މާލޭގެ ގަރާޖެއްގައި ވަރަށް ބޮޑަށް ރޯވެ ބޮޑެތި ގެއްލުންތަކެއް ވެއްޖެ އެވެ. މި ހާދިސާގައި މިހާތަަނަށް މީހަކަށް އަނިޔާއެއް ލިބުނު ކަމުގެ މައުލޫމާތެއް ނުލިބެ އެވެ. ނަމަވެސް, ބައެއް ގޭގެއިން މީހުން ހުސްކޮށް ވަގުތީ ހިޔާތަކަށް ގެންދަން ވަނީ ޖެހިފަ އެވެ.
މިރޭ އަލިފާން ރޯވީ މާފަންނު އިސްކަންދަރު މަގާއި ކޯރުކެނޑި މަގު ގުޅޭ ހިސާބުގައި ހުރި މ. ސެންރޯސް ކިޔާ ގެއެއްގެ އެންމެ ތިރީ ފަންގިފިލާގައި ހުރި ގަރާޖެއްގަ އެވެ. ފުލުހުން މައުލޫމާތު ދިން ގޮތުގައި އަލިފާނުގެ ރިޕޯޓް ލިބުނީ މިރޭ 12:27 ހާއިރު އެވެ. އެ ރިޕޯޓާ އެކު ސިފައިން ވަނީ އަލިފާން ނިއްވާލުމުގެ މަސައްކަތް ފެށި އެވެ.
އެ ސަރަހައްދުގައި ހަރަކާތްތެރިވި "އަދަދު"ގެ ފޮޓޯޖާނަލިސްޓުން މައުލޫމާތު ދިން ގޮތުގައި އެންމެ ފުރަތަމަ އަލިފާންގަނޑު ވަރަށް ބޮޑަށް ފެތުރިގެންދިޔަ އެވެ. އެގޮތުން އެންމެ ތިރީގައި ހުރި ގަރާޖުގައި ރޯވި އަލިފާން އެ އިމާރާތުގެ އެހެން ފަންގިފިލާތަކަށް ފެތުރުނެވެ.
އަލިފާން ރޯވި ސަރަހައްދުގައި އޮތް ކާރެއް ދުރުކުރުމުގެ މަސައްކަތް ސިފައިން ކުރަނީ - ފޮޓޯ: އަބްދުالله އިޔާން / އަދަދު
އޭގެއިތުރުން ޖެހިގެން ހުރި ގުދަނަކަށާއި އެހެން ބައެއް އިމާރާތްތަކަށް ވެސް އަލިފާނުގެ އަސަރު ފޯރާފައިވާ ކަމަށް ނޫސްވެރިން މައުލޫމާތު ދިނެވެ.
އަލިފާންގަނޑު ފެތުރެމުންދާތާ ގާތްގަނޑަކަށް ގަޑިއިރެއްހާ ފަހުން ސިފައިން ވަނީ އެ އަލިފާންގަނޑު ފެތުރުން ކޮންޓްރޯލްކޮށްފަ އެވެ. އޭގެ އިރުތަކެއް ފަހުން މިހާރު ވަނީ އަލިފާންގަނޑު އެއްކޮށް ނިއްވާލާފަ އެވެ. ނަމަވެސް, އެ ސަރަހައްދުން އަދިވެސް ގިނަ އަދަދެއްގެ ދުން ދަނީ އަރަމުންނެވެ.
އަލިފާނުގެ ހާދިސާ ހިނގި ގަރާޖަކީ ވެހިކަލް މަރާމާތުކުރުމުގެ މަސައްކަތް ކުރާ ގަރާޖެކެވެ.
އަލިފާން ރޯވި އިމާރާތުގައި ދިރިއުޅޭ މީހަކު މަގުމައްޗަށް ނުކުމެ - ފޮޓޯ: އަބްދުالله އިޔާން / އަދަދު
އަލިފާން ރޯވި ގަރާޖު ހިމެނޭ އިމާރާތާއި ސަރަހައްދުގެ އިތުރު ދެ ގެއަކުން ވަނީ މީހުން ހުސްކޮށްފަ އެވެ. އެމީހުން އެހީތެރިކަން ފޯރުކޮށްދިނުމަށް އެ ސަރަހައްދުގައި ނެޝެނަލް ޑިޒާސްޓާ މެނޭޖްމަންޓް އޮތޯރިޓީ (އެންޑީއެމްއޭ) އަންނަނީ ހަރަކާތްތެރިވަމުންނެވެ.
ހާލުގައި ޖެހުނު މީހުންގެ ތެރޭގައި ގިނައީ ބިދޭސީންނެވެ.
މިރޭގެ އަލިފާން ހާދިސާ ހިނގަން މެދުވެރިވި ސަބަބު އަދި ދެނެގަނެވިފައިނުވާއިރު, ލިބުނު ގެއްލުންތައް ވެސް އަދި ސާފެއް ނުވެ އެވެ. ނަމަވެސް, ގަރާޖަށް ބޮޑު ގެއްލުމެއް ލިބިފައިވާނެ ކަމަށް ބެލެވެ އެވެ. އަދި އެ ސަރަހައްދުގެ އެހެން އިމާރާތްތަކާއި ބައެއް ވެހިކަލްތަކަށް ވެސް ގެއްލުންތައް ލިބިފައިވާނެ ކަމަށް ބެލެވެ އެވެ.
އަލިފާން ރޯވި ސަރަަހައްދުގައި ދިރިއުޅޭ ބައެއް މީހުން މާފަންނު ދަނޑު ސަރަަހައްދުގައި މަޑުކޮށްގެން - ފޮޓޯ: އަބްދުالله އިޔާން / އަދަދު
އިމާރާތުގައި ހުޅު ހިފާފައި: މިހާރު ވަނީ އަލިފާންގަނޑު ނިއްވާލާފައި - ފޮޓޯ: އަބްދުالله އިޔާން / އަދަދު
އަލިފާން ނިއްވުމުގެ މަސައްކަތުގައި ސިފައިން ހަރަކާތްތެރިވަނީ - ފޮޓޯ: އަބްދުالله އިޔާން / އަދަދު
