ސަރުކާރު ހިންގާ އެމްޑީޕީގެ ތެރޭގައި އުފެދިފައިވާ ކޯޅުމުގެ ތެރެއިން، ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ އިތުބާރު ނެތް ކަމުގެ ވޯޓެއް ނަގަން ތައްޔާރަށް ތިބި ކަމަށް އިދިކޮޅު ޕީޕީއެމް/ޕީއެންސީ ކޯލިޝަނުން މިއަދު ބުނެފި އެވެ.
ސޯޝަލް މީޑިއާގައި މިހާރު ދައުރުވަމުން އަންނަ ސިޔާސީ ބައެއް ބޭފުޅުން ކަމަށް ބެލެވޭ ބަރަހަނާ މަންޒަރު ފެންނަ ވީޑިއޯތަކާ ގުޅިގެން އިދިކޮޅުން ރައްޔިތުންގެ މަޖިލީހަށް ހުށަހެޅި ދެ ކުއްލި މައްސަލަ ބަލައި ނުގަތުމަށް ރިޔާސަތުން ނިންމި ނިންމުމާ ގުޅިގެން އިދިކޮޅުން މިއަދު ވަނީ އިހުތިޖާޖުކޮށްފަ އެވެ.
"އެފަދަ [އެމްޑީޕީގެ ތެރެއިން ނަޝީދުގެ އިތުބާރު ނެތް ކަމުގެ ވޯޓު ނަގާ] ހާލަތަކަށް ހިނގައިދާނެ، ގޮއްސިއްޔާ އަޅުގަނޑުމެނަށް ހަމަ ތިބުނާ މަޖިލިސް ރައީސް ވަކިކުރަން ފުރުސަތު ލިބެއްޖެއްޔާ އަޅުގަނޑުމެން އެންމެ މިނެޓެއް ވެސް ނުތިބޭނަން، ވަކިކުރާނަން," އިދިކޮޅުން މިއަދު ބޭއްވި ނޫސްވެރިންގެ ބައްދަލުވުމުގައި ޕީޕީއެމްގެ ޕީޖީ ލީޑަރު، އޭދަފުށީ ދާއިރާގެ މެންބަރު އަހުމަދު ސަލީމް ވިދާޅުވި އެވެ.
ސަލީމް ވިދާޅުވި ގޮތުގައި ރައީސް ވަކި ކުރުމަށް ހުށަހަޅަން ޖެހޭ ގާނޫނީ އަދަދު ހަމަވާ ވަރަށް އިދިކޮޅު މެންބަރުން ނެތެވެ. އަދި، އެމްޑީޕީގެ ބޮޑު މެޖޯރިޓީގެ ކުރިމަތީގައި އެފަދަ މައްސަލައެއް ކުރިއަށް ގެންދިއުމަކީ ވެސް ކުރެވޭނެ ކަމެއް ނޫނެވެ.
އެހެންނަމަވެސް, އެމްޑީޕީގެ ހިޔާލުތަފާތުވުންތަކާއެކު، އެ ކަން ވަރަށް އަވަހަށް ފަހިވެގެންދާނެ ކަަމަށާއި އެކަމަށް "އަބަދުވެސް ތައްޔާރަށް" އޮތް ކަމަށް ސަލީމް ވިދާޅުވި އެވެ.
މަޖިލީހަށް މިއަދު ހުށަހެޅުނު މައްސަލަތައް އެޖެންޑާ ނުކުރުމުން، އިދިކޮޅުގެ މެންބަރުން ވަނީ ވަރަށް ބޮޑަށް ނުރުހުން ފާޅުކޮށްފަ އެވެ. އެގޮތުން އެއީ ގައުމުގައި ހިނގާ ފާހިޝް ކަންކަން ފޮރުވުމަށް ރޭވިގެން ހިންގާ ކަމެއްގެ ގޮތުގައި ސިފަކުރި އެވެ.
