ރަށްރަށުގެ ފުޓްސަލް ދަނޑުތަކުގެ ލައިޓު ނުދިއްލުން ފަދަ މައްސަލަތަކުގައި މިނިސްޓަރު ރައްޔިތުންގެ މަޖިލީހަށް ހާޒިރުކޮށް ސުވާލުކުރާތީ ކުޅިވަރާ ބެހޭ މިނިސްޓަރު އަހުމަދު މަހުލޫފް މިއަދު ނުރުހުން ފާޅުކުރައްވައިފި އެވެ.
މަޖިލީހުގެ މިއަދުގެ ޖަލްސާއަށް މަހުލޫފް ހާޒިރުކޮށް ސުވާލުކޮށްފައިވަނީ ލ. މާވަށުގެ ފުޓްސަލް ދަނޑު ހަލާކުވެފައިވާތީ އެކަމާ ގުޅޭ ގޮތުން ސުވާލުކުރުމަށް، އެ ދާއިރާގެ މެންބަރު މުހައްމަދު ސައީދު ހުށަހެޅުއްވުމުންނެވެ.
"ފުޓްސަލް ދަނޑުގެ ލައިޓު އަނދާފަ ހުރީމަ ނުކުޅެވިގެން، ވޮލީ ކޯޓުގެ ލައިޓެއް ނެތިގެން ނުކުޅެވި މިނިސްޓަރާ ހެދި ހުންނަން ޖެހޭ ވިސްނުން އެބަ ޖެހޭ ހަގީގަތުގައި ވެސް ނިމުމަކަށް ގެންނަން، ހިތާމައަކީ މިކަމަށް މިހާރު ވެސް ވަރަށް ގިނަ ރިކުއެސްޓު އާދޭ،" އެ ސުވާލަށް ޖަވާބު ދެއްވުމަށް ފަހު މިނިސްޓަރު ވިދާޅުވި އެވެ.
މަހުލޫފް ވިދާޅުވީ ރަށްރަށުގެ ކައުންސިލްތަކުން މި ކަމަށް ހައްލެއް ގެނެސްދޭން ޖެހޭ ކަމަށެވެ. އެގޮތުން، ލާމަރުކަޒީ ގާނޫނަށް ގެނައި ބަދަލާ އެކީގައި ޔޫތު ސެންޓަރުތައް ކައުންސިލްތަކުގެ ބެލުމުގެ ދަށަށް ގެންގޮސްފައިވާ ކަން ފާހަގަކުރެއްވި އެވެ.
މިފަދަ ސުވާލުތަކަށް ޖަވާބު ހޯދުމަށް މަޖިލީހަށް މިނިސްޓަރު ހާޒިރުކުރާތީ މަހުލޫފް ކަންބޮޑުވުން ފާޅުކުރައްވާފައިވާއިރު، މީގެ ކުރިން މަޖިލީހުގެ ރައީސް މުހައްމަދު ނަޝީދު ވެސް އެ ކަންބޮޑުވުން ހިއްސާކުރައްވާފަ އެވެ.
