އަމްސްޓެޑަމް (މެއި 26) - ނެދަލޭންޑްސްގެ ޕީއެސްވީގެ ކޯޗުކަމުން ރޫޑް ވެން ނިސްޓެލްރޫއީ އިސްތިއުފާ ދީފައިވާ ކަމަށް އެ ކްލަބުން ބުނެފި އެވެ.
ކުރިން ނެދަލޭންޑްސްގެ ގައުމީ ޓީމާއި މެންޗެސްޓާ ޔުނައިޓެޑް އަދި ރެއާލް މެޑްރިޑަށް ކުޅުނު ފޯވަޑެއް ކަމަށްވާ ނިސްޓެލްރޫއީ މަގާމުން އިސްތިއުފާ ދިންއިރު، މިއީ ޕީއެސްވީ އަށް ގޯސް ސީޒަނެއް ވެސް ނޫނެވެ.
މި ސީޒަންގެ ކޭއެންވީބީ ކަޕް ކާމިޔާބުކޮށް، ނެދަލޭންޑްސް ލީގު ތާވަލްގެ ދެ ވަނައިގައި ޕީއެސްވީ މި ވަގުތު އޮތް ނަމަވެސް، މަގާމުން އިސްތިއުފާ ދޭން ޖެހުނީ ކްލަބުގެ ފަރާތުން "ސަޕޯޓް ނުލިބޭތީ" ކަމަށް ޓީމުގެ ކުޅުންތެރިންނާއި އޮފިޝަލުން ގާތުގައި ނިސްޓެލްރޫއީ ވަނީ ބުނެފައިވެ އެވެ.
ޕީއެސްވީން ބުނީ ނިސްޓެލްރޫއީ، 46، މަގާމުން އިސްތިއުފާ ދޭން ނިންމީ ކްލަބުގެ މެނޭޖްމަންޓާއި ބޯޑާއެކު ބޭއްވި ބައްދަލުވުންތަކަކަށް ފަހު ކަމަށެވެ.
"ވެން ނިސްޓެލްރޫއީގެ ނިންމުމާމެދު މި ކްލަބުން ދެރަވޭ އެކަމަކު އޭނާ ކޮށްދިން މަސައްކަތަށް ޝުކުރު އަދާކުރަން،" ޕީއެސްވީ އިން ނެރުނު ބަޔާނުގައި ބުނެފައިވެ އެވެ.
ވެން ނިސްޓެލްރޫއީ ވަނީ ޕީއެސްވީ އަށް 1998 އިން 2001 އިން ކުޅެފަ އެވެ. ޕީއެސްވީ ދޫކޮށް، ޔުނައިޓެޑަށް ބަދަލުވެ، އެ ކްލަބުގައި އޭނާ ފަސް އަހަރު ހޭދަކުރި އެވެ. އޭގެ ފަހުން އޭނާ ވަނީ ރެއާލް މެޑްރިޑާއި ހެމްބާގް އަދި މަލާގާ އަށް ކުޅެފައެވެ.
ވެން ނިސްޓެލްރޫއީގެ ކޯޗިން ކެރިއަރު 2014 ވަނަ އަހަރު ފެށީ ނެދަލޭންޑްސްގެ ގައުމީ ޓީމުގެ އެސިސްޓަންޓް ކޯޗެއްގެ ގޮތުގައެވެ. ޕީއެސްވީގެ ކޯޗިން ސްޓާފަށް އޭނާ ގެނައީ 2016 ވަނަ އަހަރެވެ. އަދި ހެޑް ކޯޗުކަމާ ހަވާލުވީ މި ސީޒަންގަ އެވެ.
