ހުޅުމާލެ ސްޓެލްކޯއާ ދިމާލުން ފަޅުތެރެއަށް ފޭބި ދިވެހި ފިރިހެނަކު ގެއްލިގެން ހޯދަމުން ދަނިކޮށް މިއަދު ހެނދުނު މަރުވެފައި އޮއްވާ ފެނިއްޖެ އެވެ.
ފުލުހުން ބުނީ ވަލެއް އެއްސުމަށް މޫދަށް ފޭބި މީހަކު ގެއްލިގެން ރިޕޯޓުކުރީ އިއްޔެ އިރުއޮއްސި 6:30 ހާއިރު ކަމަށެވެ. އެއާއެކު އެ މީހާ ހޯދުމުގެ މަސައްކަތް ކުރީ ފުލުހުންނާއި ސިފައިން ގުޅިގެންނެވެ.
މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް) އިން ބުނީ އެ މީހާ މޫދަށް ފޭބީ "ހުޅުލޭ ސީ ޕްލޭން ޓާމިނަލްގެ އުތުރުން އޮންނަ ފަޅުގައި އަޅާފައި އޮތް ތެޔޮ ބާޖަކުން" ކަމަށެވެ.
އެ މީހާ ހޯދުމުގެ މަސައްކަތުގެ ތެރެއިން މޫދު އަޑިން ހަށިގަނޑު ފެނުނީ މިއަދު ހެނދުނު 8:25 ހާއިރު ކަމަށް މީޑިއާތަކަށް ފޮނުވި މެސެޖެއްގައި ފުލުހުން ބުންޏެވެ.
ފުލުހުން ބުނީ ހުޅުމާލެ ހޮސްޕިޓަލަށް ގެންދިޔައިރު ވެސް މީހާ މަރުވެފައިވާ ކަމަށް އެ ހޮސްޕިޓަލުން މައުލޫމާތު ދިން ކަމަށެވެ.
މި ހާދިސާގައި މަރުވެފައި ވަނީ ކ.ގުރައިދޫ، ރަތްވިލާގެ، އިބްރާހިމް ޝާކިރު، 48، ކަމަށް ފުލުހުން ބުންޏެވެ.
ފުލުހުން އިތުރަށް ބުނީ މި ހާދިސާ ތަހުގީގު ކުރަމުންދާ ކަމަށެވެ.
