ރިސޯޓު ލީގުގެ ޗެމްޕިއަނުންގެ މެދުގައި ކުޅޭ ސުޕަ ލީގުގެ ފުރަތަމަ މޮޅު ސަން ސިޔާމް އޮޅުވެލިން ހޯދައިފި އެވެ.
އޮޅުވެލީގައި އިއްޔެ ހަވީރު ކުޅުނު މެޗުގައި، ނޯތު މާލެ ޒޯން ޗެމްޕިއަން، އޮޅުވެލި ރިސޯޓް ޓީމުން ވަނީ 2-1 އިން ސައުތު މާލެ ޒޯން ޗެމްޕިއަން، ބަރޮސް މޯލްޑިވްސް އަތުން މޮޅުވެފަ އެވެ.
އިއްޔެގެ މެޗުގައި އޮޅުވެލީގެ ލަނޑުތައް ޖެހީ، މެޗުގެ މޮޅު ކުޅުންތެރިޔާ، މުހައްމަދު ވިގާމްގެ އިތުރުން އެ ޓީމުގެ، އަލީ ޝިއާއު އެވެ. މި މެޗުގައި ބަރޮސްގެ ހަމައެކަނި ލަނޑު ޖެހީ، މުހައްމަދު ސަހާއު އަލީ އެވެ.
ރިސޯޓް ސުޕަ ލީގުގައި ދެން ވާދަކުރަނީ، ނ. ޒޯނުގެ ޗެމްޕިއަން، ވެލާ ޕްރައިވެޓް އައިލެންޑް، ބ. ޒޯންގެ ޗެމްޕިއަން، ފިނޮޅު މޯލްޑިވްސް، އަރި ޒޯންގެ ޗެމްޕިއަން، ކޮންރެޑް މޯލްޑިވްސް ރަންގަލި އައިލެންޑް އަދި ދ. ޒޯންގެ ޗެމްޕިއަން، ސެއިންޓް ރެޖިސް ވޮއްމުލި އެވެ.
އޮޅުވެލި އާއި ބަރޮސް ކުޅޭ ދެ ވަނަ ލެގުގެ މެޗު މާދަމާ އޮންނާނެ އެވެ. އަދި، ދެން ސުޕަ ލީގުގައި އޮތީ، ވެލާ އާއި ފިނޮޅުން ބައްދަލުކުރާ ހޯމް އެންޑް އަވޭ މެޗާއި ކޮންރެޑް އާއި ވޮއްމުލިން ކުޅޭ ހޯމް އެންޑް އަވޭ މެޗެވެ.
ހޯމް އެންޑް އަވޭ މެޗުތައް ނިމުމަށް ފަހު، އެގްރިގޭޓުން އެންމެ ރަނގަޅު ނަތީޖާ ނެރޭ ޓީމަކަށް ފައިނަލުގެ ސީދާ ޖާގައެއް ލިބޭނެ އެވެ. އަދި، ދެ ވަނަ އަށް އެންމެ ރަނގަޅު އެގްރިގޭޓް ނެރޭ ޓީމަކާއި ތިން ވަނަ އަށް އެންމެ ރަނގަޅު އެގްރިގޭޓް ނަތީޖާ ހޯދާ ޓީމެއްގެ މެދުގައި ސެމީ ފައިނަލް މެޗެއް ކުޅޭނެ އެވެ.
ސެމީ ފައިނަލް އޮތީ މި މަހު 27 ވަނަ ދުވަހު އެވެ. އަދި، ފައިނަލް އޮތީ މި މަހު 29 ވަނަ ދުވަހު އެވެ.
މިދިޔަ އަހަރުގެ ރިސޯޓް ސުޕަ ލީގުގެ ފައިނަލުގައި ޖޯލި މޯލްޑިވްސްގެ މައްޗަށް ޕެނަލްޓީ ޖަހައިގެން ކުރިހޯދައި، ކޮންރެޑް މޯލްޑިވްސް ރަންގެލި އައިލެންޑުން މުބާރާތުގެ ޗެމްޕިއަންކަން ހޯދި އެވެ. ޖުމެއިރާ އޮޅަހާލި އައިލެންޑްގައި ކުޅުނު ފައިނަލް މެޗުގެ ފުރިހަމަ ވަގުތު ހަމަވިއިރު، މެޗުގެ ނަތީޖާ ވަނީ 1-1 އިން އެއްވަރުވެފަ އެވެ. އަދި، ނަތީޖާ ނެރެން ޕެނަލްޓީ ޖަހަން ޖެހުނުއިރު، ކޯންރެޑުން ވަނީ ހަތަރު ޕެނަލްޓީ ކާމިޔާބުކޮށްފަ އެވެ. ޖޯލި އަށް ދެ ޕެނަލްޓީ ވައްދާލެވުނުއިރު، ޕެނަލްޓީ ނިމުނީ، 4-2 އިން ކޮންރެޑް މޮޅުވެގެންނެވެ.
