ފުލުހުންގެ މުއައްސަސާ އިތުރަށް ހަރުދަނާ ކުރަން އިލްމީ ރަނގަޅު ދިރާސާތަކެއް މުހިންމު ކަމަށް ހޯމް މިނިސްޓަރު އިމްރާން އަބްދުﷲ މިއަދު ވިދާޅުވެއްޖެ އެވެ.
މިއަދު ދަރުބާރުގޭގައި ފެށި ޕޮލިސް ރިސާޗް އެންޑް އިނޮވޭޝަން ކޮންފަރެންސްގައި ވާހަކަ ދައްކަވަމުން އިމްރާން ވިދާޅުވީ، ފުލުހުންގެ މުއައްސަސާ އިތުރަށް ހަރުދަނާކުރެވޭނީ ރަނގަޅު އިލްމީ ދިރާސާތަކެއް ކޮށްގެން ކަމަށެވެ.
"މިއަދު މިމަސައްކަތް ފެށިގެންދާއިރު ފުލުހުންގެ މަސައްކަތް ހަރުދަނާކޮށް ތަރުތީބުކުރުމަށް ދިހަ ފަރާތަކުން ރިސާޗްކޮށް ޕޭޕަރު ހުށަހެޅުމަކީ އަޅުގަނޑުމެންގެ މިމަގަށް އަލިކޮށްދޭނެ ވަރަށްބޮޑު އަލިކަމެއް. ފުރަތަމަ ފަހަރަށް ފުލުހުންގެ ހިދުމަތް ބައްޓަން ކުރަންވީ ގޮތް ރައްޔިތުން އެކުވެ ގުޅިގެން ދިރާސާވެރިންގެ ހޯދުންތަކާއެކު ހުށަހަޅައިދިނުމަކީ ރާއްޖޭގައި ކުރެވޭ އާ ތަޖުރިބާއެއް،" މިނިސްޓަރ ވިދާޅުވި އެވެ.
މިއަދު ފެށި ޕޮލިސް ރިސާޗް އެންޑް އިނޮވޭޝަން ކޮންފަރެންސަކީ މި ދިގު މަގަށް ފުލުހުންގެ މުއައްސަސާ ގޮވައިގެން ދަތުރުކުރަން ނިކުމެ ތިއްބެވި މާލިމީންނަށް މަގުދައްކައިދޭނެ "އަލިގަދަ ބައްތިއަކަށް" ވެގެންދާނެ ކަމަށް ވެސް އިމްރާން ވިދާޅުވި އެވެ.
އިމްރާން ވިދާޅުވީ ދިވެހި ފުލުހުންނަށް ރައްޔިތުންގެ ފުރިހަމަ އިތުބާރާއި އިހުތިރާމާއި ލޯބި ހޯދުމަށް ކުރަންޖެހިފައިވާ މަސައްކަތަކީ ނިޒާމީ ގޮތެއްގައި ވަރަށް ތަރުތީބުކުރެވިގެން ކުރަންޖެހިފައިވާ ދަތި ގޮންޖެހުންބޮޑު އުނދަގޫ މަސައްކަތެއް ކަމަށެވެ. އެމަންޒިލަށް ވާސިލްވުމަށްޓަކައި "ކަށިތަކުން ފުރިގެންވާ" ދިގުރާސްތާއެއް ކަޑައްތުކުރަންޖެހޭ ކަމަށް ވެސް މިނިސްޓަރު ވިދާޅުވި އެވެ.
މިއަދު ފެށި ކޮންފަރެންސް ތިން ދުވަހުގެ މުއްދަތަށް ކުރިއަށް ގެންދިއުމަށް ވަނީ ނިންމައިފަ އެވެ. މި ކޮންފަރެންސަށް ފުލުހުންގެ ހިދުމަތް އިތުރަށް ހަރުދަނާ ކުރެވޭނެ ގޮތްތަކުގެ މައްޗަށް ބަލާފައިވާ 10 ދިރާސާ ކަރުދާހެއް ހުށަހަޅާނެ އެވެ. އަދި ފުލުހުންގެ ހިދުމަތް އިތުރަށް ހަރުދަނާ ކުރެވޭނެ ގޮތްތަކާ ގުޅޭގޮތުން ފުޅާ ދާއިރާއެއްގައި މަޝްވަރާކުރާނެ އެވެ.
