ރިވައިވަލް ސްޕޯޓްސް އިން ބެޑްމިންޓަން ދުނިޔޭގެ ފެޑެރޭޝަން، ބީޑަބްލިއުއެފް އިން ރުހުން ދީފައިވާ ތިން މުބާރާތެއްގައި ވާދަކުރުމަށް ތައްޔާރުވެއްޖެ އެވެ.
ރިވައިވަލް ސްޕޯޓްސް އާއި ގައުމީ ބެޑްމިންޓަން ސްކޮޑުގެ ފަސް ކުޅުންތެރިން ވާދަކުރުމަށް ނިންމާފައިވާ މުބާރާތްތަކަކީ، މި މަހު 20-23 އަށް ގްރީސްގައި ކުރިއަށްދާ ހެލަސް އިންޓަނޭޝަނަލް، މި މަހު 28-31 އަށް ހަންގޭރީގައި ކުރިއަށްދާ 51 ވަނަ ވިކްޓާ އެފްޒެޑް ފޯޒާ ހަންގޭރިއަން އިންޓަނޭޝަނަލް ޗެމްޕިއަންޝިޕްސް އަދި އަންނަ މަހުގެ 5-8 އަށް ނޯވޭގައި ކުރިއަށްދާ އެފްޒެޑް ފޯޒާ ނޯވޭޖިއަން އިންޓަނޭޝަނަލްގަ އެވެ.
މި މުބާރާތްތަކުގައި ވާދަކުރާ ރިވައިވަލް ސްޕޯޓްސް އާއި ގައުމީ ޓީމުގެ ކުޅުންތެރިންނަކީ، ޒަޔާން ޒަކީ، ނިބާލް އަހުމަދު، ހަސަން ޒަޔާން، އައިމިނަތު ނަބީހާ (ނަބީ) އަދި ފާތިމަތު ނަބާހާ (ނަބާ) އެވެ.
އެ ގޮތުން، މި ތިން މުބާރާތުގައި ވަކިވަކި ކުޅުންތެރިން ވާދަކުރާ އިވެންޓްތަކަށް ބަލާއިރު، ޒަޔާން ޒަކީ ގްރީސް އާއި ހަންގޭރީ މުބާރާތުގައި ކުޅޭނީ މިކްސް ޑަބަލްސް އާއި މެންސް ޑަބަލްސްގަ އެވެ. އަދި، ނޯވޭ މުބާރާތުގައި މެންސް ސިންގަލްސް އާއި މިކްސް ޑަބަލްސްގައި ވާދަކުރާނެ އެެވެ.
ގްރީސްގެ މުބާރާތުގައި ނަބާ ކުޅޭނީ އަންހެން ޑަބަލްސް އާއި މިކްސް ޑަބަލްސްގަ އެވެ. ހަންގޭރީގައި އަންހެން ސިންގަލްސް، މިކްސް ޑަބަލްސް އަދި އަންހެން ޑަބަލްސްގައި ކުޅޭގޮތަށް ހަމަޖެހިފައިވާއިރު، ނޯވޭގައި ކުޅޭނީ އަންހެން ޑަބަލްސް އާއި މިކްސް ޑަބަލްސްގަ އެެވެ. ގްރީސްގައި ނިބާލް ކުޅޭނީ ފިރިހެން ސިންގަލްސް، ފިރިހެން ޑަބަލްސް އަދި މިކްސް ޑަބަލްސްގަ އެވެ. އަދި، ހަންގޭރީގައި ފިރިހެން ސިންގަލްސް އާއި ފިރިހެން ޑަބަލްސް ކުޅޭއިރު، ނޯވޭގެ މުބާރާތުގައި ނިބާލް ވާދަނުކުރާނެ އެވެ.
ނަބީ، ގްރީސް މުބާރާތުގައި އަންހެން ޑަބަލްސް އާއި މިކްސް ޑަބަލްސްގައި ކުޅޭއިރު، ހަންގޭރީ މުބާރާތުގައި ކުޅޭނީ އަންހެން ސިންގަލްސް އާއި އަންހެން ޑަބަލްސްގަ އެވެ. އަދި، ނޯވޭ މުބާރާތުގައި އަންހެން ސިންގަލްސް އާއި އަންހެން ޑަބަލްސްގައި ވާދަކުރާނެ އެވެ.
ހަސަން ޒަޔާން ވާދަކުރާނީ، ގްރީސް އާއި ހަންގޭރީ މުބާރާތުގައި ފިރިހެން ސިންގަލްސްގަ އެވެ.
މިއީ، މި އަހަރު ތެރޭ ރިވައިވަލް އިން ފުރިހަމަ ކުރާ ޔޫރަޕްގެ ދެ ވަނަ ޓުއާ އެވެ. މީގެ ކުރިން، މި އަހަރު ރިވައިވަލްގެ ކުޅުންތެރިން ވަނީ، ފްރާންސް، އިޓަލީ އަދި ޗެކް ރިޕަބްލިކްގެ މުބާރާތްތަކުގައި ވާދަކޮށްފަ އެވެ. މީގެ ތެރެއިން، އިޓަލީގައި ކުރިއަށްދިޔަ މުބާރާތުގައި، ނަބާ އާއި ނަބީ ވަނީ އަންހެން ޑަބަލްސްގެ ކުއާޓާ ފައިނަލުގައި ވާދަކޮށްފަ އެވެ.
