މިހާރު ކުރިއަށްދާ ރިސޯޓް ސުޕަ ލީގުގައި، ބ އަތޮަޅުގެ ޗެމްޕިއަން، ފިނޮޅު ސީސައިޑް މޯލްޑިވްސް ކައިރިން، ނ. އަތޮޅުގެ ޗެމްޕިއަން، ވެލާ ޕްރައިވެޓް އައިލެންޑް މޯލްޑިވްސް ތަފާތު ބޮޑުކޮށް ނަތީޖާ އަނބުރާލައިފި އެވެ.
ވެލާ ޕްރައިވެޓް އައިލެންޑްގައި ކުޅުނު ފުރަތަމަ ލެގުގެ މެޗުން ފިނޮޅުން ވަނީ 3-2 އިން މޮޅުވެފަ އެވެ. މިއަދު ހަވީރު، އަވާނީ+ފަރެސް މޯލްޑިވްސްގައި ކުޅުނު ލެގުގައި، ފިނޮޅު އަތުން ވެލާ ވަނީ 10-1 އިން މޮޅުވެފަ އެވެ. އެގްރިގޭޓަށް ބަލާއިރު، ވެލާ އިން ކުރިހޯދީ 12-4 އިންނެވެ.
މިއަދުގެ މެޗުގައި ވެލާގެ ލަނޑުތައް ޖެހީ، އަހުމަދު އިމްރާން ފަސް ގޯލުގެ އިތުރުން، ހަސަން އަބްދުލް ޖަލީލް، މުހައްމަދު ޒާހިދު ސައީދު، އަޒްލީމް އަހުމަދު، އަލީ ރާޒީ އަދި އަހުމަދު އިމްތިނާހު އެވެ. ފިނޮޅުގެ ލަނޑު ޖެހީ، މުހައްމަދު ޝުއާއު އެވެ.
ރިސޯޓް ލީގުގެ ފުރަތަމަ މެޗުގައި، ބަރޮސް އަތުން ސަން ސިޔާމް އޮޅުވެލިން ވަނީ އެގްރިގޭޓަށް ބަލާއިރު ތަފާތު ބޮޑު މޮޅެއް ހޯދައިފަ އެވެ. ފުރަތަމަ ލެގުގެ މެޗުން އޮޅުވެލި 2-1 އިން މޮޅުވިއިރު، އިއްޔެ ހަވީރު ކުޅުނު ދެ ވަނަ ލެގުގެ މެޗުން އޮޅުވެލި ކުރިހޯދީ 5-1 އިންނެވެ. އެހެންކަމުން، އޮޅުވެލި އަށް އެގްރިގޭޓަށް ބަލާއިރު ކުރި ލިބުނީ، 7-2 އިންނެވެ.
ސުޕަ ލީގުގައި ދެން އޮތީ، އަރި ޒޯންގެ ޗެމްޕިއަން، ކޮންރެޑް މޯލްޑިވްސް ރަންގަލި އައިލެންޑް އަދި ދ. ޒޯންގެ ޗެމްޕިއަން، ސެއިންޓް ރެޖިސް ވޮއްމުލިން ވާދަކުރާ ދެ ލެގުގެ މެޗުތަކެވެ. ބުދަ ދުވަހު ކުޅޭ ފުރަތަމަ ލެގު އޮތީ، ކޮންރަޑްގަ އެވެ. އަދި، އޭގެ ދެ ދުވަސް ފަހުން ދެ ވަނަ ލެގު އޮތީ އަންގްސާނާ ވެލާވަރުގަ އެވެ.
މެޗުތައް ނިމުމަށް ފަހު، އެގްރިގޭޓުން އެންމެ ރަނގަޅު ނަތީޖާ ނެރޭ ޓީމަކަށް ފައިނަލުގެ ސީދާ ޖާގައެއް ލިބޭނެ އެވެ. އަދި، ދެ ވަނަ އަށް އެންމެ ރަނގަޅު އެގްރިގޭޓް ނެރޭ ޓީމަކާއި ތިން ވަނަ އަށް އެންމެ ރަނގަޅު އެގްރިގޭޓް ނަތީޖާ ހޯދާ ޓީމެއްގެ މެދުގައި ސެމީ ފައިނަލް މެޗެއް ކުޅޭނެ އެވެ.
ސެމީ ފައިނަލް އޮތީ މި މަހު 27 ވަނަ ދުވަހު އެވެ. އަދި، ފައިނަލް އޮތީ މި މަހު 29 ވަނަ ދުވަހު އެވެ.
