ބޯލްޓިކް ކަނޑުގެ ސަރަހައްދުގައި ރަޝިޔާގެ މަނަވަރެއްގެ ހަރަކާތްތައް މޮނިޓަރު ކުރަމުންދިޔަ ޑެންމާކުގެ ހެލިކޮޕްޓަރަކާ ދިމާލަށް، އެ މަނަވަރުން ދެ "އިމަޖެންސީ ފްލެއާ" ފޮނުވާލާފައިވާ ކަމަށް ޑެންމާކުން ތުހުމަތުކޮށްފި އެވެ.
މިދިޔަ ހޯމަ ދުވަހު ހިނގި މި ހާދިސާއާ ގުޅިގެން ޑެންމާކު ސަރުކާރުން ވަނީ ރަޝިޔާއިން އެ ގައުމަށް ކަނޑައަޅާފައި ހުންނަ ސަފީރު ހާޒިރުކޮށްފަ އެވެ. ޑެންމާކުން ބުނާ ގޮތުގައި މި ހާދިސާ ހިނގާފައިވަނީ އާންމު އުސޫލުން ކުރިއަށްގެންދިޔަ މޮނިޓަރިން އޮޕަރޭޝަނެއްގެ ތެރެއިންނެވެ.
ބޮޑުވަޒީރު މެޓޭ ފްރެޑްރިކްސަން ރަޝިޔާގެ މި އަމަލު ސިފަކުރެއްވީ "ޒިންމާދާރުކަން ކުޑަ" އަމަލެއްގެ ގޮތުގަ އެވެ. އަދި މިއީ ބިރުދެއްކުމަށާއި ބައިބައިކުރުމަށް ރަޝިޔާއިން ގަސްދުގައި ކުރި ކަމެއް ކަމަށް އޭނާ ވިދާޅުވި އެވެ.
މި ހާދިސާ ވަރަށް ފުރިހަމައަށް ތަހުގީގު ކުރާނެ ކަމަށް ރަޝިޔާއިން ބުނި ނަމަވެސް، އެ ގައުމުން ވަނީ ޑެންމާކުގެ ހެލިކޮޕްޓަރުތަކުން ރަޝިޔާގެ މަނަވަރުތަކާ ކައިރިން "ނުރައްކާތެރި ހަރަކާތްތަކެއް" ހިންގާފައިވާ ކަމަށް ބުނެ ރައްދު ތުހުމަތުތަކެއް ކޮށްފަ އެވެ.
މި ހާދިސާ ހިނގާފައިވަނީ ލިތުއޭނިއާގެ މަތިން ދަތުރުކުރި ޑްރޯނެއް ނޭޓޯގެ ފައުޖުތަކުން ވައްޓާލި ދުވަހު އެވެ. ރަޝިޔާ އާއި ޔޫކްރެއިނާ ދެމެދު ފަށާފައިވާ ހަނގުރާމައާ ގުޅިގެން ނޭޓޯގެ އިރުމަތީ ބިތުގެ ގައުމުތަކުގައި މަސްރަހު ވަނީ ވަރަށް ބޮޑަށް ނުތަނަވަސްވެފަ އެވެ.
ބޯލްޓިކް ކަނޑުގައި ހިނގި މި ހާދިސާގެ ތަފްސީލު ހާމަކުރަމުން ޑެންމާކުގެ އަސްކަރިއްޔާއިން ނެރުނު ބަޔާނެއްގައި ބުނީ، ގެޑްސާ ކައިރީގައި އޮންނަ ބައިނަލްއަގުވާމީ ކަނޑުގެ ސަރަހައްދުގައި އޮތް ރަޝިޔާގެ ފްރިގޭޓެއްގެ ފޮޓޯ ނެގުމުގެ މަސައްކަތުގައި އުޅުނު އެއާފޯސްގެ "ފެނެކް" މޮޑެލްގެ ހެލިކޮޕްޓަރަކަށް އަމާޒުކޮށް ފްލެއާ ފޮނުވާލާފައިވާ ކަމަށެވެ.
ހެލިކޮޕްޓަރަށް އަމާޒުކޮށް ފޮނުވާލި ދެ ފްލެއާގެ ތެރެއިން އެކަތި ދިޔައީ ހެލިކޮޕްޓަރާ ވަރަށް ކައިރިން ކަމަށް ވެސް އެ ބަޔާނުގައި ބުނެފައިވެ އެވެ.
