ފާހިޝް އަމަލުތައް ހުއްޓުވަން ފިޔަވަޅު ނާޅައި ދޫކޮށް ނުލައްވާނެ ކަމަށް ވިދާޅުވެ، ހޯމް މިނިސްޓަރު އިމްރާން އަބްދުﷲ އޭނާއަށް އަމާޒުވެފައިވާ ފާޑުކިއުންތަކަށް މިއަދު ރައްދު ދެއްވައިފި އެވެ.
އެއްޖިންސުން ގުޅުން ހިންގާ މަންޒަރުތައް ފެންނަ ވީޑިއޯތަކެއް އާއްމުވުމުން، އެ ވީޑިއޯތަކުން ފެންނަ ފަރާތްތަކާ ދެކޮޅަށް ފިޔަވަޅު އަޅާފައި ނުވާތީ އާއްމުންނާއި ބައެއް ދީނީ އިލްމުވެރިން އަދި ސިޔާސީ ފަރާތްތަކުން ދަނީ އިމްރާނަށް ފާޑުކިޔަމުންނެވެ.
އެ ފާޑުކިއުންތައް ކުރިމަތިވާތާ ގިނަ ދުވަސްތަކެއް ފަހުން މިއަދު ކުރެއްވި ޓްވީޓެއްގައި އިމްރާން ވިދާޅުވީ ފާހިޝް އަމަލުތައް "ލޯމައްޗަށް ތަކުރާރުވާން ފެށީމާ" ފިޔަވަޅު އެޅުމަކީ އޭނާ ދޫކޮށްލައްވާނެ ކަމެއް ނޫން ކަމަށެވެ. ނުސީދާ ގޮތެއްގައި އޭނާ އެ ވިދާޅުވީ އެއްޖިންސުން ގުޅުން ހިންގުމުގެ މައްސަލަތަކުގެ ވާހަކަ އެވެ. އެއީ އެ އަމަލުތައް ސިފަކުރެއްވި ގޮތުންނެވެ.
"ﷲގެ ކޯފާއަށް ގައުމު ހުށަހެޅޭ ފަދަ ހަޑިމުޑުދާރު އަމަލުތައް ލޯމައްޗަށް ތަކުރާރުވާން ފެށީމާ ގާނޫނީ ހަމަތަކުގެ މަތިން އަޅަންވާ ފިޔަވަޅު އެޅުމަކީ އިންޝާއަﷲ އަަޅުގަނޑު ނުކޮށް ދޫކޮށްލާނެ ކަމެއް ނޫން،" ޓްވީޓްގައި އިމްރާން ވިދާޅުވި އެވެ.
އެއީ ދީނުގެ ހައްދުތައް ނެތިކޮށް، އިޖުތިމާއީ ފޭރާން ވީދާ އަމަލުތަކެއް ކަމަށް ވެސް އޭނާ ސިފަކުރެއްވި އެވެ.
އިމްރާން މިހެން ވިދާޅުވެ ޓްވީޓު ކުރެއްވުމުން އޭނާއަށް ފާޑުކިޔައި، އޭނާގެ ޓްވީޓަށް އެތައް ބަޔަކު ޖަވާބު ވެސް ދިނެވެ. ބައެއް މީހުން ތުހުމަތު ކުރީ އިމްރާން އެގޮތަށް ވާހަކަ ދައްކަވަން ފެއްޓެވީ އިންތިހާބު ކައިރިވާތީ ކަމަށެވެ.
"އަދިވެސް މަގާމު ދޫކޮށް ނުލައްވަމެއްނޫންތޯ" ވެސް ބައެއް މީހުން ސުވާލުކުރި އެވެ.
"އެޅުއްވި ފިޔަވަޅެއް ރައްޔިތުންނަކަށް ފެންނާކަށް ނެތެއްނޫންތޯ" އިމްރާނަށް ޖަވާބު ދެއްވަމުން އިދިކޮޅު ޕީޕީއެމްގެ އިސް ބޭފުޅަކު ވިދާޅުވި އެވެ.
