ޕާކިސްތާނުގެ ހުޅަނގު އުތުރުގައި ހުންނަ ފުލުހުންގެ މަރުކަޒެއްގެ ތެރޭގައި ހުރި މިސްކިތަކަށް އަމާޒުކޮށް ކާރު ބޮމަކުން ދިން ހަމަލާއެއްގައި މަދުވެގެން 21 މީހުން މަރުވެ، 100 އަށް ވުރެ ގިނަ މީހުން ޒަހަމްވެއްޖެ އެވެ.
ޕާކިސްތާނުގެ އޭޕީޕީ ނިއުސް އެޖެންސީން ރިޕޯޓްކޮށްފައިވާ ގޮތުގައި، ހައިބަރު ޕަހްތޫންހުވާ ޕްރޮވިންސްގެ ކޯހާޓް ސިޓީގައި ހުންނަ ފުލުހުންގެ މަރުކަޒަށް ދިން މި ހަމަލާގައި މަރުވި މީހުންގެ ތެރޭގައި ފުލުހުންގެ 15 އޮފިސަރުންނާއި ހަތަރު އަހަރުގެ ކުޑަކުއްޖަކު ހިމެނެ އެވެ. މި ހަމަލާގައި ބަޑި ހިފައިގެން ތިބި ހަނގުރާމަވެރިން ފުލުހުންގެ މަރުކަޒަށް ބަޑީގެ ހަމަލާތަކެއް ވެސް ދީފައިވެ އެވެ.
އެ ސަރަހައްދުގެ ފުލުހުން ތުހުމަތުކުރާ ގޮތުގައި މި ހަމަލާގެ ފަހަތުގައި ވަނީ ޕާކިސްތާނީ ތާލިބާނުންގެ ނަމުން މަޝްހޫރުވެފައިވާ ތަހްރީކޭ ތާލިބާން ޕާކިސްތާން (ޓީޓީޕީ) ގެ ގޮތްޕެކެވެ.
ފުލުހުން ބުނި ގޮތުގައި، ގޮވާތަކެތި އަރުވައިގެން ދިޔަ ކާރު މިސްކިތުގެ ދޮރުމަތީގައި ގޮއްވާލާފައިވަނީ އެ ގައުމުގެ ގަޑިން މެންދުރުފަހު 13:15 ހާއިރު އެވެ. އެ ވަގުތަކީ މިސްކިތުގައި ހުކުރު ނަމާދު ކުރަމުންދިޔަ ވަގުތެވެ.
ފުލުހުންގެ ތަރުޖަމާނަކު ވިދާޅުވި ގޮތުގައި، ބޮން ގޮއްވާލުމަށްފަހު ހިނގި ބަޑީގެ ހަމަލާތަކުގައި ހަމަލާދިން މީހުންގެ ތެރެއިން މަދުވެގެން ހަ މީހަކު ވަނީ މަރާލާފަ އެވެ.
ދެހާސް ހަތް ވަނަ އަހަރު އުފެއްދި ޓީޓީޕީ ޖަމާއަތަކީ އަލްގައިދާ އާއި އަފްގާނިސްތާނުގެ ތާލިބާނުންނާ ގުޅުން އޮންނަ ބައެކެވެ.
ޕާކިސްތާނުގެ ރައީސް އާސިފް އަލީ ޒަރުދާރީ ނެރުއްވި ބަޔާނެއްގައި، މި ހަމަލާގައި ޒަހަމްވި މީހުންނަށް އަވަސް ޝިފާއަކަށް އެދިވަޑައިގެންފައިވެ އެވެ. އަދި ބޭރުގެ އެހީތެރިކަން ލިބިގެން ހަރަކާތްތެރިވާ ޓެރަރިސްޓުން މުޅިން ނައްތާލުމަށް އެމަނިކުފާނު ވަނީ ގޮވާލައްވާފަ އެވެ.
އދ. ގެ ސެކްރެޓަރީ ޖެނެރަލް އެންޓޯނިއޯ ގުޓަރޭޒް ވަނީ މި ބޮމުގެ ހަމަލާ ހަރުކަށި އިބާރާތުން ކުށްވެރިކުރައްވާފަ އެވެ. އަދި އާންމު ރައްޔިތުންނާއި އަޅުކަންކުރާ ތަންތަނަށް އަމާޒުކޮށްދޭ ހަމަލާތަކަކީ ބަލައިގަނެވޭނެ ކަންކަމެއް ނޫން ކަމަށް ވެސް އޭނާ ވިދާޅުވި އެވެ.
މިދިޔަ ފެބްރުއަރީ މަހު އިސްލާމްއާބާދުގެ ޝިއައީ މިސްކިތަކަށް ދިން ހަމަލާ ހިމެނޭހެން، ޕާކިސްތާނުގައި ދިން ސިލްސިލާ ހަމަލާތަކުގެ ފަހަތުގައި ވަނީ ޕާކިސްތާނީ ތާލިބާނުން ކަމަށް އޮފިޝަލުން ވަނީ ތުހުމަތުކޮށްފަ އެވެ. އެ ހަމަލާގައި 30 އަށް ވުރެ ގިނަ މީހުން މަރުވި އެވެ.
ފަހަކަށް އައިސް ޕާކިސްތާނުގެ ބޯޑަރު ސަރަހައްދުތަކުގައި ހަނގުރާމަވެރި ޖަމާއަތްތަކުން ސިފައިންނާއި ފުލުހުންނަށް އަމާޒުކޮށްދޭ ހަމަލާތައް ވަނީ ވަރަށް ބޮޑަށް އިތުރުވެފަ އެވެ.
އިސްލާމްއާބާދުން ތުހުމަތުކުރާ ގޮތުގައި، ހަނގުރާމަވެރިން އަފްގާނިސްތާނަކީ އެ މީހުންނަށް ރައްކާތެރި މަންޒިލެއްގެ ގޮތުގައި ބޭނުންކޮށްގެން، ޕާކިސްތާނަށް ހަމަލާދިނުމަށް ތަމްރީނުތައް ހޯދައި ރޭވުންތައް ރާވަމުންދެ އެވެ.
ނަމަވެސް އަފްގާނިސްތާނުގެ ތާލިބާން ސަރުކާރުން މި ތުހުމަތުތައް ދޮގުކުރެ އެވެ. އެ ސަރުކާރުން ބުނާ ގޮތުގައި ހަނގުރާމަވެރި ޖަމާއަތްތަކުގެ މައްސަލައަކީ ޕާކިސްތާނުގެ ދާހިލީ މައްސަލައެކެވެ.