ޑެންމާކުގެ ފޮރިން މިނިސްޓްރީން މި ހާދިސާ ސިފަކޮށްފައިވަނީ "އެއްގޮތަކަށްވެސް ބަލައިގަނެވޭނެ ކަމެއް ނޫން" ކަމަށެވެ.
ރަޝިޔާގެ ސަފީރު ވްލަޑިމިއާ ބާބިން ނެރުއްވި ބަޔާނެއްގައި ވިދާޅުވީ، މި ހާދިސާ ހިނގަން މެދުވެރިވި ހުރިހާ ހާލަތެއް މޮސްކޯއިން ވަރަށް ފުރިހަމައަށް ތަހުގީގު ކުރާނެ ކަމަށެވެ. ނަމަވެސް ޑެންމާކުގެ ހެލިކޮޕްޓަރުން ހިންގާފައިވަނީ "އިސްވެ ގަނާކުރުމުގެ" އަމަލުތަކެއް ކަމަށް އޭނާ ތުހުމަތު ކުރެއްވި އެވެ.
ބާބިން ވިދާޅުވި ގޮތުގައި ޑެންމާކުގެ އެއާފޯސް ހެލިކޮޕްޓަރުތަކުން ރަޝިޔާގެ މަނަވަރުތަކާ ކައިރިން ނުރައްކާތެރި ހަރަކާތްތައް ހިންގުމަކީ މިއީ ފުރަތަމަ ފަހަރެއް ނޫނެވެ.
މިދިޔަ އަހަރު ވެސް މިފަދަ ހާދިސާއެއް ހިނގައިގެން ޝަކުވާ ހުށަހަޅާފައިވާނެ ކަމަށާއި، މިފަހަރުގެ ހާދިސާއިން އެނގެނީ މުއާމަލާތް ކުރުމުގެ މައްސަލަ އުޅެނީ ރަޝިޔާގެ ކަނޑުގެ ސިފައިންގެ ނޫން ކަމަށާއި، އެއީ ޑެންމާކުގެ މައްސަލައެއް ކަމަށް އޭނާ ވިދާޅުވި އެވެ.
ޔޫރަޕިއަން ކޮމިޝަނުގެ ރައީސާ އުރުސުލާ ފޮން ޑަ ލޭޔަން ސޯޝަލް މީޑިއާގައި ކުރެއްވި ޕޯސްޓެއްގައި ވިދާޅުވީ ރަޝިޔާގެ މި އަމަލަކީ "ޒިންމާދާރުކަން ކުޑަ އަދި ނުރައްކާތެރި" އަމަލެއް ކަމަށެވެ.
މި ހާދިސާއާއި ލިތުއޭނިއާގެ މަތިން ފެނުނު ޑްރޯންގެ ހާދިސާއަކީ ޔޫރަޕާ ދެކޮޅަށް ރަޝިޔާއިން ހިންގާ އިސްވެ ހަމަލާދިނުމުގެ ބޮޑު ސިޔާސަތެއްގެ ބައެއް ކަމަށް ވެސް އޭނާ އިތުރަށް ވިދާޅުވި އެވެ.
ހޯމަ ދުވަހުގެ ރޭގަނޑުގެ ވަގުތެއްގައި، ލިތުއޭނިއާގެ ވައިގެ ސަރަހައްދަށް ވަތް ޑްރޯނެއް ނޭޓޯގެ ފައިޓަރު ޖެޓުތަކުން ވަނީ ވައްޓާލާފަ އެވެ.
ކަމާބެހޭ ފަރާތްތަކުން ބުނާ ގޮތުގައި އެ ޑްރޯން ލިތުއޭނިއާގެ ދެވަނައަށް އެންމެ ބޮޑު ސިޓީ ކަމަށްވާ ކައުނަސް ކައިރިން އެ ގައުމުގެ ދެކުނު ސަރަހައްދަށް ވަދެފައިވަނީ އަންގާރަ ދުވަހު އަވަށްޓެރި ބެލަރޫސްއާ ދިމާލުންނެވެ،
އެ ޑްރޯނަކީ ކޮން ގައުމެއްގެ އެއްޗެއްކަން އަދި ކަށަވަރު ނުވާ ކަމަށް ލިތުއޭނިއާގެ ނޭޝަނަލް ކްރައިސިސް މެނޭޖްމަންޓް ސެންޓަރުން ބުނި ނަމަވެސް، އެ ގައުމުގެ ރައީސް ވަނީ ފަހަކަށް އައިސް ރަޝިޔާގެ އަމަލުތައް ނުރައްކާވަމުންދާކަން ފާހަގަކުރައްވާފަ އެވެ.
