ލަންޑަން (އޭޕްރީލް 4) - މި ފަހަރުގެ އިންޓަނޭޝަނަލް ބްރޭކަށް ދިއުމަށް ފަހު އެއް މެޗު ކުޅެފައި، އަނިޔާ އާއި ފިޓްނަސްގެ މައްސަލަތަކާ ހެދި އަވަހަށް އެނބުރި އައި އާސެނަލްގެ ކުޅުންތެރިންގެ ދިފާއުގައި އެ ޓީމުގެ ކޯޗު މިކޭލް އާޓެޓާ ވާހަކަ ދައްކައިފި އެވެ.
މިދިޔަ މަހުގެ އިންޓަނޭޝަނަލް ބްރޭކުގައި އިނގިރޭސި ޕްރިމިއާ ލީގުގެ 20 ކްލަބުން 228 ކުޅުންތެރިން ގައުމީ ޓީމުތަކުން ކޮލިފައިން އާއި އެކުވެރިކަމުގެ މެޗުތައް ކުޅެން ރިލީސްކުރަން ޖެހުނެވެ. އޭގެ ތެރެއިން، 23 ކުޅުންތެރިއަކު، މެޗެއް ކުޅުމަށް ފަހު، އެނބުރި ކްލަބަށް އައިއިރު، 11 ކުޅުންތެރިން ނިސްބަތްވަނީ އާސެނަލަށެވެ.
މިއީ، ރޭވިގެން އާސެނަލުން ސީޒަންގެ ބާކީ ބަަޔަށް ކުޅުންތެރިން ފިޓްކޮށް ބެހެއްޓުމަށް ކުރި ކަމަށް ބުނެ، އެކި ފަރާތްތަކުން ފާޑުކިޔަމުން އަންނައިރު، އާޓެޓާ ބުނީ، ގައުމީ ޓީމުތަކުން އެއް މެޗަށް ފަހު ވަކިވި ހުރިހާ ކުޅުންތެރިންގެ ކަންކަމާ ގުޅޭގޮތުން އާސެނަލުން ވާނީ އެ ޓީމުތަކާ އެކު ވަރަށް ރަނގަޅަށް މުއާމަލާތްކޮށްފައި ކަމަށެވެ.
"ހުރިހާ ގައުމީ ޓީމަކާ އަހަރެމެންނާ ދެމެދު ވަރަށް ރަނގަޅަށް ވާހަކަ ދެކެވިގެން މި ނިންމުންތައް މި އައީ، ކުޅުންތެރިން ދިގު ސީޒަނެއް ކުޅޭއިރު އެކި ކަހަލަ އިންޖަރީ އާއި ފިޓްނަސް ކަންކަން އަންނާނެ، މި ދައްކަނީ ޕްރޮފެޝަނަލް ކުޅުންތެރިންގެ ވާހަކަ،" އާޓެޓާ ބުންޏެވެ.
އާޓެޓާ ބުނީ، އާސެނަލްގެ ހުރިހާ ކުޅުންތެރިން ވެސް ގައުމީ ޓީމުތަކުން ވަކިވެ، ކްލަބަށް އެނބުރި އައީ ގައުމީ ޓީމާއި ކްލަބްގެ މެޑިކަލް ޓީމުން ފުރިހަމަ އަށް ހާލަތު ދެނެގަތުމަށް ފަހު ކަމަށެވެ. އަދި، މީގެ ފާޑުކިޔަން ޖެހޭ އެއްވެސް ސަބަބެއް އޮތް ކަމަށް ނުބެލެވޭ ކަމަށް އާޓެޓާ ވަނީ ބުނެފަ އެވެ.
ލީގު ކަޕް ފައިނަލުގައި މެންޗެސްޓާ ސިޓީ އަތުން ބަލިވި، އާސެނަލުން މިރޭ އެފްއޭ ކަޕްގެ ކުއާޓާ ފައިނަލުގައި ކުޅޭނީ ސައުތެމްޓަންއާ އެވެ.
