ޕެރިސް (ޖެނުއަރީ 2) - ބެލްޖިއަމްގެ ކްލަބް ބްރޫޖްގެ ކޯޗަކަށް އިންގްލެންޑްގެ ކުރީގެ މިޑްފީލްޑަރު ސްކޮޓް ޕާކާ ހަމަޖައްސައިފި އެވެ.
ޕާކާ، 42، ބްރޫޖްގެ ކޯޗަކަށް މި ހަމަޖެއްސީ މި ސީޒަންގައި ބެލްޖިއަމް ލީގުގައި އެ ޓީމުގެ ނަތީޖާތައް ދަށްވުމާ ގުޅިގެން ކާލް ހޯއެފްކެންސް މަގާމުން ވަކިކުރިތާ ތިން ދުވަސް ފަހުންނެވެ.
ޗެމްޕިއަންސް ލީގުގެ ނޮކްއައުޓް ބުރަށް ބްރޫޖް ކޮލިފައިވި ނަމަވެސް، ހޯއެފްކެންސް މަގާމުން ވަކިކުރީ ބެލްޖިއަމް ލީގުގެ ނަތީޖާތައް ދަށްވުމެވެ. ބެލްޖިއަމް ލީގުގެ އެންމެ ފަހުގެ ޗެމްޕިއަން ބްރޫޖް އޮތީ ލީގުގެ ތާވަލްގެ ހަތަރު ވަނައިގައެވެ. ތާވަލްގެ އެއް ވަނައިގައި އޮތް ގެންކާއި ބްރޫޖްގެ މެދުގައި 12 ޕޮއިންޓްގެ ފަރަގެއް އެބައޮތެވެ. މީގެ އިތުރުން، ބްރޫޖް ވަނީ ބެލްޖިއަމް ކަޕުން ކަޓައިފަ އެވެ.
އިންގްލެންޑްގެ ގައުމީ ޓީމުގެ އިތުރުން، ޗެލްސީ އާއި ނިއުކާސަލް ޔުނައިޓަޑަށް ވެސް ކުޅުނު ޕާކާ ކޯޗިން ކެރިއަރު ފެށީ ޓޮޓެންހަމް ހޮޓްސްޕާގެ ޔޫތު ޓީމުތަކުގައެވެ. އޭގެ ފަހުން، 2018 ވަނަ އަހަރު ކްލައުޑިއޯ ރަނިއޭރީގެ އެހީތެރިއެއްގެ ގޮތުގައި ފުލަމްއާ ގުޅުނެވެ. އަދި ރަނިއޭރީ ކޯޗުގެ މަގާމުން ވަކިކުރުމުން، ފުލަމްގެ ކޯޗުކަމާ ޕާކާ ހަވާލުވީ 2019 ވަނަ އަހަރުގެ ފެބްރުއަރީ މަހެވެ.
އޭގެ ފަހުން ބޯންމަތުގެ ކޯޗަކަށް ވެސް އޭނާ މަސައްކަތްކުރިއެވެ. ބޯންމައުތުގެ ކޯޗުކަމުން ޕާކާ ވަކިކުރީ މި ފަހަރު އިނގިރޭސި ޕްރިމިއާ ލީގުގައި މިދިޔަ އޮގަސްޓް މަހު ފަހުކޮޅު ލިވަޕޫލް އަތުން 9-0 އިން ބަލިވުމުންނެވެ.
ފާއިތުވި އަހަރުތަކުގައި ބްރޫޖް ވަނީ ރަނގަޅު ކާމިޔާބީތަކެއް ހޯދައިފަ އެވެ. އެ ގޮތުން ފާއިތުވި ހަތް އަހަރުގެ ތެރެއިން، ފަސް އަހަރު ބެލްޖިއަމް ލީގުގެ ޗެމްޕިއަންކަން ހޯދީ ބްރޫޖެވެ.
