ސީރިޔާގައި 14 ވަރަކަށް އަހަރަށް ދިގުދެމިގެންދިޔަ ދާހިލީ ހަނގުރާމައިގެ ތެރޭގައި ހިންގާފައިވާ ޖަރީމާތަކުގެ ކުށް ސާބިތުވެ، އެ ގައުމުގެ ކުރީގެ ރައީސް ބައްޝާރުލް އަސަދު މަރަން ހުކުމްކޮށްފި އެވެ.
ދިމިޝްގުގެ ކްރިމިނަލް ކޯޓުން މިއަދު ކުރި ހުކުމުގައި ވަނީ ރާވައިގެން މީހުން މެރުމާއި އަނިޔާކުރުމާއި އިންސާނިއްޔަތާ ހިލާފު ޖަރީމާތައް ހިންގިކަމުގެ ކުށް ބައްޝާރުލް އަސަދުގެ މައްޗަށް ސާބިތުވާ ކަމަށެވެ.
ބައްޝާރުލް އަސަދު މަރަން ހުކުމްކުރީ އޭނާގެ ޣައިރު ހާޒިރުގަ އެވެ. 2024 ވަނަ އަހަރުގެ ޑިސެމްބަރު މަހު ވެރިކަމުން ދުރުކުރުމުން އަސަދު މިހާރު ދިރިއުޅުއްވަމުން ގެންދަވަނީ ރަޝިއާގައި ހިމާޔަތް ހޯއްދަވައިގެންނެވެ.
އަސަދުގެ އިތުރުން، އޭނާގެ ކޮއްކޮ މާހިރުލް އަސަދު އާއި ބޮޑުބޭބެ ދަރިފުޅު އާތިފް ނަޖީބުގެ މައްޗަށް ވެސް ވަނީ ރާވައިގެން މީހުން މެރުމާއި އަނިޔާކުރުމުގެ ކުށް ސާބިތުވެ، މަރަން ހުކުމްކޮށްފަ އެވެ. އޭގެ ތެރެއިން މާހިރުލް އަސަދު ވެސް މިހާރު ދިރިއުޅެމުންދަނީ ރަޝިއާގަ އެވެ. ނަޖީބު ހުރީ ސީރިއާގެ ޖަލުގަ އެވެ. އޭނާ ހައްޔަރުކުރީ މި އަހަރުގެ ޖެނުއަރީ މަހުގެ ތެރޭގަ އެވެ.
ނަޖީބުއަކީ ސީރިއާގެ ދާހިލީ ހަނގުރާމަ ފެށުނު ސަބަބުކަމުގައިވާ، ދެކުނު ސީރިއާގެ ދަރައާ ޕްރޮވިންސްގެ މުޒާހަރާގެ ބައިވެރިންނާ ދެކޮޅަށް ހިންގި ލޭއޮހޮރުވުން ރޭވި މީހާ އެވެ. އޭރު އޭނާ ހުރީ ދަރައާ ޕްރޮވިންސްގެ ޕޮލިޓިކަލް ސެކިއުރިޓީގެ ވެރިޔާގެ މަގާމުގަ އެވެ.
މިއަދު ހުކުމް އިއްވިއިރު، ޝަރީއަތުގެ މަޖިލީހުގައި އޭނާ ހުރީ ދަގަނޑު ކޮށްޓެއްގައި ގައިދީންގެ ޔުނިފޯމުގަ އެވެ.
ނަޖީބުގެ މައްޗަށް ސާބިތުވި ކުށްތަކުގެ ތެރޭގައި މީހުން މެރުމާއި، "15 އަހަރުން ދަށުގެ ކުޑަކުދިން ގަސްދުގައި މެރުމާއި" އަދި "މީހަކު މަރުވާ މިންވަރަށް އަނިޔާކުރުން" ހިމެނެއެވެ.
އެމީހުންގެ މައްޗަށް ހުކުމް އިއްވެވި ފަނޑިޔާރު ފަހުރުއްދީން އަލް އަރްޔާން ވިދާޅުވީ، ނަޖީބު އޭނާގެ މައްޗަށް ކުރެވުނު ހުރިހާ ދައުވާތަކަށް އިންކާރުކޮށްފައިވާ ކަމަށާއި، އޭނާ ކުރި ކަންތައްތަކާ މެދު އެއްވެސް ވަރަކަށް ދެރަނުވާ ކަމަށެވެ.
ސީރިޔާ ދޫކޮށް ފިލައިގެން ގޮސްފައިވާ ކުރީގެ އަސްކަރީ އަދި ސަލާމަތީ އިސް އޮފިޝަލުންތަކެއްގެ މައްޗަށް ވެސް އެމީހުންގެ ޣައިރު ހާޒިރުގައި މަރުގެ ހުކުމް މިއަދު ވަނީ އިއްވާ[ައިފަ އެވެ. އޭގެ ތެރޭގައި ކުރީގެ ޑިފެންސް މިނިސްޓަރު ފަހުދު އަލް ފްރައިޖް އާއި 2011 ވަނަ އަހަރު ދިރާއާ ޕްރޮވިންސްގެ މިލިޓަރީ އިންޓެލިޖެންސްގެ ވެރިޔަކަށް ހުރި ލުއައްޔު އަލް އަލީ ހިމެނެ އެވެ.
އެ ހުރިހާ އެންމެންގެ މައްޗަށް ހުކުމް އިއްވި ވަގުތު، އަސަދުގެ ވެރިކަމުގައި ލާއިންސާނީ އަނިޔާގެ ޝިކާރައަށްވި މީހުންގެ ފޮޓޯތައް ހިފައިގެން ދިމިޝްގުގެ ކްރިމިނަލް ކޯޓުދޮށުގައި އެތައް ބަޔަކު ތިއްބެވެ.
