ހަރުކަށި ފިކުރާއި ޓެރަރިޒަމްގެ މައްސަލައެއްގެ ތަހުގީގަށް ބޭނުންވާ ދެ މީހަކު ނުފެނިގެން ހޯދަން އިއުލާނުކޮށްފި އެވެ.
ފުލުހުން ހޯދަން އިއުލާނު ކުރި ދެ މީހުންނަކީ ގއ.ކަނޑުހުޅުދޫ، ނިއުޒިލް، ޝިހާނު އަހުމަދު، 27، އާއި ށ. ކޮމަންޑޫ، ހިޔަލީގޭ، އިބްރާހިމް އަޒުހަދު، 36، އެވެ.
ފުލުހުން ކުރި އިއުލާނުގައި ބުނެފައި ވަނީ އެ ދެ މީހުންނަކީ އުޅޭ ވަކި ތަނެއް ނޭނގޭ ދެ މީހުން ކަމަށާއި އެހެންވެ މައްސަލައިގެ ތަހުގީގަށް ހާޒިރުވާން ރައްދު ކުރަންޖެހޭ ޗިޓު އެ ދެ މީހުންނާ ހަވާލު ކުރެވިފައިނުވާ ކަމަށެވެ.
މިއަދު ހޯދަން އިއުލާނު ކުރި ދެ މީހުންގެ ތެރެއިން ޝިހާންއަކީ މީގެ ކުރިން މަކަރާއި ހީލަތުގެ މައްސަލައެއްގައި ވެސް ފުލުހުން ހޯދަން އިއުލާނު ކުރި މީހެކެވެ. އަދި ގާނޫނު ތަންފީޒު ކުރަން ދަތި ކުރި މައްސަލައެއްގައި އޭނާ މީގެ ހަ އަހަރު ކުރިން ހައްޔަރު ވެސް ކުރި އެވެ.
