ލިވަޕޫލް (އޮކްޓޫބަރު 18) - އިނގިރޭސި ޕްރިމިއާ ލީގުގައި ރޭ އެވަޓަން އަތުން ޗެލްސީ މޮޅުވި މެޗުގައި އެ ޓީމުގެ ގޯލްކީޕަރު، އެމިލިއާނޯ މާޓިނޭޒަށް ލިބުނު އަނިޔާ އިން ރަނގަޅުވުމަށްޓަކައި، ދަތްދޮޅީގެ އޮޕަރޭޝަނެއް ކޮށްފި އެވެ.
އުމުރުން 34 އަހަރުގެ މާޓިނޭޒަށް އަނިޔާވީ އެވަޓަންގެ ޑިފެންޑަރު، ޖަރަޑް ބްރަންތުވެއިޓާ އެކު، ބޯޅަ އަށް އެރި ވަގުތު އެވެ. އަނިޔާވުމާ އެކު، މާޓިނޭޒަށް ދަނޑުމަތީގައި އަށް މިނިޓް ވަންދެން ފަރުވާ ދިނެވެ. ދެން، އޭނާ ހޮސްޕިޓަލަށް ގެންދިއުމަށް ފަހު ވަނީ އިތުރު ޓެސްޓްތަކެއް ހައްދައިފަ އެވެ. އަދި، ޓެސްޓްތަކުގެ ނަތީޖާ އިން އެނގުނީ، ދަތްދޮޅީގައި ރެނދެއްލާފައި އިން ކަމެވެ. އެއާ އެކު، ޗެލްސީގެ މެޑިކަލް ޓީމުގެ ލަފަޔާ އެކު އޮޕަރޭޝަނެއް ކުރީ އެވެ.
ކުރިން އާސެނަލާއި އެސްޓަން ވިލާ އަށް ކުޅުނު މާޓިނޭޒް، ސޯޝަލް މީޑިއާ އަށް ދޫކޮށްލި މެސެޖެއްގައި ބުނެފައިވަނީ، އިއްޔެގެ މެޗުން 2-0 އިން މޮޅުވިއިރު، ކޮޅަށް ލަނޑެއް ނުވައްދައި މެޗު ފުރިހަމަ ކުރެވުމުން ހިތްހަމަ ޖެހޭ ކަމަށެވެ. އަދި، އުންމީދަކީ އަވަހަށް ރިކަވާވެގެން ކުޅުމަށް އެނބުރި އައުން ކަމަށް މާޓިނޭޒް ވަނީ ބުނެފަ އެވެ.
މާޓިނޭޒްގެ ބަދަލުގައި އެވަޓަން މެޗުގެ ބާކީ ބައި ކުޅުނީ ބަދަލު ކީޕަރު މައިކް ޕެންޑާސް އެވެ. ބެލްޖިއަމްގެ ގެންކުން 20 މިލިއަން ޑޮލަރުގެ ފީ އަކަށް 2024 ވަނަ އަހަރު ޗެލްސީ އަށް ބަދަލުވި ޕެންޑާސް ވަނީ ބަދަލަކަށް އަރައި ރޭގެ މެޗުގައި ރަނގަޅު ކުޅުމެއް ދައްކައިފަ އެވެ.
ޗެލްސީން މާޓިނޭޒް ނުލައި ކުޅެން ޖެހޭ މެޗުތަކަށް ބަލާއިރު، އިނގިރޭސި ޕްރިމިއާ ލީގުގައި ޓޮޓެންހަމް ހޮޓްސްޕާސް އާއި މެންޗެސްޓާ ޔުނައިޓެޑާ ކުޅޭ މެޗުގެ އިތުރުން، ލީގު ކަޕްގައި ލިވަޕޫލާ ބައްދަލުކުރާ މެޗު ހިމެނެ އެވެ.
އާޖެންޓީނާ އަށް 2022 ވަނަ އަހަރުގެ ފީފާ ވޯލްޑް ކަޕް ޗެމްޕިއަންކަން ހޯދައިދިން ޓީމުގައި މޮޅު ކުޅުމެއް ދެއްކި މާޓީނޭޒް އަކީ، 2022 އާއި 2024 ވަނަ އަހަރު ފީފާ އިން ހޮވި އެންމެ މޮޅު ގޯލްކީޕަރެވެ.
އާސެނަލްގައި 2012 އިން 2020 އަށް ހޭދަކުރި މާޓިނޭޒް، އެ ކްލަބްގެ ކޮންޓްރެކްޓްގައި ހުރިއިރު، ލޯން ޑީލްތަކެއްގައި އޮސްފޯޑް ޔުނައިޓެޑާއި ޝެފީލްޑް ވެނެސްޑޭ، ރޮތަހަމް ޔުނައިޓެޑް، ވުލްވްސް، ގެޓަފޭ އަދި ރެޑިން އަށް ކުޅުނެވެ. އުމުރުން 28 އަހަރުގައި، 2020 ވަނަ އަހަރުގެ ސެޕްޓެމްބަރު މަހު، އެސްޓަން ވިލާ އަށް މާޓިނޭޒް ބަދަލުވީ 25 މިލިއަން ޑޮލަރުގެ ޑީލެއްގަ އެވެ.
އެސްޓަން ވިލާ އަށް މިދިޔަ ސީޒަނުގެ ޔޫރޮޕާ ލީގު ކާމިޔާބުކޮށްދޭން އެހީތެރިވި މާޓިނޭޒް ވަނީ އެ ޓީމުގައި ހޭދަކުރި ހަ ވަރަަކަށް އަހަރު ތެރޭ އެ ޓީމަށް 256 މެޗު ކުޅެދީފަ އެވެ. އޭނާ ވިލާއާ އެކު ހަދާފައި އޮތް އެއްބަސްވުން އޮތީ 2029 ވަނަ އަހަރުގެ ޖޫން މަހުގެ ނިޔަލަށެވެ. އެކަމަކު، މި ފަހަރުގެ ޓްރާންސްފާގައި، 10 މިލިއަން ޑޮލަރުގެ ޕެކޭޖެއްގައި ޗެލްސީ އަށް ސޮއިކުރީ އެވެ.
