ލަންޑަން (އޮކްޓޫބަރު 18) - އިނގިރޭސި ޕްރިމިއާ ލީގުގައި މިރޭ އާސެނަލުން 1-0 އިން ނޮޓިންހަމް ފޮރެސްޓް ބަލިކޮށް މުހިންމު މޮޅެއް ހޯދިއިރު، ލީޑްސް ޔުނައިޓެޑާ 1-1 އިން އެއްވަރުވެ، މެންޗެސްޓާ ޔުނައިޓެޑްގެ ދަށް ރެކޯޑް ދިގުލައިފި އެވެ.
ލީގުގެ ފުރަތަމަ ހަތް މެޗު ނިމުނުއިރު، ޔުނައިޓެޑަށް ލިބުނީ ހަތް ޕޮއިންޓެވެ. މިއީ، މިދިޔަ 40 އަހަރު ތެރޭ އެ ޓީމުން ލީގުގައި އެންމެ ދަށްކޮށް ފެށި ސީޒަނެވެ. ޔުނައިޓެޑް މި ވަގުތު އޮތީ 13 ވަނައިގަ އެވެ.
ކުޅުނު ހަތް މެޗުން ވެސް މޮޅުވެ، މެންޗެސްޓާ ސިޓީ 21 ޕޮއިންޓާ އެކު، އެއް ވަނައިގައި އޮތްއިރު، ދެ ވަނައިގައި އޮތް އާސެނަލަށް ވަނީ ހަތް މެޗުން 18 ޕޮއިންޓް ލިބިފަ އެވެ. ތިން ވަނައިގައި އޮތީ މިރޭ ކްރިސްޓަލް ޕެލަސް 5-0 އިން ބަލިކުރި ބްރަައިޓަން ހޯލްވް އެންޑް އަލްބިއަން އެވެ.
ލީޑްސްގެ އެލަން ރޯޑުގައި ކުޅުނު މެޗުގައި ޔުނައިޓެޑަށް ލީޑުނަގައިދޭން ބްރަޔަން އެމްބެއުމޯ އަށް ފުރަތަމަ ލިބުނު ފުރުސަތުން ބޮލުން ޖެހި ބޯޅަ ދިޔައީ ދަނޑިކައިރިން ބޭރުންނެވެ. އެކަމަކު، 35 ވަނަ މިނިޓްގައި ޔޫރީ ޓީލަމަންސް ގޯލު ކުރިމައްޗަށް ނަގައިދިން ބޯޅަ އެމްބެއުމޯ ވަނީ ގޯލަށް ވައްދާލައިފަ އެވެ. ދެ ވަނަ ހާފުގައި ލީޑްސް އަށް އެއްވަރުކޮށްދިން ލަނޑު އޭރިއާތެރެއިން ތަނަވަސްވި ފުރުސަތެއްގައި ޖަހައިދިނީ ޑޮމިނިކް ކަލްވެޓް-ލެވިން އެވެ.
ފޮރެސްޓްގެ ދަނޑުގައި އާސެނަލް މޮޅުވި ލަނޑު ޖެހީ މެޗުގެ ދެ ވަނަ ހާފުގަ އެވެ. މި ލަނޑު އެ ޓީމަށް ޖަހައިދިނީ ނޯނީ މަޑުއޭކޭ އެވެ. މެޗުގެ 80 ވަނަ މިނިޓްގައި ޑެކްލަން ރައިސް ދިން ބޯޅައަކުން މަޑުއޭކޭ ޖެހި ޝޮޓް ގޯލަށް ވަނީ ފޮރެސްޓް ކުޅުންތެރިއަކު ގައިގައި ޖެހިފަ އެވެ.
ނަތީޖާ ހަމަހަމަ ކުރަން ފޮރެސްޓުން ވަނީ މި މެޗުގައި ރަނގަޅު ފުރުސަތުތަކެއް ހޯދައިފަ އެވެ. އެ ގޮތުން، ޑިފެންޑަރު، މުރީލޯ އާސެނަލްގެ ތިން ކުޅުންތެރިން ކައިރިން ނައްޓާފައި ފޮނުވާލި ބޯޅަ ދިޔައީ ދަނޑިކައިރިން ބޭރުންނެވެ. އަދި، އާސެނަލްގެ ޑިފެންސް ފަހަތުން، ލިއަމް ޑެލަޕް އަށް ލިބުނު ބޯޅަ ފޮނުވާލުން ލަސްކުރުމުން ފުރުސަތު ގެއްލުނީ އެވެ.
ލީގުގައި މިރޭ ސަންޑަލެންޑުން ކުޅުންތެރިއަކު މަދުކޮށް ނިންމާލި މެޗުގައި ބޯންމައުތު މޮޅުވީ 2-0 އިންނެވެ.
