މެޑްރިޑް (އޭޕްރީލް 4) - ސްޕެނިޝް ލީގުގައި ލީގުގައި ރޭ ރެލިގޭޝަން ޒޯނުގައި އޮތް މަޔޯކާ އިން އިތުރު ވަގުތުގެ ތެރޭގައި ޖެހި ގޯލުން 2-1 އިން ރެއާލް މެޑްރިޑް ބަލިކޮށްފި އެވެ.
މި ނަތީޖާއާ އެކު މަޔޯކާ އިން ރެލިގޭޝަން ޒޯނާ ދުރަށް ޖެހިލިއިރު، ރެއާލް ވަނީ ލީގުގެ ރޭހުގައި ބާސެލޯނާއާ ދެމެދު ފަރަގު ބޮޑުވެފަ އެވެ. ލީގުގެ ދެ ވަނައިގައި އޮތް ރެއާލުން އެއް ވަނައިގައި އޮތް ބާސެލޯނާ އަށް ވުރެން އެއް މެޗު އިތުރަށް ކުޅެގެން ވެސް އޮތީ ހަތަރު ޕޮއިންޓް ފަހަތުގަ އެވެ. ބާސެލޯނާ އަށް 29 މެޗުން 73 ޕޮއިންޓް ލިބިފައިވާއިރު, 30 މެޗުން ރެއާލަށް ލިބުނީ 69 ޕޮއިންޓެވެ. އަނެއްކޮޅުން, މަޔޯކާ, 17 ވަނައިގައި އޮތީ 30 މެޗުން 31 ޕޮއިންޓާ އެކު އެވެ.
އަމިއްލަ ދަނޑުގައި ކުޅުނު މަޔޯކާ އިން ވަނީ ފުރަތަމަ ހާފުގައި ލީޑުނަގައިފަ އެވެ. މި ލަނޑު މަޔޯކާ އަށް ޖަހައިދިނީ ފުރަތަމަ ހާފު ނިމެން ހަތަރު މިނިޓަށް ވެފައި ހުއްޓަ އެެވެ. އެ ގޮތުން, 41 ވަނަ މިނިޓްގައި, ޕަބްލޯ މަފެއޯ ނެގި ބޯޅައަކުން މި ލަނޑު ޖެހީ މަނޫ މޮނާލޭސް އެވެ.
ނަތީޖާ ހަމަހަމަކުރެވޭތޯ ރެއާލުން ކުރި މަސައްކަތް ކާމިޔާބުވީ މެޗުގެ ފުރިހަމަ ވަގުތު ހަމަވާން ދެ މިނިޓަށް ވެފައި ހުއްޓަ އެވެ. މިއީ, ޓްރެންޓް އަލެކްސަންޑަ އާނޯލްޑް ކޯނަރަކުން ނެގި ބޯޅައަކުން އެ ޓީމުގެ އެޑާ މިލިޓާއޯ ބޮލުން ޖެހި ގޯލެކެވެ.
ރެއާލުން ނަތީޖާ ހަަމަހަމަކުރިތާ މާއިރުތަކެއް ނުވެ, މަޔޯކާ އިން ވަނީ ރެއާލަށް ހައިރާންކަން ގެނުވައި, މެޗުން މޮޅުވި ލަނޑު ޖަހައިފަ އެވެ. އިތުރު ވަގުތުގެ ފުރަތަމަ މިނިޓްގައި މަޔޯކާ އަށް މި ލަނޑު ޖަހައިދިނީ ވެދާތު މުރީކީ އެވެ. މިއީ, މި ފަހަރުގެ ސީޒަނުގައި މުރީކީ ޖެހި 19 ވަނަ ގޯލެވެ.
ސްޕެނިޝް ލީގުގައި މިރޭ ބާސެލޯނާ އިން އެތުލެޓިކޯ މެޑްރިޑް ބަލިކޮށްފިނަމަ، ލީގުގެ އެއް ވަަނައިގައި ހަތް ޕޮއިންޓުގެ ލީޑެއް ލިބޭނެ އެވެ.
