދީފަ އެވެ. ބާސެލޯނާ މޮޅުވި ލަނޑުތައް ޖެހީ، ފާމިން ލޮޕޭޒް، އެންތަނީ ގޯޑަން އަދި ކަރީމް އަޑެޔޭމީ އެވެ. ބާސެލޯނާ އިން ވަނީ މި ސީޒަނުގައި އެ ޓީމުން ކުޅުނު ހުރިހާ މެޗަކުން މޮޅުވެފަ އެވެ.
ބާސެލޯނާ އިން މި މެޗުގައި ކުޅުނީ އަނިޔާގެ ސަބަބުން ރަފީނިއާ ނުލަ އެވެ.
މިދިޔަ ސީޒަނުގެ ޗެމްޕިއަންސް ލީގުގެ ފައިނަލުގައި ކުޅުނު އާސެނަލަށް ރޭ ލިލް ކޮޅަށް ފުރަތަމަ ހާފުގައި ލަނޑެއް ނުޖެހުނެވެ. ދެ ވަނަ ހާފުގައި އާސެނަލް މޮޅުކޮށްދިން ލަނޑުތައް ޖެހީ ޖޫރިއަން ޓިމްބާ. އެބެރެޗީ އެޒޭ އަދި ބުކާޔޯ ސަކާ އެވެ.
އިޓަލީގެ ޗެމްޕިއަން، އިންޓަ މިލާން އަތުން ބެލްޖިއަމްގެ ކްލަބް ބްރޫޖް ވަނީ 4-3 އިން މޮޅުވެފަ އެވެ. ނޯވޭގެ ވައިކިން އިން ޖަރުމަނުގެ ޗެމްޕިއަން، ބަޔާން މިއުނިިކް ކައިރިން ދެ ގޯލުގެ ލީޑެއް ނެގި މެޗު ނިމުނީ 3-3 އިން އެއްވަރުވެގެންނެވެ.
އިޓަލީގެ ނަޕޯލީ އަތުން ސްޕެއިންގެ ވިޔަރެއާލް ވަނީ 3-1 އިން މޮޅުވެފަ އެވެ. އަދި، ލައިޕްޒިގުން ވަނީ 1-0 އިން ޕީއެސްވީ އައިންދޯވަންގެ މައްޗަށް ކުރިހޯދައިފަ އެވެ.
ފްރާންސްގެ ލޯންސް އަތުން ޕޯޗުގަލްގެ ސްޕޯޓިން ލިޒްބަން 2-0 އިން މޮޅުވިއިރު، އަޒަރުބައިޖާންގެ ސަބާ އެފްސީން 2-0 އިން ވަނީ ސްލާވިއާ ޕްރާގު އަތުން މޮޅުވެފަ އެވެ. މިއީ، މީގެ ނުވަ އަހަރު ކުރިން ވުޖޫދުވި ސަބާ އަށް ޗެމްޕިއަންސް ލީގުގައި ލިބުނު ފުރަތަމަ މޮޅެވެ.
