ލިވަޕޫލް (އޮކްޓޫބަރު 11) - ދެ ވަނަ ހާފުގައި ބަދަލަކަށް ކުޅެން އެރި ޖެރެމީ ޑޮކޫ ދެއްކި ތަފާތާ އެކު، މެންޗެސްޓާ ސިޓީން 3-0 ލިވަޕޫލް ބަލިކޮށްފި އެވެ.
މި ނަތީޖާއާ އެކު، ސިޓީން މި ވަނީ 1953 ވަނަ އަހަރުގެ ފަހުން، ލިވަޕޫލް ދަނޑު، އެންފީލްޑްގައި ޖެހިޖެހިގެން ދެ ވަނަ ފަހަރަށް ލީގު މެޗަކުން މޮޅުވެފަ އެވެ. ސިޓީން ވަނީ މިދިޔަ ސީޒަނުގައި ވެސް ލިވަޕޫލް ދަނޑުގައި މޮޅުވެފަ އެވެ. ސިޓީން މި މޮޅާ އެކު، ލީގުގެ އެއް ވަނައިގައި އޮތީ ތިން ޕޮއިންޓުގެ ލީޑަކާ އެކު އެވެ. ސިޓީ އަށް ހަ މެޗުން ވަނީ 18 ޕޮއިންޓް ލިބިފަ އެވެ. ދެ ވަނައިގައި އޮތް އާސެނަލަށް ހަ މެޗުން ލިބުނީ 15 ޕޮއިންޓެވެ.
މި މެޗުގައި ލިވަޕޫލަށް އެންމެ ބޮޑު ގޮންޖެހުމެއް ކުރިމަތިވީ 62 ވަނަ މިނިޓްގައި އެ ޓީމުގެ ރަޔާން ގްރަވެންބާކަށް ދެ ވަަނަ ރީނދޫ ކާޑާ އެކު ރަތެއް ދެއްކުމުންނެވެ. ގްރަވެންބާކަށް ދެ ވަނަ ރީނދޫ ކާޑު ދެއްކީ ޑޮކޫ އަށް ކުރި ފައުލަކަށެވެ. ލިވަޕޫލްގެ ކުޅުންތެރިއަކު މަދުވިތާ ތިން މިނިޓް ތެރޭ ސިޓީން ލީޑުނެގި އެވެ. ޑޮކޫ ޖެހި ޝޮޓެއް ބްލޮކްވެގެން، އޭރިއާތެރެއިން ހާލަންޑަށް ލިބުމާ އެކު، އޭނާ ވަނީ ތިރިން ގޯލުގެ ތެރެއަށް ބޯޅަ ފޮނުވާލައިފަ އެވެ. ލަނޑު ޖެހުމުގެ ކުރިން ދެ ވަނަ ހާފުގައި ހާލަންޑަށް ލިބުނު ފުރުސަތެއްގައި ޖެހި ޝޮޓް ގޯލާ ސީދާނުވި އެވެ.
ލީޑުނެގުމަށް ފަހު، ސިޓީން ލަސްތަކެއް ނުވެ ދެ ވަނަ ލަނޑު ޖަހައި، ލީޑުފުޅާކުރި އެވެ. ފުރަތަމަ ލަނޑު ޖެހިތާ ތިން މިނިޓް ފަހުން ސިޓީގެ ދެ ވަނަ ލަނޑު ޖެހީ ޑޮކޫ އެވެ. މިއީ، މެޗުގެ 68 ވަނަ މިނިޓްގައި އޭރިއާތެރެއިން ގޯލުގެ މަތީ ކަނަށް ބޯޅަ ފޮނުވާލައިގެން ޑޮކޫ ޖެހި ގޯލެކެވެ.
ސިޓީން ތިން ވަނަ ލަނޑު ޖެހީ މެޗުގެ 78 ވަނަ މިނިޓްގަ އެވެ. މިއީ، އޭރިއާތެރެއިން، ސިޓީގެ ޖޮސްކޯ ގްވާޑިއޯލް ދިން ބޯޅައަކުން ރަޔާން ޗާކީ ޖެހި ގޯލެކެވެ. ޗާކީ މި ލަނޑު ޖެހީ އޭރިއާތެރެއިން ބޯޅަ ކޮންޓްރޯލް ކުރުމަށް ފަހު ކީޕަރު، އެލިސަން ބެކާ ކައިރިން ވެސް ނައްޓާފަ އެވެ.
އަނިޔާގެ ސަބަބުން ލިވަޕޫލުން އަލެކްސަންޑަ އިސާކް އާއި ކޯޑީ ގަކްޕޯ އަދި ޑޮމިނިކް ސޮބޯސްލާއި ނުލައި ކުޅުނު މި މެޗުގައި އެ ޓީމުގެ އެޓޭކުގައި އެންމެ ރަނގަޅަށް ކުޅުނީ ލެވިސް ކޯމާސް އާއި ޑެނިއަލް މުނޯޒް އެވެ. ދެ ވަނަ ހާފުގެ ކުރީކޮޅުގައި ކޫމާސް ފޮނުވާލި ޝޮޓެއް ސިޓީގެ ކީޕަރު ޖިއަންލުއީޖީ ޑޮނަރުންމާ ވަނީ މަތަކޮށްފަ އެވެ. އަދި، މުނޯޒް ފޮނުވާލި ބޯޅަތަކެއް ސިޓީ ޑިފެންޑަރުން ވަނީ ބްލޮކްކޮށްފަ އެެވެ.
ސިޓީގެ ކޯޗުކަމާ އެންޒޯ މަރެސްކާ ހަވާލުވެ، މިހާތަނަށް ލީގުގައި ކުޅުނު ހުރިހާ މެޗަކުން މޮޅުވެފަ އެވެ. އޭނާ އަކީ އާ ސީޒަނަށް ނުކުމެ ޕްރިމިއާ ލީގުގެ ފުރަތަމަ ހަ މެޗުން މޮޅުވި ހަތަރު ވަނަ ކޯޗެވެ. އަނެއްކޮޅުން، މިއީ، ލިވަޕޫލްގެ ކޯޗަކަށް ހުރެ އަންޑޯނީ އިރައޯލާ ބަލިވި ފުރަތަމަ މެޗެެވެ. ލިވަޕޫލް އޮތީ ހަ މެޗުން ނުވަ ޕޮއިންޓާ އެކު، ނުވަ ވަަނައިގަ އެވެ.
