ސީރިއާ އާއި ތުރުކީގެ ގުޅުން ރަނގަޅު ކުރަން ރަޝިއާ މެދުވެރިވެގެން ރަސްމީ މަޝްވަރާތައް ފަށައިފި އެވެ.
ރަޝިއާގެ ޑިފެންސް މިނިސްޓަރު ސާގެއި ޝޮއިގޫ ބައިވެރިވެވަޑައިގަންނަވާ މަޝްވަރާގައި އިރާނުގެ މަންދޫބުން ވެސް ބައިވެރިވެ އެވެ.
ސީރިއާ އާއި ތުރުކީގެ ގުޅުން ކަނޑާލީ 2011 ވަނަ އަހަރު ސީރިއާގެ ދާހިލީ ހަނގުރާމަ ފެށި ދުވަސްވަރުގަ އެވެ.
އަންގާރަ ދުވަހުގެ ބައްދަލުވުމުގައި ރަޝިއާއިން އެންމެ ބޮޑަށް އިސްކަމެއް ދިނީ ސީރިއާގައި އުޅޭ ޓެރަރިސްޓް ހުރިހާ ގްރޫޕަކާ ދެކޮޅަށް ގުޅިގެން މަސައްކަތް ކުރުމުގެ މުހިއްމު ކަމަށެވެ.
މަޝްވަރާތަކުން ކުރިއެރުން ލިބި ސީރިއާ އާއި ތުރުކީއިން ގުޅުން ގާއިމްކޮށްފި ނަމަ، އެކަން ވާނީ ރަޝިއާގެ ހާރިޖީ ދާއިރާއަށް ހޯދޭ ބޮޑު ކުރިއެރުމަކަށެވެ.
ސީރިއާގެ 12 އަހަރުވީ ދިގު ދާހިލީ ހަނގުރާމައިގައި ރައީސް ބައްޝާރުލް އަސަދުގެ ފައުޖާާ ދެކޮޅަށް އުޅޭ ގްރޫޕްތަކަށް އެންމެ ބޮޑަށް ތާއީދުކުރާ އެއް ގައުމަކީ ތުރުކީ އެވެ.
ސީރިއާގެ އުތުރުގައި އުޅޭ ކުރުދީންނާ ދެކޮޅަށް ހަނގުރާމަ ކުރަން ތުރުކީގެ ސިފައިން ވެސް އެ ސަރަހައްދުގައި ހަރަކާތްތެރިވި އެވެ.
ދާދި ފަހުން ޗައިނާ މެދުވެރިވެގެން ސައުދީ އަރަބިއްޔާ އާއި އިރާނުން ވެސް ވަނީ ހަތް އަހަރުގެ މެދުކެނޑުމަކަށް ފަހު ޑިޕްލޮމެޓިކް ގުޅުން ގާއިމްކޮށްފަ އެވެ.
