ސީރިއާގެ މެދުތެރޭގެ ސަހަރާގައި އިސްލާމިކް ސްޓޭޓް (އައިއެސް) އިން ދިން ޓެރަރިސްޓު ހަމަލާއެއްގައި 53 މީހުން މަރުވެފައިވާ ކަމަށް އެ ގައުމުގެ ދައުލަތުގެ ޓީވީއިން ހުކުރު ދުވަހު ރިޕޯޓުކޮށްފި އެވެ.
އެ ހަމަލާގެ ޒިންމާ އައިއެސްއިން އުފުލާފައެއް ނުވެ އެވެ. އެހެން ނަމަވެސް ސީރިއަން އޮބްޒަވޭޓަރީ ފޯ ހިޔުމަން ރައިޓްސްއިން ބުނީ ޕަލްމީރާ ސަރަހައްދުގައި އައިއެސްއިން ހުކުރު ދުވަހު ހަމަލާ ދީ 36 މީހުން މަރާލި ކަމަށެވެ.
ބައެއް މީހުން ހަމަލާއިން ސަލާމަތްވި ކަމަށް އެ ޖަމިއްޔާއިން ބުންޏެވެ. ސީރިއާގެ މެދުތެރެ އާއި އިރުއުތުރު އަދި އިރުމަތީ ހިސާބުތަކުގައި އައިއެސްއިން ދޭ ހަމަލާތަކުގެ ޝިކާރައަކަށް ގިނައިން ވަނީ އަންހެނުންނާއި ކުޑަކުދިންނެވެ.
ސީރިއަން އޮބްޒަވޭޓަރީ ފޯ ހިޔުމަން ރައިޓްސްއިން ބުނީ ހޮނިހިރު ދުވަހު ވެސް އައިއެސްއިން ހަމަލާއެއް ދިން ކަމަށާއި އެ ހަމަލާގައި 16 މީހުން މަރުވި ކަމަށެވެ.
އޭގެ އިތުރުން ގިނަ ބަޔަކު ރަހީނުކޮށްފައިވާ ކަމަށާއި 25 މީހުން މިނިވަން ކުރި އިރު، ބާކީ ތިބި މީހުންގެ ހާލަތު ސާފު ނުވާ ކަމަށް އެ ޖަމިއްޔާއިން ބުންޏެވެ.
ސީރިއާ އާއި އިރާގުގެ ބިމުގެ ސަރަހައްދު ހިފައިގެން އުޅުނު އައިއެސް ޓެރަރިސްޓް ގްރޫޕް ހަނގުރާމައިން ބަލިވީ މާޗް 2019 ގައި ބައިނަލްއަގްވާމީ އަސްކަރީ ކޯލިޝަނެއްގެ މަސައްކަތުންނެވެ.
އެހެން ނަމަވެސް އެ ގްރޫޕްގެ ބައެއް ޔުނިޓުތައް ސީރިއާގެ ސަހަރާގެ ހިސާބުތަކުގައި އަދިވެސް ހަރަކާތްތެރިވެ އެވެ. އެގޮތުން ކުރުދީންނާއި ސީރިއާގެ ސިފައިންގެ އިތުރުން އިރާގުގައި ވެސް ހަމަލާތައް އަމާޒުކުރެ އެވެ.
ސަހަރާގައި އައިއެސް ޔުނިޓުތައް ބަލިކުރުމަށް ސީރިއާ އާއި ރަޝިއާގެ ސިފައިން އަދިވެސް ދަނީ ދޭތެރެ ދޭތެރެއިން ވައިގެ ހަމަލާތައް ޓެރަރިސްޓުންނަށް ދެމުންނެވެ.
