މެޑްރިޑް (އޮކްޓޫބަރު 9) - ސްޕެނިޝް ލީގުގައި ރޭ ރަށުންބޭރުގައި 1-0 އިން ގެޓަފޭ ބަލިކޮށް ރެއާލް މެޑްރިޑް ލީގުގެ އެއް ވަނަ އަށް ޖެހިލައިފި އެވެ.
އެންމެ ފަހުގެ ޗެމްޕިއަން ރެއާލް އެއް ވަނަ އަށް ޖެހިލީ އަށް މެޗުން 22 ޕޮއިންޓް ހޯދައިގެންނެވެ. ދެ ވަނައިގައި އޮތް ބާސެލޯނާ އަށް ހަތް މެޗުން 19 ޕޮއިންޓް ލިބިފައިވާއިރު، ތިން ވަނައިގައި އޮތް އެތުލެޓިކް ބިލްބާއޯ އަށް ވަނީ އަށް މެޗުން 17 ޕޮއިންޓް ލިބިފަ އެވެ.
ގެޓަފޭ ދަނޑުގައި ރޭ ރެއާލުން .ވަނީ ތިން ވަނަ މިނިޓްގައި ލީޑުނަގައިފަ އެވެ. މިއީ ލޫކަ މޮޑްރިޗް ނެގި ކޯނަރަކުން އެޑާ މިލިޓާއޯ ބޮލުން ޖެހި ގޯލެކެވެ.
ގެޓަފޭގެ އަލޭނިއާ (ވ) ކައިރިން ރެއާލްގެ މޮޑްރިޗް ބޯޅަ ހިފައިގެންދަނީ.-- ފޮޓޯ: ގެޓީއިމޭޖަސް
އަންޑްރީ ލުނިން ހުރި ރެއާލްގެ ގޯލަށް ބޯޅައެއް ވައްދާލަން ރޭގެ މެޗުގައި ގެޓަފޭ އިން ގިނަ މަސައްކަތްތަކެއް ކުރި ނަމަވެސް ކާމިޔާބެއްނުވި އެވެ. ފުރަތަމަ ހާފު ނިމުމުގެ ކުރިން ރެއާލަށް ދެ ވަނަ ގޯލެއް ޖަހައިދޭން ރޮޑްރީގޯ ބޮލުން ޖެހި ބޯޅަ އަމާޒުވީ ގެޓަފޭގެ ކީޕަރު ޑޭވިޑް ސޮރިއާ އަތަށެވެ.
މެޗުގެ 57 ވަނަ މިނިޓްގައި ރޮޑްރީގޯ ޖެހި ގޯލެއް ވަނީ އޮފްސައިޑް ކަމަށް ނިންމައިފަ އެވެ. މިއީ ވީޑިއޯ އެސިސްޓަންޓް ރެފްރީ (ވީއޭއާރް) އިން ބަލާފައި ނިންމި ނިންމުމެކެވެ. ފުރަތަމަ ހާފުގައި ރެއާލްގެ ވިނީޝިއުސް ޖޫނިއާ އަށް ކުރި ފައުލަކަށް ދިން ޕެނަލްޓީ އެއް ވެސް ފަހުން ނުދޭން ނިންމީ ވީއޭއާރް އިން ބަލައިފަ އެވެ. އެއީ ވިނީޝިއުސް އެ ބޯޅަހިފައިގެން އޭރިއާތެރެއަށް ވަނުމުގެ ކުރިން އަރިމަތިން ބޯޅަ ބޭރުވެފައިވާތީ އެވެ.
ބާސެލޯނާ މިރޭ ސެލްޓަ ވީގޯ އަތުން މޮޅުވެއްޖެނަމަ އަލުން އެއް ވަނަ އަށް އެރޭނެ އެވެ.
ރޭ ޖިރޯނާ އަތުން 2-1 އިން މޮޅުވެ، އެތުލެޓިކޯ މެޑްރިޑް ހަތަރަކަށް އެރީ އަށް މެޗުން 16 ޕޮއިންޓާ އެކު އެވެ. އެތުލެޓިކޯގެ ދެ ގޯލު ވެސް ޖެހީ އެންހެލް ކޮރޭއާ އެވެ. ޖިރޯނާގެ ހަމައެކަނި ގޯލު ޖެހީ ރޮޑްރީގޯ ރިކޭލްމޭ އެވެ.
